शिक्षणांत आयच्या काळाची गरज

भांगरभूंय | प्रतिनिधी

भुरग्यांचें व्यक्तीमत्व, चरित्र, संवंय आनी भावनीक उदरगत आदीं घडोवपाक म्हत्वाची भुमिका वठयता. शिक्षण फकत शाळांनी आनी वर्गांत मर्यादीत ना, जाल्यार आदीं घरांतल्यान सुरू जाता. जंय पालक हे पयले ‘शिक्षक’ म्हणल्यार ‘गुरू’ आसतात. देखून पालकांची भुमिका, मागर्दर्शन आनी प्रोत्साहान एक बुन्याद तयार करता. पालक दरेका भुरग्याच्या सम्रग विकासाक बळ आनी आदार दिता. पालकांचो भुरग्यांच्या जिविताचेर व्हड प्रभाव आसता. शिक्षक, इश्ट, आनी प्रसार माध्यमां परसय पालकांचो प्रत्यक्ष प्रभाव चड आसता. पालक – शिक्षकांच्या सहकार्याचो भुरग्यांच्या शिक्षणाचेर म्हत्वाचो परिणाम जाता. जेन्ना शिक्षणीक वेवस्था पालकांक शाळेच्या कार्यावळींनी वांटो घेवपाचें आज्ञा दिता. तेन्ना पालकांक चड सोयीचें दिसता. पालक आना शाळा प्रशासनाच्या कामगिरींत चड सुदारणां जावंक शकता. देखून शाळा प्रशासकांनी पालकांक वांटो घेवपाक प्रेरणा दिवची. तेन्नाच शाळेक तिचें ध्येय आनी उद्दीश्ट गांठपाक मजत जातली. शिक्षणांत पालकांनी वांटेकार जाल्यार खूब फायदे आसात. तांचेर आमी आयज उजवाड घालुया.
मुल्ल्यां आनी शिस्त लागता:
शिक्षण म्हणल्यार फकत शिक्षणीक यश्स्वीपण न्हय, तर नैतीक मुल्ल्यां, शिस्त आनी चरित्र विकसीत करप. पालक भुरग्यांक प्रामाणीकपण, वेळ पाळप, जापसालदारकी आनी कश्ट हाचें म्हत्व शिकयतात. घरांत नेम थारावन, जिणेंतल्यो बऱ्यो संवंयो तयार करपाक मजत करतात.
गैरहाजीर रावप उणें जाता
गैरहाजीर रावप हो भुरग्याचो चिंतेंस्त करपी प्रस्न. गैरहाजीरीक लागून भुरग्यांच्या सद्याच्या आनी फुडल्या शिक्षणीक कामगिरीचेर वायट परिणाम जावंक शकता. भुरगीं कितलीं शाळा चुकयतात हाची जाणविकाय पालकांक आसूंक फावो. भुरग्यांचॆ वायट परिणाम पालकांक शिक्षणांत बरे समजतात. शाळेंतल्यान गैर हाजीर रावप आनी तशेंच तांच्या भुरग्यानी कितले दीस शाळा चुकयल्यात? हाचो आंकडोय कळटा. भुरग्याच्या शाळांक भेट दिवपाचो यत्न करपी पालक आपल्या भुरग्याक शिक्षणांत कितलें मोल दितात. तेंय नित्य नेमान परतून- परतून दाखयतात.
जिवीत कसबां शिकोवप
शिक्षणीक मळा भायर वेळ वेवस्थापन, निर्णय घेवप, संवाद सादप, भावनीक बुध्दी अशीं गरजेचीं जिणेचीं बां शिकोवपाक पालकांचीं मुखेल भुमिका आसता. ही कुशळटाय भुरग्यांक जिणेंतली परिस्थिती हाताळपाक आनी स्वतंत्र शिकपी जावंक तयार करता. स्वताचे अभ्यासाक, जापसालदारकी आनी लवचीकपणाक प्रोत्साहान दिवन, तांचे मदीं आत्मविश्वास निर्माण करता. तेच परीं फुडल्या आव्हानां खातीर तांकां तयार करता.
भुरग्यांची वागणूक सुदारता
पालकांची भुरग्यांच्या शिक्षणांत आवड दाखोवन तशेंच आनी तांकां प्रोत्साहन दिवचें. तेन्नाच भुरग्यांचो शाळे विशीं सकारात्मक परिणाम जावंक शकता. तातूंत चड करून भुरग्यां मदली वृत्ती, वर्गांतली वागणूक, प्रेरणा पातळी, गैर हजर रावप ना आनी आत्मसन्मान आदीं गूण वाडीक लागतात.
विमर्शीक विचारांक उर्बा दिवप
पालकांनी भुरग्यांक प्रस्न विचारपाक, नव्या विचारांचो सोद घेवंक आनी विमर्शींक विचारांक उर्बा दिवची. जेन्ना पालक प्रस्नांक जाप दिवन, वेगळ्यां विशयांचेर भासाभास करपाक वेळ दितात. तेन्ना ते आपल्या भुरग्यांची बुध्दीक जिज्ञासा उत्तेजीत करतात. हाका लागून भुरग्यांची संवसाराची समजूत वाडटाच पूण आधुनीक शिक्षणांत म्हत्वाची अशी समस्या सोडोवपाची आनी विश्लेशण करपाकय मजत करता.
शिक्षक आनी शाळांक भुरग्यांच्या कार्यावळीं खातीर पालव दिवप
