भांगरभूंय | प्रतिनिधी
नवी शिक्षण प्रणाली म्हणल्यार एनईपी गोंयांत हळू हळू लागू जायत आसा. एनईपी म्हणल्यार कितें हें विशीं जायत्या जाणांक प्रस्न पडला. शिक्षकांनी तांकां जशी ऑर्द येता ते प्रमाण शिकोवपाक सुरवात केल्या. ह्या शिक्षण पद्दतीन पालकांची भुमिका म्हत्वाची आसा अशें म्हणटात. तशें पळोवंक गेल्यार नवी आसूं वा पोरणीं, पालकांची भुमिका सदांच म्हत्वाची आसा आनी आशिल्ली. आतां नव्यांच्या नांवान पालकांक जागृत करपाचो यत्न मात जाता. पयलींय जातालो, पूण तसो फोर्स नाशिल्लो.
मुळाव्या पांवड्यार एनईपी म्हणल्यार हांसत-खेळत शिकप. बरोवपाचेर भर ना, जाल्यार कलागुणांचेर भर. वस्तू वळखप, अणभवप हाचेर भर. माध्यमीक पांवड्यार भुरग्यांची अश्टतासी उदरगत जावपाचेर भर आसतलो. ते उपरांत उंचेल्या
पांवड्यार भुरग्यांक मुक्त शिक्षण म्हणल्यार जाय तें शिक्षण घेवपाचेर भर, अशें आमी म्हणूं येता. आतां मेरेन जें चल्लां तें पळयल्यार अशेंच म्हणूं येता.
नर्सरी ते दुसरी मेरेन भुरग्यांक चडसो खेळ आसतलो. प्ले स्कुला भशेन हें आसतलें. भुरग्यांची स्मरणशक्ती वाडपाचे हे दीस. ह्या वेळार तें जितले समजून घेवंक शकतात, तें फुडाराक उपेगाक येतलें, हाचेर भर आसतलो. तशें पळोवंक गेल्यार पयलीं बालवाडेंतूय अशेंच पद्दतीन शिकयताले. मात, फुडें – फुडें बालवाडीच्यो बाई आनी हेल्परांचेर भुरग्यांच्या पालकांक कड्डन दिवपाची जबाबदारी पडपाक लागली. हेर कामांय लागलीं. शिकोवपा कडेन कांय प्रमाणांत आडनदर जावपाक लागली. 9 ते 12 बालवाडी, त्याच वेळांत पालकांक आपोवन तांकां कड्डन दिवप, तशेंच भुरग्यां खातीर अल्पोपहार करप, हो वेळूय तातूंतच गेलो. शाळेंत शिकयतना चडशे शिक्षक सोंपे पद्दतीन कशें शिकोवंक शकता हाचेर भर दितालेच. आतां तशें नवें म्हणटा तें व्हडलेंशें नासतलें. तरिकूय शिक्षकांक शिकयतना मात्सो अभिनय, आवाजांत मात्सो फरक करून शिकोवप, तशेंच प्रॅक्टिकल पद्दतीन शिकोवचें पडटलें. तशें पळोवंक गेल्यार कांय शिक्षक ही पद्दत आपणायतना दिसताच. ही पद्दत सगल्यांकूच लागू जातली.
माध्यमीक पांवड्यारूय भुरग्यांक शिकप सोंपे जावचें म्हूण यत्न चल्ल्यात. विज्ञान, ईव्हीएस, हिस्ट्री, ज्यॉग्रफी सारकिल्ले विशय कांय भुरग्यांक कठीण वता. तांकां तें समजूंक जाय म्हूण प्रादेशीक भाशेंतूय तातूंतले पाठ्यक्रम आसपाक शकता.
