शिक्षणांतल्या बदलाक येवकार दिवया

भांगरभूंय | प्रतिनिधी

शिक्षणाचो फोकस हाचें फुडें माध्यमीक, उच्च माध्यमीक, उंचेल्या शिक्षणा कडेन आसतलो हें सरकारान कळीत केलां. कुशळटाय शिक्षण आयटीआयंत हाडपा पासत तयारी जाल्या, फक्त आतां उरल्या उपचारीकता.

उदरगतीच्या मार्गान फुडें वतना बदल आपणावचे पडटात. बदल वेगीं, सवकासायेन जातात. बदलांची, सुदारपाची पद्दत सरकारी आनी खासगी पांवड्या वेली समजून घेवची पडटा, ती समजूनच घेतली ना, अर्दकुटे म्हायतीचेर आमी फुडें वचत रावले, शितां फुडें मीठ खालें जाल्यार बदलूय मोडून पडटात. अशा वेळार सोंशीकसाणेन पावलां मारल्यार फुडारांत आमचें समाजमन बदलतलें, एक नवी आनी बळिश्ट पिळगी घडटली. राष्ट्रीय शिक्षण धोरणाची बांदावळ बदलपी समाजमनाचो अभ्यास करून जाल्या. गोंय सरकारान धोरण चालीक लावपाक पावलां मारपा पासत आदीं तयारी केल्या. भुरगीं, समाजावस्था आनी वातावरणांतले बदल विचारांत घेवन, अभ्यास करून जाल्लें राष्ट्रीय शिक्षण धोरण समाजांत सकारात्मकताय हाडटलें जाल्यार शिक्षणीक वर्सांची दिसपटी बदलता, त्या बदलांक येवकार दिवचो पडटलो.
एके वटेन राष्ट्रीय शिक्षण धोरण चालीक लावपा पासत गोंय सरकारान घेतिल्ले निर्णय, शिक्षण सचीव लोकांक माध्यमां वतीन कळीत करता आसतनाच तीन चार वरां भितर बदलांक विरोध करपी समाजसेवक शिक्षण संचालकां कडेन पावले. कितें केलां वावर ह्या समाजसेवकांनी ? तातूंतले कांय बंदखण भोगिल्ले आसुये? मात्शी चवकशी केल्यार ह्या समाजसेवकांचीं खरी मुखामळां सरकाराक कळटलीं. हालीं गोंयांत समाजसेवकांची पिकावळ वाडल्या, कांय मुळा सावन घट, जाल्यार थोडे अळम्या वरी. शिक्षण संचालकांनी हाचे फुडें सादूर रावन आपल्या कॅबिनांत येवपी आपवावुरपी, समाजसेवकांचे कार्य समजून घेवचें, निवेदनां कचेरेंत दवरपाक लावचीं, कोणाय वांगडा फोटो काडून घेवचे आदीं जांचे वांगडा फोटो काडटात ते कोण हें समजून घेवपाचें पथ्य पाळचें पडटलें. व्हड व्यक्तीमत्वां बराबर फोटो काडून घेवपी, ते सोशल मिडियाचेर घालपी आनी तांचो उपेग करून तोपयो घालपाचो वावर करपी आमचे मदीं आसात. तांकां चार हात पयस दवरपाची शिटकावणी दिवचीच पडटली.
राष्ट्रीय शिक्षण धोरणांतल्या बदलां आड एखाद्रो काँग्रेस पक्ष बोवाळ घालतलो. एनईपी म्हळ्यार शिक्षण हक्क कायद्याचो एक वांटो. जो खासदार कपील सिब्बल केंद्रीय शिक्षण मंत्री आसतना केल्लो. त्या कायद्या प्रमाण सगल्यांक शिक्षण मेळप ही मोख आशिल्ली, कायदो देशांत आनी राज्यांनी मुखार व्हरतना प्युनाचीं भुरगीं दोतोर जाल्यांत, आसचीं ना अशें न्हय. शिक्षण घेतना इबाडिल्लें समाजमन भुरग्यांच्या शिक्षणाचेर परिणाम करता, संस्कृतायेच्यो तिस्त्यो वादऱ्यो जाल्ल्यो पळोवंक मेळटात. उत्कृश्ठताय खूब उण्या भुरग्यांनी दिसता. आई आनी बाबा शिक्षणांतल्यान नोकरी, धंद्या मेरेन पाविल्ल्याचो हो परिणाम न्हय मूं?
संस्कृती शिक्षणांत मनीसधर्म आनी मनशाक सरभोंतवणी जें अरिश्ट दिसता तें सुटावें करपाक आशिल्ल्या उपायांची म्हायती. कोयर आनी उदक वेवस्थापन, आंगाची नितळसाण, भौशीक नितळसाण विशयांचो आस्पाव तातूंत जाता. शिक्षणीक वर्साचे सुरवेक गिमाळो ऋतू सुरू जाता तेन्ना ऋतू, ऋतूमय जिणेशैलीची म्हायती दिवप, खेळ, लागसार भोंवडी हे विद्यार्थ्यांचे विशय आस्पावंक शकतात.
बडी, छडी, पट्टी शाळेंतल्यान भायर भिरकावपाची देख राष्ट्रीय शिक्षण धोरणांतल्यान मेळची. विद्यार्थ्यांक थापट मारचें न्हय, शिक्षा विद्यार्थ्यांक वेगळ्या प्रकारांनी दिवं येता. कवितेच्यो वळी बरोवप, चित्रां काडूंक लावप, पुस्तकांतलो धडो वाचप, सुविचार शंबर वेळा बरोवंक लावप तशेंच हेर उपाय आसात.
