शिकोवप ही कुशळटाय, समजून घेवंक जाय

भांगरभूंय | प्रतिनिधी

भुरग्यांक शिक्षीत करपाचो हो वावर शिक्षकांच्या भुजार आशिल्ल्यान तांचेय भितर ज्ञान आनी कुशळटाय आसप गरजेची थारता.

आमी जाणां त्या प्रमाण उपनिशद काळा सावन शिक्षकांक खास दर्जो मेळिल्लो आसा. तांकां आपलो गुरू मानून समाजांत मानाची सुवात दिल्ली आयजवेर पळोवंक मेळटा. तांच्यात आशिल्ल्या शिकपी भुरग्यांक समजावपाच्या गुणांक लागून तशेंच विद्यार्थ्या मदीं सक्रीय जावन ते करीत आयिल्ल्या वावराक लागून तांकां हो खाशेलो मान मेळिल्लो आसा, अशें म्हाका तरी आज वेर दिसत आयलां. आपल्या विद्यार्थ्यांक काळखांतल्यान उजवाडा कडेन व्हरपाची तांक तांचे मदीं आसता होवूय एक शिक्षकांचो खाशेलो गूण. एका वेळार शिक्षक हो बऱ्या गुणांचो तसोच ज्ञानाचो झरो आनी तो आध्यात्माची दिशा दाखोवची तांक दवरता असो समज पुराय मनीस समाज मनांत बाळगून जियेताले. घडये हाकाच लागून शिक्षकांची नियुक्ती लेगीत जुस्ता जुस्त मेजून मापून करताले. ते शिकपी भुरग्यांच्या गिन्यानांत भर घालचे खातीर भरपूर तकलास घेताले आतांय घेतात हातूंत दुबाव ना. शिकपी भुरग्यां भितर सकारात्मक बदल घडोवन हाडपाचें काम एका शिक्षकाक करचे आसता आनी म्हणून ताका प्रशिक्षण दिवन सक्षम करप हाची आदींय गरज आशिल्ली आनी आतांय आसा.
राष्ट्रीय अध्यापक शिक्षण मंडळ (National Council for Teacher Education) ही संस्था शिक्षकांक मुळावे शाळे पसून उच्च शिक्षणा मेरेन शिकोवचे पासत शिक्षण, संशोधन आनी प्रशिक्षण दिवची वेवस्था करता. ह्या शिक्षणा वरवीं दरेक शिक्षक आपली जापसालदारकी समजून घेवन शिक्षण क्षेत्रांत येता ते परिस्थितींत आव्हानां पेलूंक सक्षम जावंक पावतात आनी आपली लागणूक बरे तरेन चालीक लावंक शकतात. खरें म्हणशात तर शिकप ही दरेक मनशाचे जिणेंत सातत्यान चलत रावपी एक म्हत्वपूर्ण क्रिया जावन आसा. औपचारीक शिकप जरी भुरगेपणार सुरू जाता तरी मनीस पुराय जिवीत आपल्या अणभवांतल्यान कितें ना कितें शिकत आसता. चींतन मनन करीत जाल्यार शिकोवप ही एक कुशळटाय म्हूण नदरेक पडले बगर कशेंच रावचें ना. तेच प्रमाण शिक्षण हो विशय एक शास्त्राचो भाग लेगीत जावन आसा. हाकाच लागून शिक्षकांक फक्त गिन्यान प्राप्त करचें नासता तर तांकां ह्या वेवसायांतल्यो बऱ्यो वायट गजालीय जाणून घेवच्यो आसतात.
बदलत्या काळा प्रमाण शिक्षणाच्या मळार लेगीत बदल गरजेचे आशिल्ल्यान नवीन शिक्षण पद्दत लागू करपाची गरज आसता. त्या त्या पद्दती प्रमाण शिक्षकांक लेगीत प्रशिक्षण दिवन सक्षम पिळगी घडोवचे पासत वावुरचें आसता. नवी आवतां आनी यंत्रां तशीच समाजीक माध्यमां आनी नवीन नवीन साहित्य प्रकार आयच्या शिकपी भुरग्यांक अणभवूंक मेळिल्ल्यान शिक्षकांची आव्हानांय वाडूंक लागल्यांत. हाचेर बरे पैकीं उपाय म्हणल्यार शिक्षकांक सातत्यान प्रशिक्षण दिवप. शिक्षकांनीय आपलो दर्जो उंचावचे खातीर फावो तशे यत्न करूंक फाटीं रावचें न्हय.
