भांगरभूंय | प्रतिनिधी
चिंतन – 92
सिंपिलें तें रोंप वरीवरी बरें ।
वाळलिया पुरे कोंभ नये ॥
संत तुकाराम महाराजांचीं हीं उतरां सामकीं सादीं, पूण तांचो अर्थ खूब खोल आसा. रोंप पाचवें आनी जिवें आसल्यार दर दिसा थोडें उदक दिल्यार तें वाडटा, फुलता. पूण एकदां तेंच रोंपटें सुकलें म्हणटकच कितलेंय उदक घालें तरी ताका नवी आंकरी फुटची ना.
ही काणी फकत झाडांची न्हय — आमच्या नात्यांची, अभ्यासाची आनी जिविताची.
एक शिक्षक आपल्या भुरग्यांक सांगतालो —
“भुरग्यांनो, निमाण्या खिणाक अभ्यास केल्यार कांयच फायदो ना, दर दिसा थोडें शिकत रावल्यार याद उरता.”
रोपट्याक दर दिसा उदकाची गरज आसता आनी मनाकय दर दिसा थोडी प्रेरणा, मोग आनी यत्न जाय पडटात. सामकी शेवटाक धडपड करून कांयच फायदो ना — हे म्हणल्यार सुक्या झाडाक उदक दिवपा सारकें. नात्यांकय हेंच लागू जाता.
एखादें नातें— आवय-बापूय आनी भुरग्यांचें, घोव- बायल वा इश्टां मदलें — दर दिसा थोडें लक्ष, थोडो मोग आनी थोडें आयकप हांचेर जियेता. पूण आमी जायते फावटीं विचार करतात, “ताका आनीक कितें सांगचें, तो आमचोच.” अशे म्हणीत आमी ताचे कडेन मात्शी आडनदर करतात. मागीर एक दीस तो मनीस मनांत नाउमेद जाता. मागीर आमी कितलोय मोग दाखयलो तरी उशीर जाल्लो आसता.
तुकाराम महाराज म्हणटात —
“वाळलिया पुरे कौंभ नये” — एकदां नातें सुकलें म्हणटकच तें परत कोमेना.
उस्ताद रशीद खान हांचीं गितां आयकप म्हणल्यार स्वर्गीय आनंद. तांची मैफल रंगली ना, अशें केन्नाच जावंक ना. रंगदेवता सदांच तांचेर प्रसन्न आसताली. तांकां हें कशें साध्य जालें? तांची दिसपट्टो रियाज केन्नाच चुकलो ना, हेंच ताचें गुपीत.
आमींय तशेंच करूंया — .
आमच्या नात्याचेर, सपनांचेर आनी स्वताच्या मनाचेर दर दिसा मोगाचें आनी यत्नाचें थोडें उदक घालूया.
आमकां व्हडलें कितें करपाचें ना, पूण दर दिसा थोडें थोडें शिंपत रावपाचें.
कारण तुकाराम महाराज म्हणटात —
“जिवें आसतना शिंपात; सुक्या जमनीचेर उदक ओतल्यार कांयच फायदो ना.”
चलात, आयच्यान थारावया — आमच्या नात्यांचीं, सपनांचीं आनी काळजांची रोपां जिवीं दवरपा खातीर दर दिसा ल्हान ल्हान यत्नांचें उदक घालीत रावपाचें.
– हभप देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
