भांगरभूंय | प्रतिनिधी
दिलीप बेतकेकार: शिशुवाटिका आचार्य प्रशिक्षण वर्गाच्या जालो समारोप
पणजी: हेर खंयच्याय गजालीं परस शिक्षकांक आवयवरीं काळीज आसप चड म्हत्वाचें. जशी आवय भुरग्यांच्या रडपाचो अर्थ रोखडोच कळटा, तशेंच आदर्श रितीन शिक्षकांक विद्यार्थ्यांक मायेन आनी आपणेपणान समजून घेवपाची संवेदनशीलताय आसूंक जाय, अशें विद्याभारती-गोंयचे मार्गदर्शक आनी देशभर शिक्षणीक मार्गदर्शन करपी विद्याभारतीचे आदले राष्ट्रीय उपाध्यक्ष, शिक्षणतज्ञ दिलीप बेतकेकार हांणी पर्वरी आयोजीत कार्यावळींत सांगलें.
विद्याभारती-गोंयां वतीन फाटल्या 20 वर्सांची परंपरा आशिल्ल्या शिशुवाटिका आचार्य प्रशिक्षण वर्गाच्या समारोपा वेळार पर्वरीच्या सार्थकम सभाघरांत ते उलयताले. ह्या वेळार माचयेर अध्यक्ष डॉ. सीताराम कोरगांवकार, संरक्षक प्राचार्य सुभाष वेलिंगकार, संघटणमंत्री पुरुषोत्तम कामत, मुखेल सोयरे मुकुंदबुवा कंवठणकार आनी राज्य शिशुवाटिका मुखेली अॅड. रोशन सामंत हाजीर आशिल्ले.
शिक्षक हें पद हें पोट भरपा खातीर फकत एक वेवसाय न्हय तर राष्ट्र आनी चरित्र निर्मिती खातीर एक प्रभावी साधन आसा. असो विचार करपी शिक्षकवर्गाची निर्मिती करपाचें विद्याभारती-गोंयचें ध्येय आशिल्ल्यान तांची मुकुंदबुवा कंवठणकार हांणी तोखणाय केली.
ही कार्यावळी दिवली पेटोवन आनी सरस्वती वंदनेन जाली. प्रशिक्षीत शिक्षिकांची प्रात्यक्षिकां जाल्या उपरांत हेर कार्यावळींची सुरवात जाली. प्रास्तावीक आनी वर्गाचो अहवाल अॅड. रोशन सामंत हांणी मांडलो. मानेस्तांची वळख प्रशिक्षणार्थी नेहा कांदोळकार हांणी करून दिली. प्रिती दिवाडकार हांणी प्रात्यक्षीक सत्राचें निवेदन केलें. उपकाराचें उलोवप येसूबाई म्हाकले, वंदना, शांतीमंत्र विदिशा भगत आनी सुत्रसंचालन कविता वेळीप हांणी केलें.
अध्यक्ष डॉ. कोरगांवकार हांणी प्रशिक्षीत शिक्षिकांच्या प्रात्यक्षीक सादरीकरणाची तोखणाय केली आनी तांकां परबीं भेटयलीं.
ह्या 30 दिसांच्या प्रशिक्षणवर्गा खातीर विवीध विशय-मांडणी आनी कृतिसत्रां गोवा बोर्डाचे आदले अध्यक्ष, शिक्षणतज्ज्ञ, प्राचार्य पांडुरंग नाडकर्णी, डॉ. पल्लवी धाकणे, वैद्य स्वाती अणवेकार, वनीता सामंत, प्राचार्य गजानन मांद्रेंकार, प्राचार्य दिपक आमोणकार, सुखदा पित्रे, अपर्णा खेडेकार, उदय सामंत, मोहन खवणेकार, उमेश महालकार, ज्योती कोरगांवकार, संगम चोडणकार हांणी प्रशिक्षक म्हणून घेतलीं.
ह्या वर्गांत विद्यारंभ संस्कार आनी भारतीय पद्धतीन वाडदिसाचीं प्रात्यक्षिकांय घेतलीं.
उत्तरा लोटलीकार, ऊर्विजा नायक, अमृता सातवळेंकार, अपर्णा कामत, दर्शनी नायक, स्मिता परब, संजवी उसपकार, स्मिता सोनार, पुजा राणे, स्मिता च्यारी, प्राची देसाय, राजरानी पागी, शुभदा कुलकर्णी, श्वेता केरकार, प्राची शिंदोळकार, अतुला बेळेकार, संघटक लेखिता च्यारी हांणीय विवीध सत्रां घेतलीं. वट्ट 35 प्रशिक्षणार्थींनी कोर्स पुराय केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
