शिंयाळो बरो तितलो वायटूय

भांगरभूंय | प्रतिनिधी

कुडीक उबदारपण येवपाक, रोगप्रतिकार शक्त वाडपाक व्यायाम, योग बरो.

सध्या गोंयांत कुलकुल्याचे थंडेचो मोसम चलता. सूर्य अस्ताक गेलो काय थंडी (शीं) आपलें रुप दाखोवपाक सुरवात करता. शितळ वारो आंगाक शिरशिरी हाडटा. धवो फुल्ल दंव सगल्या वातावरणांत पातळटा. मनशाक मनीस दिसना. गाडयेक गाडी दिसना. ह्या वेळार अपघात जावं शकता. ताका लागून उजवाड आसतनाच गाडयांक लायटी पेटोवच्यो पडटात. हालीं सुर्यूय सकाळीं सात वरांचेर उदेंता. फाटले कांय दीस गर्मी जाताली. मात आतां परतून थडी पडपाक लागल्या. सगले जाण स्वेटर, कानटोपी, जॅकिटा घालून फिरतना दिसतात. न्हिदनाय कांय जाण हातमोजे, पांयमोजे घालतात. 

शिंयाचे दीस म्हणल्यार व्यायामाचे दीस. सकाळीं उठून शांत वातावरण व्यायाम करप बरें. सगल्यांनी अर्द वर तरी व्यायाम करपाक जाय. सकाळीं कोणाची गडबड गोंदळ नासता. वारो मनाक धादोसकाय दिता. सकाळीं चलप भलायकेक बरें. येरादारी कमी आसता. सुकणी, गोरवां सोडून सगलो सैम न्हिदिल्लो आसता. मनाक उमेद येता. उर्जा वाडटा. फ्रेश दिसता. मागीर दिसूय बरो वता.

जर भायर वचप शक्य ना जाल्यार घरांतूच, बाल्कनींत, आंगणांत व्यायाम करप बरें. योगासन, प्राणायाम, सुर्यनमस्कार, कपालभाती, अनुलोम विलोम हे व्यायाम करूं शकतात. कुडीक उबदारपण येवपाक, रोगप्रतिकार शक्त वाडपाक व्यायाम, योग बरो. थंड हवामानांत चड खर शारिरीक श्रम करतना खबरदारी घेवंक जाय. चड प्रमाणांत व्यायाम करप ना. काळजाचेर ताण पडूं येता. 

ह्या दिसांनी वातदोश वाडटा. घाम येता. थोड्यांक थंडी, खोंकली येता. जोरुय येता. हाचेर बरो उपाय म्हणल्यार आलें घालून च्या, तुळ, गंजन, वटेलांव घालून कसाय करप. ताचे पसून शीं पयस जाताच, पूण भलायकीय बरी उरता. गरम तेलाचे दोन थेंबे नाकात घालप बरें. हळद घालून गरम दूद पिवपाक जाय. शिंयाच्या दिसांनी च्या, काॅफी पिवप कमी करूंक जाय. काॅफयेंतल्या कॅफिनाक लागून कुडींतलें उदक उणें जाता. कात खरखरीत जाता. हेल्थ ड्रिंक, गाजर, बीटाचें सूप घेवप बरें.  कच्चें सालाद, थंड फळां खावंक जायना. फ्रिजांतलें उदक पियेवंक जायना. 

ह्या दिसांनी गरमागरम भाजी, खिचडी, दलिया, पचपाक सोंपे ते खावप. थंड पेय, आयसक्रिम खावप ना. तेलकट सामोसे, वडापाव, भजीं खावप ना. पोटांत जळजळटा. शिंयाळो रुतू बरो तितलोच वायटूय, हें मतींत धरचें.

– सिद्धी तिळवे