भुरग्यांक शिक्षीत करपाचो हो वावर शिक्षकांच्या भुजार आशिल्ल्यान तांचेय भितर ज्ञान आनी कुशळटाय आसप गरजेची थारता. जाचो उपेग करून एक शिक्षक आपल्या विद्यार्थ्यां भितर शिक्षणाची आवड निर्माण करूंक शकता. तेचपरी भुरग्यांची शिकपाची तांक वाडोवपाचीय जापसालकी शिक्षकान आपल्या आंगार घेवची आसता अशा वेळार राष्ट्रीय अभ्यासक्रम रचना (National Curriculum Framework) ही संस्था फुडाकार घेता. ही संस्था शिक्षकां मुखार खूब उद्दिश्टां दवरता आनी तीं पुराय करून घेवचे खातीर प्रशिक्षण लेगीत दिता. तेच परी ही NCF संस्था शिक्षकां कडल्यान बऱ्योच अपेक्षा बाळगिता. हो हेत सफळ करून घेवचे खातीर खूब कश्ट घेतात. कांय प्रमाणांत ही पद्दत शिक्षकांचेर तशेंच शिकपी भुरग्यांचेर चेपण हाडटा अशें शिक्षण तज्ञांचे मत जावन आसा. गिन्यान हें मेळोवंकूच जाय आनी तें पाठ्य पुस्ताकाच्या आदारानच घेवं येता हे चुकीचे समजणीक लागून शिकपी भुरग्यांचेर बरेंच चेपण येतालें. गिन्यान म्हणटा तें खोलायेन विचार करून अभ्यास करून मेळोवपाचें आसता. तशेंच ते सातत्यान मेळत रावपाची एक प्रकारची क्रियाच म्हणपाक शकतात.
NCF संस्था म्हणटा त्या प्रमाण शिक्षकान भुरग्यांचें शिकप सरळ आनी सोंपें करपा खातीर यत्न करचे. भुरग्यांनी ज्ञान स्वता मेळोवचे खातीर शिक्षकांनी तांकां मजत करची. म्हायती दिवपाचो वावर केन्नाच करचो न्हय. हाचोच अर्थ तांचे मार्गदर्शक जावचे आनी तांकां सरळ मार्ग दाखोवचो. नवे पद्दती प्रमाण हो उणाव पयस जातलो अशी आस्त बाळगूंक कांय हरकत ना.
हालींसरा शिक्षकांक एक भंय सतावंक लागला तो म्हणल्यार शिक्षक पात्रता परिक्षा (टीईटी). ही परिक्षा सगल्या शिक्षकांक लागू जातली काय आरटीई कायदो चालीक लागले उपरांतच्या शिक्षकांकूच लागू जातली. अजून ह्या प्रस्नाची जाप शिक्षकांक मेळूंक नाशिल्ल्यान वावड्योच कानार पडूंक लागल्यात. सरकारान धा वर्सां वयर पुराय केल्यांत तांकां टीईटीची सक्ती करूंक फावना. हाचें कारण म्हणल्यार ह्या शिक्षकांक मेळटा तो अणभव आनी ताचे जोडीक तांकां सातत्यान मेळिल्लें प्रशिक्षण ही दोन कारणां तांची कुशळटाय उबारूंक आदार दितात. हालींच वाचनात आयिल्ले प्रमाण शिक्षक पात्रता परिक्षा विशयाचेर शिक्षण खातें एडवोकेट जनरल हांचे कडल्यान कायदेशीर सल्लो घेवन ह्या प्रस्नाचें निवरण करपाचे आसात. हाचें आनीक एक कारण म्हणल्यार शिक्षक नियुक्ती करपाच्यो अटी आनी सर्वोच्च न्यायालयाचो निवाडो हो कायद्याक धरून आशिल्ल्यान शिक्षण खातें हाचेर निर्णय घेवंक शकना. तरी पूण गोंयच्या शिकपी भुरग्यांचे आनी शिक्षकांचे हीत मतींत दवरून शिक्षण खातें बरो आनी खरो न्याय दिवंक शकतलें अशी आस्त शिक्षणीक मळार वावुरपी दवरून आसात इतलें मात खरें.

एच. मनोज
9822441417