पांचवे मेरेनच्या विद्यार्थ्यांक चड सुटी दिवप, सवी ते 12 वी मेरेनच्या विद्यार्थ्यांक चडावत विशयांचे शिक्षण एप्रील म्हयन्यांत दिवप, तांचे खातीर मदलशीच्या खाणाची वेवस्था आदीं नाशिल्लें अशें न्हय पूण ते वेवस्थेक मुखेल प्रवाहांत शिस्तीन हाडप, तातूंत बदल करप हें सक्तीचें जातलें. फाटल्या वर्सा मेरेन तें कंपलसरी नाशिल्लें, आतां तशी सक्ती जातली ती शिक्षणाच्या नव्या वर्सांचो आरंभ करून. पालकांक विस्वासांत घेवन नवें शिक्षण वर्स 1 एप्रील सावन सुरू करप म्हळ्यार एप्रील फूल करप न्हय जाल्यार विद्यार्थ्यांची शिक्षणीक तांक (कॅपेसिटी बिल्डींग) शिक्षण दिवन जावं येता. विद्यार्थ्यांचें पुस्तकी शिक्षण जून म्हयन्यां सावन सुरू जातना तांचीं पुस्तकां, वह्यो आयिल्लीं, विद्यार्थ्यां मेरेन पाविल्लीं आसतलीं.
एप्रील म्हयन्यांत विद्यार्थी, शिक्षकांचो वावर आठवी मेरेन शिबिरां घेवनय जावंक शकता. परिक्षा, पेपर तपासप मार्च म्हयन्याचे 30 तारखे मेरेन जावप, 2025-26 वर्साची दिसपटी नवे पद्दतीन करप, एनईपी पद्दतीचें प्रशिक्षण आदींच दिलां तातूंतल्यान.
शिक्षणाचो फोकस हाचें फुडें माध्यमीक, उच्च माध्यमीक, उंचेल्या शिक्षणा कडेन आसतलो हें सरकारान कळीत केलां. कुशळटाय शिक्षण आयटीआयंत हाडपा पासत तयारी जाल्या, फक्त आतां उरल्या उपचारीकता. नवें शिक्षण वर्स तापमान बदलांत बरें. तापमान बदलता, हुंवार, पावस येता तेन्ना सुटयो दिवपाची गरज आसता मागीर चडावत शिक्षण केन्ना दिवप? एप्रील म्हयन्यात 30 एप्रील मेरेन तो वावर जातलो. धावी बदलता, 12 वीय बदलतली, वेवसाय शिक्षणांत नवें पर्व येतलें. तें कोण आडावंक शकता? तेंपा प्रमाण कुरपणें घालना जाल्यार वेंतांक चुकता थंय वांवांक चुकता अशी अवस्था जातली.
शाळा वेवस्थापनांक वेगळे वटेन आदार दीत शाळांची नितळसाण, सेक्युरीटी, शाळेच्यो नव्यो इमारती बांदप, विद्यार्थ्यांच्या येवपा वचपाची वेवस्था जाता तेन्ना पालकांक लागसरच्या वाठारांतल्यो शाळा आवडटल्यो म्हणून सरकारान शिक्षकांच्यो बदल्यो आतांच करपा खातीर तजवीज केल्या.
जापसालदार पालक, जापसालदार शिक्षक वेवस्थेंतल्यान बरे विद्यार्थी, फुडारांतले देशाचे नागरीक घडटले. सगलेच विद्यार्थी एक्सलंट आसतले अशे न्हय पूण तशें करपा पासत कश्ट घेवप एप्रील म्हयन्यांत शक्य आसा व्हय? हाताचीं पांचूय बोटां एकसारकीं नासतात, एक ल्हान, एक व्हड आसता तेन्ना भुरग्यांक, पालकांक समजावप, आठवे यत्ते सावन कुशळटाय शिक्षण दिवप जालां. भुरग्यांचे कावन्सेलींग एप्रील म्हयन्यांत जातालें आतां तें बेगीन जातलें, पालक कावन्सेलर जातले, पालक आनी शिक्षक मेळून मदलशीचें खाण करतले ही नवीन वेवस्था.
शाळेंतल्या नापास विद्यार्थ्यांक एप्रील म्हयन्यांत परिक्षा घेवन फुडें धुकलपाची वेवस्था जाल्या. भुरगीं नापास जावचीं ना हें धोरण हाचे फुडेंय उरतलें, बदल 2028 सावन जातले अशें चिन्न दिसता. पूर्व माध्यमीक, उच्च माध्यमीक शिक्षकांक कंत्राटी शिक्षण वेवस्थेंतल्यान भायर काडल्यार उत्कृश्ठताय येवपाक कळाव लागचो ना. खासगी शाळांक अनुदान, तांचेर अंकूश दवरप, इन्सपेक्शन जावप हे खातीर मार्गदर्शक मंडळां रिटायर्ड बट नाॅट टायर्ड शिक्षकांचे मजतीन करप, शिक्षण विकास म्हामंडळाच्या रीण, शिश्यवृत्ती येवजण्यांनी उत्कृश्ठतायेंतल्यान घडिल्ल्या, युवा आसतना करोडपती जाल्ल्या विद्यार्थ्यांक गुरुदक्षिणा दिवची म्हणून उलो मारप राष्ट्रीय शिक्षण धोरणाची निती आसची.

सुहासिनी प्रभुगांवकार
9881099260