भांगरभूंय | प्रतिनिधी
उण्यांत उणें तापमान 19 अंशा सकयल
भांगरभूंय । प्रतिनिधी
पणजी : पूर्वे कडल्यान येवपी वाऱ्याक लागून राज्यांत कुडकुड्याचें शीं पडटा. उण्यांत उणें तापमान 19 अंशा सकयल देंवप चालूच आसा. आयतारा मुरगांवचे उण्यांत उणें तापमान 18.6 अंश जाल्यार पणजेचें उण्यांत उणें तापमान 19 अंशा मेरेन सकयल देंविल्लें.
काणकोण, सांगें, वाळपय, पेडणें ह्या वाठारांनी उण्यांत उणें तापमान 18 अंशा परस सकयल येता. फुडलें सप्तकभर उण्यांत उणें तापमान 19 अंशा मेरेन सकयल देंवतलें, असो पणजी वेधशाळेचो अदमास आसा. हाका लागून सगल्या वाठारांनी कुडकुड्याचें शीं पडटलें.
अंदूं पावस जसो उसरां मेरेन पडलो तशेंच शीं लेगीत उसरां सुरू जालें. दिवाळेक शीं पडटा. अंदूं मात दिवाळे कडेन शीं नाशिल्लेंच. डिसेंबर येतकच तापमान देंवपाक लागलें. फाटल्या सप्तका सावन रातचें तापमान 18 ते 19 अंशा मदीं आसता. हाका लागून शीं चड जाणवता. गोंयांत वाऱ्याक लागून शीं पडटा. उत्तर भारत गोठेले उपरांत गोंयांत शीं पडपाक सुरवात जाता. आयतारा दनपारां लेगीत शीं जाणवतालें. रातचो दव लेगीत पडपाक सुरवात जाल्या. सांजेचीं 6 उपरांत आनी सकाळीं 9 पयलीं स्वेटर वा कानतोपी घाली नासतना दुचाकी चलोवप अशक्य जाता. सकाळच्या वेळार धुकें लेगीत आसता. हाका लागून गाडयो चलयतना आडखळ जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
