भांगरभूंय | प्रतिनिधी
मोरपिर्ला मुळावे शाळेचे नवे इमारतीचें उक्तावण
भांगरभूंय । प्रतिनिधी
केपें : शिक्षण हें आपलें सर्वोच्च प्राधान्य आसा. आपल्या मतदारसंघांत शिक्षणीक सुविधांचे उदरगती खातीर आपूण सेगीत वावर करतलों, अशें केपेंचे आमदार एल्टन डिकॉस्टा हांणी सांगलें.
काजूवाडो मोरपिर्ला वाठारांत नवे सरकारी मुळावे शाळेचे इमारतीचें उक्तावण केपे उपरांत आमदार डिकॉस्टा उलयताले. तांच्या व्यक्तीगत निधींतल्यान हो उपक्रम पुराय जाला.
गांवच्या लोकांनी सरकाराक जमीन दान करून लेगीत शाळेची इमारत उबारपाक अपेस आयिल्लें, मात आमदार डिकॉस्टा हांणी पुडाकार घेवन हो उपक्रम येसस्वी केलो. इमारतीच्या उक्तावण सुवाळ्यांत गांवच्या लोकांनी आमदाराचे उपकार मानले तशेंच तांच्या यत्नांचे कवतूक केलें.
कार्यावळीक मोरपिर्लाची सरपंच अश्विनी गांवकार, उपसरपंच प्रकाश वेळीप, पंच नितेश गांवकार, सोनू वेळीप, दत्ता वेळीप, आदले सरपंच मालू वेळीप हाजीर आशिल्ले.
काजूवाडो मोरपिर्ला पंचायत वाठारांतल्या लोकांची खूब तेंपाची मागणी पुराय करपाची संद आपल्याक मेळिल्ले खातीर खोस जाता. खूब वर्सां सावन पालक आपल्या भुरग्यां खातीर शाळेचे नवे इमारतीची वाट पळयताले. हे इमारतीचें उक्तावण करपाचो सन्मान आपल्याक मेळ्ळो हाचीय उमेद जाल्या. ही इमारत आपल्या वैयक्तीक निधींतल्यान बांदल्या खरी, पूण तातूंत गांवच्या सगल्या लोकांचो वांटो आसा, अशें आमदार डिकॉस्टा हांणी सांगलें. ह्या वेळार श्रीकांत गांवकार हांच्या उगडासा खातीर एक मिनीट शांतताय पाळ्ळी. इमारत बांदपांत तांचेंय म्हत्वाचें योगदान आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
