शिंयाळ्यां वातावरणाक लागून अंदूं आंबे, काजीचो बरो हंगाम

भांगरभूंय | प्रतिनिधी

शेतकी संचालक संदीप फळदेसाय हांची म्हायती

पणजीः कुलकुल्याची शीं आंबे आनी काजी खातीर वरदान थारल्या. पावसाक लागून आंब्याच्या हंगामाक कळाव जावपाचो आसलो तरी तो कळाव ह्या शिंयाळ्यां वातावरणान भरून काडला. आंबे आनी काजींक व्हड प्रमाणांत तंवर फुटला. देखून मार्च-एप्रील ह्या काळांत अंदूं आंबे बाजारांत पळोवंक मेळटले. जर ही स्थिती अशीच उरिल्ली आसत जाल्यार शिंया वांगडा दव पडपाक जायना, अशें शेतकी खात्याचे संचालक संदीप फळदेसाय हांणी सांगलें.

जेन्ना शीं खूब पडटा आनी सेगीत पडटा तेन्ना काजी, आंबो आनी पणस हांकां तंवर एकदम बरो येता आनी हाका लागून पिकूय बरें येता अशें फळदेसाय हांणी सांगलें.

अंदूंचें शिंयाळें वातावरण सामकें अनुकूल आसा. खासा करून आंबो आनी काजी खातीर. खूबशे कडेन आंब्याक बरो तंवर आयला, तशेंच काजीचो तंवर फुलपाक सुरवात जाल्या. पूण ह्या शिंया वांगडा दव पडपाक जायना. दव जर पडत जाल्यार दवा बराबर किडी लागपाचो प्रदुर्भाव वाडटा आनी पिकाचें लुकसाण जाता. हो कुलकुलो थोड्या दिसांनी उणो जायत वयतलो. देखून हें शीं फुडले 15 ते 20 दीस बरें पडत जाल्यार स्थिती चड बरी आसतली अशी म्हायती फळदेसाय हांणी दिली.

अंदूं उसरां मेरेन पडिल्ल्या पावसांक लागून तंवर उसरां फुट्टलो अशें दिसतालें. पूण ह्या शिंयाक लागून तंवर येवपाक बेगीन सुरवात जाल्या आनी पिकावळ लेगीत बेगीन तयार जातली. खंयच्याय फळाक खास करून आंबो जेन्ना पयलीं लागता तेन्ना ताका दर बरो मेळटा. जर उसरां तंवर येवन आंबे उसरां लागत जाल्यार ताचे दर देंवतात आनी तो पावसांत कुसपाची शक्यताय आसता. पूण अंदूं डिसेंबरांतच व्हड प्रमाणात तंवर आयिल्लो आसा आनी ह्या हिशोबान सादारण मार्च म्हयन्याच्या शेवटावक वा एप्रीलाचे सुरवेक व्हड प्रमाणांत आंबे बाजारांत येवपाक शकतात अशें फळदेसाय हांणी म्हणलें.