भांगरभूंय | प्रतिनिधी
शिक्षणाक लागूनच हें व्हड जग एक ल्हानसो गांव जावंक पावलां. विदेशी भाशेचें गिन्यान आनी विदेशी संस्कृतायेची समज आमकां शिक्षणाक लागून मेळटा.
शिक्षण म्हणल्यार आधुनीक जिवीताचो एक म्हत्वाचो भाग. आतांच्या काळांत लोक शिक्षणाक चड म्हत्व दिवंक लागल्यात. जेन्ना एक भुरगें तीन ते चार वर्सां पिरायेचेर पावता तेन्ना ताच्या आवय बापायची पयली चिंता म्हणल्यार ताका बऱ्यांतले बरे शाळेंत प्रवेश मेळोवन दिवप. हाचें कारण म्हणल्यार आतांच्या लोकांक शिक्षणाचें म्हत्व खबर आसा. कांय वर्सां पयली जेन्ना लोक इतले शिक्षीत नाशिल्ले तेन्ना तांचें जिवीत इतलें सुखी नाशिल्लें जितकें आयज आसा. चडश्या लोकांचें जिवीत कश्टाचें आशिल्लें. पूण जेन्ना शिक्षणा विशीं जागृताय निर्माण जाली आनी तें सोपें जालें तेन्ना लोकांचें जिवीत सुदारलें.
शिक्षणाचो पयलो पांवडो म्हणल्यार बरोवपाक आनी वाचपाक शिकप. बरोवपाच्या आनी वाचपाच्या गिन्यानांतल्यान मनशाक जग पळोवपाक आनी समजपाक नवी नदर मेळटा. शिक्षणाक लागून मनशाक आपल्या कुटुंबा खातीर, समाजा खातीर आनी देशा खातीर आशिल्लें आपलें कर्तव्य कळटा. हाकाच लागून जगप सोपें जालां. शिक्षणाक लागून तार्किक चिंतनाक वाव मेळटा आनी समाजातल्यान अंधस्रद्धेचो नाश करपाक मदत मेळटा. शिक्षणांतल्यान विज्ञानीक गिन्यानाचो प्रसार जाता.
तांत्रिक विद्येची उदरगत आनी तांत्रिक विद्येचो योग्य असो वापर हें शिक्षणाक लागूनच फावो जालां. आमची भलायकी कशी बरी दवरप आनी भुंय ही फुडारांत येवपी पिळग्यां खातीर कशी सुगूर दवरप हें आमकां शिक्षणांतल्यान कळटा.
शिक्षण आमकां वेळाचो योग्य आनी फळादीक उपेग करुंक शिकयता. शिक्षण बरें काम मेळोवन दिवंक मदत करता. तशेंच कलेचो आनी कार्यक्षमतेचो योग्य वापर करुन आमच्या जिवीताचो उद्धार करपाक शिकयता.
शिक्षणाक लागूनच हें व्हड जग एक ल्हानसो गांव जावंक पावलां. विदेशी भाशेचें गिन्यान आनी विदेशी संस्कृतायेची समज आमकां शिक्षणाक लागून मेळटा. आयज भायल्या देशांनी वचून काम करतात वा उद्देगाचो प्रसार भायल्या देशांनी करपाक शकतात. शिक्षणाक लागून आत्मविस्वास वाडटा. शिक्षणाक पिरायेची मर्यादा आसना. शिक्षणाची प्रक्रिया ही आयुश्यभर म्हणल्यार आमच्या जल्मा सावन सुरु जाता आनी मरणा मेरेन चलता. उपचारीक शिक्षण वा अनुपचारीक शिक्षण आसुं येता. उपचारीक शिक्षण हें शाळेतल्यान वा महाविद्यालयांतल्यान मेळटा जाल्यार अनुपचारीक शिक्षण हें जाणट्यां कडल्यान, आमच्या भोवतणच्या घडणुकांतल्यान वा अणभवांतल्यान मेळटा. अनुपचारीक शिक्षण हें बरें आनी वायटय आसपाक शकता. तें फळादीक आसुं येता वा नासूं येता. हाकाच लागून योग्य अशें रीतसर शिक्षण गरजेचें आसा जें आमकां बऱ्या आनी वायटा मदीं अंतर करपाक शिकयता.
विशांत विनायक रावळ
श्रीदोरा काकुलो म्हाविद्यालय, म्हापशें
93221 46441
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