हे सगले प्रक्रियेंत पालकांची भुमिका खुबूच म्हत्वाची आसा. पालकांक भुरग्यां खातीर खासा वेळ काडचो पडटलो. पयलीं तेंपार पालक आपले काम करताले, भुरगीं दुसरे वटेन शिकतालीं. भुरग्यांक अभ्यास केलो? अशें विचारलें काय जालें, अशें आसतालें. आतां तशें चलचें ना. भुरग्यांनी कितें अभ्यास केला. पुस्तकां सारकीं आसात काय ना, तो इस्कोलांतल्या कार्यावळींनी वांटो घेता काय ना? हें सगलें पळोवचें पडटलें. पयलीं भुरग्यांक 60 टक्के पडल्यार तो भुरगो खुबूच हुशार म्हणटाले. आतां 60 टक्के म्हणल्यार ‘ढ’ म्हणटात. कित्याक तर शिक्षणाच्या दर्ज्या बरोबरच चड गूण मेळपाचे प्रमाणूय वाडलां. आतां बोर्डाचे परिक्षेंत 75 टक्क्यां वयर गूण सहज पडटात. हातूंत ‘लूज करेक्शन’ आसूं येता. पूण, भुरगींय हुशार जाल्यांत ही गजाल न्हयकारूं नजं. भुरग्यांक आयज शिकपा खातीर जायतीं साधनां उपलब्ध आसात. गुगल, वेगळेवेगळे अॅप, डिजिटल पुस्तकां आसात. ते भायर 80 टक्क्यां वयर भुरगीं ट्युशनाक वतात. पालकूय आपल्या भुरग्यांच्या शिक्षणा खातीर वेळ दिता. तेन्ना, पालकांनी वेळ दिलो ना जाल्यार भुरग्यांचे गूण आपशींच कमी जातले. 70-75 टक्के गूण तरी पडपाकूच जाय, इतलो काळ बदल्ला.
शिक्षण पद्दतीन आमी 100 गुणांचे वांटे घाल्यार 25 गूण इस्कोलांत शिकतात ते, 25 विद्यार्थी स्वता यत्न करतात ते, 25 पालक आनी ट्युशनाचे धरूं येता, तशेंच 25 गूण भुरग्यांक प्रक्टिकल गिन्यान मेळटलें ते, अशें धरूं येता. नव्या शिक्षण पद्दतीन प्रॅक्टिकल गिन्यानाचेर भर आसतलो. म्हणल्यार पोरणें गोंयचें फेस्त हाचेर पाठ आसल्यार तो कसो आसता तें भुरग्यांनी अणभवूंक जाय. जेन्ना तें भुरगें अणभवतलें, आनी पुस्तकांतल्यो गजाली ताचे कडेन जुळटल्यो तेन्ना तो पाठ ताचे तकलेंत सारको बसतलो. विज्ञानाच्यो गजाली कळपा खातीर त्या – त्या प्रकाराचे प्रयोग करून पळोवचे पडटले. इस्कोलांनी हालीं तेंपार सायन्स एक्झिबिशन जातात, ताचो भुरग्यांक बरो लाव जाल्लो दिसून येता. शाळांनी ‘बाजार डे’ जाता, ताचो भुरग्यांक गणीत शिकपाक मजत जाता.
भुरग्यांचे उदरगती खातीर पालकांक तांच्या शिक्षणा खातीर खंयच्यानूय वेळ काडचोच पडटलो, अशी ही वेवस्था. शिक्षकूय एनईपीची तयारी म्हूण नव्यो गजाली शिकतात. नव्यो गजाली शिकपी शिक्षकांचेर पोरणें वजें मात आसूंक जायना. तांचेर जबाबदारी कितली दिवपाची तेंय सरकारान पळोवंक जाय. वेंचणुकेची ड्युटी म्हण्टा तितले मेरेन बरें आसा. बाकीचीं कामां दितना तांचो वर्कलोड कसो हाताळपाक जाय ताचेरूय विचार करपाक जाय. भुरग्यांक शिकोवपा बरोबरच तांकां तांचीं पुस्तकां, असायनमेंट तपासचे पडटात, तशेंच वेगळ्योवेगळ्यो कार्यावळीय आसतात. तशेंच आतां भुरग्यांक बरें तरेन हाताळपा खातीर तांकां सामकेंच अलर्ट रावचें पडटलें हें वेगळेंच. कितेंय जालें जाल्यार सगलें तांच्याच माथ्यार पडटा. भुरग्यांक हात लावप ना इतले मेरेन गजाल उरूंक ना. वर्गा भायर भुरग्यां मदीं वाद जावपाक जायना, मारपेट जावपा सारकीं प्रकरणां जावपाक जायना, जालींच जाल्यार तांकां परिस्थिती पळोवन मॅडिकल एमर्जन्सी पळोवन निर्णय घेवप, विवेक बुद्धी वापरून फुडले निर्णय घेवप, याद्दीन पालकांक फोन करप असलीं कामांय आतां आसा. तेन्ना सरकारान एनईपी लागू करतनाच जांचें वरवीं लागू करतले, तांचे प्रस्नय सारके हाताळपाक जाय.
अमर पाटील
7507495151
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