पालक शिक्षक एकठांय काम केल्यार शिक्षण अदीक प्रभावी जाता. पालकांनी शिक्षकां कडेन नेमान संवाद सादचो, जाका लागून तांकां आपल्या भुरग्यांची प्रगती, तांक आनी सुदारणा करपाची गरज आशिल्ल्या वाठारां विशीं म्हायती मेळटली. पालक- शिक्षक बसकेक हाजीर रावप, शाळेंतल्या कार्यावळींनी वांटो घेवप. आनी शिक्षणीक कार्यावळींनी स्वयंसेवक म्हणून काम करप. हें भुरग्यांच्या. तांच्या पालकांक शिक्षणाक लागून मोल आसा हें दाखयता. शाळेंतल्या विंगड – विंगड कार्यावळींनी चड वांटो घेवंक तांका खात्रेन आवडटलें.
रोल मॉडल जावप
भुरगीं चड करून आवय- बापायचें अनुकरण करतात. जेन्ना पालक शिक्षणाचेर सकारात्मक वृत्ती दाखयतात. – जशें परीं पुस्तकां वाचप, सध्याच्या घडणुकांचेर भासाभास करप वा जिज्ञाना दाखोवप. तेन्ना ते आपल्या भुरग्यां खातीर एक आदर्श पालक थरतात. शिक्षणाक मान दिवपी घरांत, भुरग्यांक मोल दिवपाची प्रेरणा सैमीक रितीन दिता.
शिकपाक प्रेरणा दिवप
भुरग्यांक चड करून पालकांच्या प्रोत्साहांतल्यान प्रेरणा मेळटा. आपल्या भुरग्यांच्या यत्नांची तोखणाय करपी, पालक – परिणाम कितेंय आसूं. आत्मविश्वास आनी आत्मसन्मान तयार करतात. कश्ट वा प्रगतीची तोखणाय करपा सारकिल्ल्या सकारात्मक बळकटीकरणांक लागून भुरग्यांक शिकपाची प्रेरणा उरपाक मजत जाता. उरफाटें सदांच टिका वा तुळा केल्यार तांका ना उमेदी करूं येता. अशे तरेन पालकांच्या प्रोत्साहानांक लागून भुरग्यांचीं आव्हानां आनी जिद्द हांचे विशींची वृत्ती तयार जावंक शकता.
शिक्षणीक प्रगतीचेर नियंत्रण दवरप
पालकांच्या सहभागांक लागून भुरग्यांच्या शिणक्षीक कामगिरीचो, घरपाठ, वर्गपाठ, उपक्रम, स्वाध्याय आनी अभ्याक्रमांच्या भायल्या कार्यावळींचो हिशोब दवरप हांचो आस्पाव जाता. नेमान देख – रेख दवरल्यार भुरगीं संघटीत उरतात. मुजतवाड पाळटात. हेर आवडी वांगडा अभ्यासाचें समतोल दवरतात. स्वाध्याय आनी प्रकल्पांत सक्रीय रुची घेवपी पालक शिक्षण घेवपी पालक शिक्षण ही फकत शाळेची जापसालादारकी न्हय तर एक वांटून घेतिल्ली जापसालदारकी अशें दाखयात.
आयचे शाळेचे प्रस्न
शाळा म्हणल्यार समाजाचो हारसो पूण समाजाक त्रास दिवपी समस्यांक ते आडवाद नात. हालींच्या वर्सांनी समाजीक समस्यांनी व्हड प्रमाणांत वाड जाल्या अमेरिकेंतल्या एका शाळेचें वर्णन करतना ‘द न्यूयॉर्क टायम्स’ बरतात,- “विद्यार्थीं वर्गांत न्हिदतात. विचित्र गजाली बरोवन रंगयल्ल्या शाळेच्या दालनांत, एकामेकांक ते धमकायतात. अभ्यासूं विद्यार्थ्यांक त्रास करतात..सगळ्याच विद्यार्थांक समस्या आसात.”
शाळेंतल्या हिंसाचाराची वाडत आशिल्लीं आंतरराश्ट्रीय समस्या ही खासा पालकां पासत हुस्को करपा सारकी गजाल. आदल्या काळांत केन्ना- केन्नाय झगडीं जातालीं, ना न्हय, पूण तीं चड करून हिंसक नासतालीं. पूण हालींच्या काळांत गोळीबार आनी सुरी हल्लो, हें सामान्यापणान दिसून आयलां. शस्त्रां चड सोंपीं जाल्यांत. मारपेट चड गंभीर जाल्यात आनी भुरगीं सुरवेक आनी व्हान पिरायेचेर सावन हिंसक जावपाक लागल्यात. अर्थांत, दरेका देशांत इतली भिरांकूळ परिस्थिती ना. पूण संवसारांतल्या जायत्या शिक्षकांक जशें ‘ फ्रेंच साप्तकी ल पुवॉ’, ह्या दिसाळ्यान म्हळां, तशींच परिस्थिती सोंसचीं पडटा. “ शिक्षकां विशीं आदर आनी मान उणो जाला, तांकां नांवां पुरतो लेगीत कसलोच अधिकार ना ! ”
सोंपयतना…
शिक्षणांत पालकांची भुमिका घरपाठ करपाक मजत करपा परस, खूब व्हड आसा. पालक आपल्या भुरग्यांच्या बुध्दीक, भावनीक आनी नैतीक उदरगतीची बुन्याद घालतात. सक्रिय वांटो, प्रोत्साहान आनी आदार दिवपी घरगुती वातावरण शिक्षक आनी शाळांच्या यत्नांक पूरक आसात. पालक आनी शिक्षक हातांत हात घालून काम करतात. तेन्ना भुरग्यांक शिक्षणीक यश आनी अर्थपूर्ण जिणें खातीर तयार करपी समग्र शिक्षण मेळटा. निमाणें इतलेंच ‘आवय – बापूय जावप हें एकदां खूब सोंपें आसता. पूण भुरग्यांचो पालक जावप तितलचेंच कठीण आनी आव्हानात्मक आसा.’

विशाल सिनाय खांडेपारकार