शिंयाच्या दिसांनी भुरग्यांची जतनाय घेयात….

भांगरभूंय | प्रतिनिधी

शिंयाच्या दिसांनी भुरग्यांक थंडी आनी खोंकलेचें दुयेंस जाता, कारण थंड आनी सुके हवेंत व्हायरस चड काळ तिगून उरता. भुरगीं चड करुन घरांत रावतात, जाका लागून संसर्ग बेगीन पातळूंक शकता. ह्यो संवयीं भुरग्यांक निरोगी दवरपाक शकता….

नितळसाण नित्यनेम
शाळेंतल्यान आयले उपरांत, संडासा उपरांत आनी जेवचे पयलीं भुरग्यांक हात धुवपाची संवय लायात. हात धुतना सॅनिटायझर वापरपा परस शाबन लावन हात धुवप बरें. खोंकली वा शिंकतना तोंडार हात धरप आनी तो हात दोळ्यांक वा नाकाक लावचो न्हय. घरांत बऱ्या वासा बरोबर ताजी हवा येवची म्हूण सकाळीं 10 मिनटां घराचीं जनेलां उक्तीं करचीं.

नाकाची जतनाय
शाळेंत वच्चें पयलीं आनी न्हिदेच्या आदीं 0.65% सलायन नोज स्प्रे दिवचो. हाका लागून नाकाक ओलसाण उरता आनी कफ निवळ जाता. 6 वर्सां वयल्ल्या भुरग्यांक 3-5 मिनटां वाफ दिवंक मेळटा.

न्हीद – सायलेंट इम्युन बूस्टर
3-5 वर्सां पिरायेच्या भुरग्यांक 10-13 वरां, 6-12 वर्सां पिरायेच्या भुरग्यांक 9-12 वरां आनी किशोरवयीन भुरग्यांक 8-10 वरां न्हीद गरजेची. न्हिदेच्या 20-30 मिनटां आदीं स्क्रीन (मोबायल फोन, टिव्ही, संगणक) बंद करात.

अन्न
दर जेवणांत प्रथिनां, रंगीत भाजयो आनी गरम द्रव पदार्थ आस्पावीत करात. प्रथिनां खातीर तांतयां, पनीर आनी धंय दिवचें. व्हिटॅमिन सी खातीर दर दिसा पेरां, आवळो, संत्रां, टमाट हांचो आस्पाव करचो. झिंक खातीर भाजलेले हरभरे, भोपळ्याचीं बियां, तांतयां आनी दाळ दिवचीं. प्रोबायोटीक खातीर ताजें धंय वा ताक दिवचें. गरम सूप, लिंबू-आलें आनी तुळसीचो काडो भुरग्यांकय दिवचो. भुरगीं शिंयाच्या दिसांनी उदक उणें पियेतात, देखून उदकाचें वेळापत्रक करचें.

खेळप
दर दिसा 30-45 मिनटां खेळचें. घरा भायर खेळांत, इनडोअर खेळ, स्किपिंग, योगा हांचो आस्पाव करता. घाम येता तेन्ना थंडसाण येतली अशे कपडे घालप टाळचें.