भांगरभूंय | प्रतिनिधी
फुडल्या म्हयन्यांत ऑस्ट्रेलियेंत जावपी संवसारीक टी-20 सर्ती खातीर पाकिस्तानाच्या पंगडाची घोशणा जाली. फास्ट बॉलर शाहीन शाह आफ्रिदीचें पुनरागमन जालां. जाल्यार जखमी फखर जमांक 15 वांगड्यांच्या पंगडांतल्यान भायर दवरला. पूण, ताका राखीव खेळगड्याच्या रुपान पंगडा वांगडा दवरला. ताच्या धोंपराक दुखापत जाल्या. हैदर अली आनी शान मसूद हांची निवड जाल्या. मोहम्मद वासिम ज्युनियराचें पुनरागमन जालां.
बाबर आजम मुखेली आसतलो. जाल्यार शाबाद खान उप मुखेली आसतलो. संवसारीक सर्तीक 18 ऑक्टोबरा पसून सुरवात जातली.
फास्ट बॉलर शाहीन आफ्रिदीक दुखापतीक लागून हालींच सोंपिल्ली आशिया करंड क्रिकेट सर्त चुकिल्ली. आशिया सर्त सुरू जावपाक एक दीस बाकी आसतना जखमी जाल्लो.
आशिया करंड सर्तींत पाकिस्तान उप वस्ताद थारिल्लो. दुबय जाल्ले फायनलींत ताका श्रीलंके कडल्यान 23 धांवड्यांनी हार घेवची पडिल्ली.
पंगडः बाबर आजम (मुखेली), शादाब खान (उप मुखेली), आसिफ अली, हैदर अली, हॅरीस रऊफ, इफ्तिखार अहमद, खुशदील शाह, मोहम्मद हसनैन, मोहम्मद नवाज, मोहम्मद रिजवान, मोहम्मद वासिम, नसीम शाह आफ्रिदी, शान मसूद आनी उस्मान कादिर.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
