भांगरभूंय | प्रतिनिधी
पाकिस्तानाचो अणभवी फास्ट बॉलर शाहीन शाह आफ्रिदीन सध्या संवसारीक क्रिकेट सर्तीची नेटान तयारी सुरू केल्या. इंग्लंडांत चालू आशिल्ले टी-20 ब्लास्टरांत ताणें आपले बॉलिंगे नेटार प्रतिस्पर्धी पंगडाच्या बॅट्समनांक घाम काडला. ट्रॅट ब्रिज मैदानाचेर वॉर्विकशायरा आड नॉटिंगहॅमशायरा वतीन खेळटना ताणें पयलेच ओव्हरींत खेळाचो मार्ग निश्चीत केलो. आतां पयले ओव्हरींत मेडन सयत चार विकेटी घेवपी आफ्रिदी टी-20 मॅचीच्या इतिहासांतलो पयलो बॉलर थारलो.
23 वर्सां पिरायेच्या दावखुऱ्या आफ्रिदीन दुसऱ्या डावाचे पयलेच ओव्हरींत ओपनर अॅलेक्स डॅव्हिसाक लेग ब्रेकिंग यॉर्कराचेर बाद केलो. फुडल्या बॉलाचेर क्रिस बेंजामिनाक शुन्याचेर तंबूंत धाडलो. ताका ताणें बोल्ड केलो. फुडल्या दोन बॉलांचेर बॅट्समनांनी एकोड्यो धांवड्यो केल्यो. पूण, पांचव्या आनी सव्या बॉलाचेर ताणें परतून विकेटी घेतल्यो. पयलीं डॉन मुसले हाणें कव्हर्सांत उब्या आशिल्ल्या ऑली स्टोनाच्या हातांत कॅच दिली. ते उपरांत एड बर्नार्ड बोल्ड जालो.
आफ्रिदीन उत्कृश्ट प्रदर्शन करून लेगीत ताच्या पंगडाक हार घेवची पडली. नॉटिंगहॅमशायरान निर्धारीत 20 ओव्हरींनी 168 धांवड्यो केल्यो. लिंडन जेम्स आनी जो क्लार्क हांणी वळेरेन 37 आनी 26 धांवड्यो केल्यो. वॉर्विकशायरा वतीन हसन अली आनी जेक लिंटॉट हांणी दरेकी 3, जाल्यार ग्लेन मॅक्सवेलान 2 विकेटी घेतल्यो. 169 धांवड्यांचो फाटलाव करपी वॉर्विकशायरान 2 विकेटी राखून जैत मेळयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
