भांगरभूंय | प्रतिनिधी
तिरुअनंतपुरम, खबरां संस्था: एखाद्या शिक्षकान शाळेंत विद्यार्थ्यांचेर केल्ले कारवाये आड गुन्यांव दाखल करचे पयलीं ताची चवकशी करपाक जाय, अशें केरळ उच्च न्यायालयान स्पश्ट केलें. न्यायमूर्ती पी. व्ही. कुन्हिकृष्णन हांणी म्हणलें, दुर्भावना बाळगी नासतना केल्ले शिक्षे खातीर शिक्षकांच्या गुन्यांवकारी प्रकरणा पसून वाटावपाक जाय. न्यायालयान केरळच्या पुलीस महासंचालकांक हे विशीं एक परिपत्रक काडपाचे निर्देश दिले. ते एक म्हयन्यांत लागू करपाचेय आदेश दिले.
कोर्टान म्हणलें, एकाद्या शिक्षकान विद्यार्थ्याक धपको दिलो. तातूंत दुर्भावना नासल्यार तें गुन्यांवाचें प्रकरण थारचें ना. ताका गुन्यांवांचे श्रेणींत उडोवचें न्हय. ना तर शिक्षक आपली जापसालदारकी नीट पार करपाक शकची ना.
विद्यार्थी वा पालकान शिक्षका आड कागाळ दिल्यार पयलीं ह्या प्रकरणाची सारकी चवकशी करची. म्हणल्यार गुन्यांव दाखल करपा खातीर खर आधार आसा काय ना, हें तपासपाक जाय. शिक्षकांक बडी वांगडा बाळगुपाची परवानगी आसची. हाका लागून विद्यार्थ्यां मदीं शिस्त येतली. तशें जरी आसलें तरी बडयेचो सतत वापर योग्य न्हय. शाळेत शिस्त उरची म्हणून बडी पुरो जायना. एका प्रकरणांत विद्यार्थ्याक वेतान बडयिल्ल्याचो आरोप शिक्षकाचेर आशिल्ल्यान ताचेर सुनावणी दितना कोर्टान हे निर्देश दिले. विद्यार्थ्याने अभ्यासा विशीं गंभीर जावचें, असो उद्देश आशिल्लो, अशें त्या शिक्षकान सुनावणेंत सांगलें.
शिक्षकां आड गुन्यांव दाखल करचे पयलीं तपास करप गरजेचें. सध्याच्या काळांत शिक्षकांक विद्यार्थ्यां मदीं शिस्त पाळपांत आडखळी येतात. जायते ते फौजदारी गुन्यांवांच्या भंयान व्रात्य विद्यार्थ्यां आड योग्य पावलां उबारिनात. आवय-बापूय जेन्ना भुरग्यांचें नांव शाळेंत घालतात तेन्ना शिक्षकांक शिस्त आनी मानसीक-शारिरीक उदरगती खातीर गरजेची पावलां उबारपाचें स्वातंत्र्य दितात.
न्यायालयान म्हणलें, भारतीय न्याय संहिता कलम १७३ (३) चो ताबो दिलो. ते प्रमाण ३ वर्सां परस चड, मात ७ वर्सां परस उणी ख्यास्त आशिल्ल्या गुन्यांवांचो मुळावो तपास पुलीस करपाक शकतात. कोर्टान म्हणलें, शिक्षकांच्या प्रकरणांत ही तरतूद लागू जावपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
