भांगरभूंय | प्रतिनिधी
-ईडीची कारवाय, केनियन बायलांची सुटका, दलालाक अटक
पणजी: केनियांतल्या चलयांक गोंयांत हाडून हॉटेल उद्देगांत नोकरी दिवपाचें हांयस दाखोवन जबरदस्तीन शिंदळकी वेवसायांत धुकलपी आंतरराष्ट्रीय टोळयेचें रॅकेट हणजूण पुलिसांनी उक्ताडार हाडलें. ह्या प्रकरणांत ऑनलायन पद्दतीन क्युआर कोड वरवीं वेव्हार चलताले. हातूंत हवाला वरवीं मोट्या प्रमाणांत मनी लॉड्रींग जाताले, अशी म्हायती मेळ्ळ्या. हाची दखल घेवन अंमलबजावणी संचालनालयान (ईडी) चौकशी करून 9 डिसेंबराक दिल्ली विमानतळा वयल्यान केनियांत पळून वचपाचे तयारेंत आशिल्ल्या न्यूटन किमानी (24) ह्या केनियन नागरिकाक अटक केल्या. अटक केल्ल्या दुबाविताक 15 डिसेंबर मेरेन न्यायालयान ईडी कोठयेंत दवरपाचो आदेश दिला.
मेळिल्ले म्हायती प्रमाण, एका 22 वर्सां पिरायेच्या केनियन बायलेन 7 सप्टेंबर 2023 दिसा दुबाविताच्या तावडेंतल्यान सुटका करून एका बिगर सरकारी संस्थेच्या मजतीन हणजूण पुलिशेंत कागाळ दाखल केल्ली. ते प्रमाण, तिका दुबावीत विल्किस्टा हिणें मूळ देशांतल्यान बऱ्या पगाराची हॉटेल उद्देगांत नोकरी दिवपाचें हांयस दाखोवन गोंयांत हाडिल्ले. ते खातीर दुबावितांनी तांचो प्रवास खर्च स्वता केल्लो.
गोंयांत पावले उपरांत दुबावीत मारिया डोर्कास उर्फ इस्त्रालीट हिणें पिडीत तरणाटेचो पासपोर्ट ताब्यांत घेतलो आनी तिका शिंदळकी वेवसाय करपाक भाग पाडले. ते बदल्यात तांकां मोबदलोय दिनासले. तशेंच तिका गोंयां सयत बंगळुरू वाठारांत शिंदळकी वेवसाय करपाक भाग पाडिल्ल्याचे म्हणलां.
हाची दखल घेवन हणजूण पुलीस निरिक्षक प्रशल नायक देसाय हांणी 8 सप्टेंबर 2023 दिसा तिणें सांगिल्ल्या वागातोरांतल्या रिसॉर्टाचेर धाड घालून 6 केनियन बायलांची सुटका केली. ह्या प्रकरणांत पुलिसांनी मारिया डोर्कास उर्फ इस्रालीट आनी विल्किस्टा आचिस्टा ह्या केनियन बायलां दलालांक अटक केल्या.
ह्या प्रकरणांतलो मुख्य दुबावीत दलाल अोल्नपा (नायजेरियन) हाका पळपाक मजत करपी चार्ल्स एहून (32) ह्या नायजेरियन नागरिकांक हणजूण पुलिसांनी बंगळुरूं वचून अटक केली. हातूंतलो चार्ल्स एहून हाची न्यायालयान जामिनाचेर सुटका केल्या. जाल्यार दुबावीत मारिया डोर्कास उर्फ इस्त्राली आनी विल्किस्टा आचिस्टा ह्या दोगां बायलांक न्यायालयान न्यायालयीन कोठयेंत दवरल्या.
ह्या प्रकरणांत व्हड आंतरराष्ट्रीय रॅकेट आशिल्ल्याचे मुखार आयला. तशेंच ऑनलायन पद्दतीन क्युआर कोड वरवीं वेव्हार जायत आशिल्ल्याचे आनी हातूंत हवाला वरवीं मोट्या प्रमाणांत मनी लॉड्रींग जायत आशिल्ल्याचे उक्तें जालां.
हाची दखल घेवन ईडीन चौकशी सुरू केल्या. ‘मसाज रिपब्लीक’ ह्या डेटींग संकेतथळा वयल्यान पिडेस्त बायलांचो प्रोफायल तयार करपाचें प्रकरण उक्ताडार आयलें. तशेंच पयशांचे वेव्हार ‘एमपैसा ऍप’ वयल्यान क्युआर कोडच्या माध्यमांतल्यान जाताले.
संबंदींत रक्कम हवाला वरवीं तशेंच हेर माध्यमांतल्यान विदेशांत धाडटाले. ईडीन गोंयांतल्या शिंदळकी वेवसाय संदर्भांत वेव्हार हाताळपी न्युटन मुथुरी किमानी (24) ह्या केनियन नागरिकाक 9 डिसेंबराक दिल्ली विमानतळा वयल्यान अटक केल्या.
तशेंच रिसॉर्टाचेर ईडीन धाड घालून म्हत्वाचे दस्तावेज इल्कोट्रीन यंत्रणा जप्त केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
