भांगरभूंय | प्रतिनिधी
-अणकारप्यांच्या पदां बदलां आतां संशोधन अधिकारी
पणजी: राजभास कोंकणी सयत हेर थळाव्या भाशांनी शास्त्रीय पांवड्यार संशोधन जावपाच्या हेतान सरकारान भाशा संशोधन केंद्राक मान्यताय दिल्या. सध्याची अणकार करप्याचीं चार पदां रद्द जावन ताचे सुवातेर भाशा संशोधन अधिकारी/सहाय्यकांची नेमणूक जातली. कोंकणीच्या प्राध्यापकांनी भाशा संशोधन केंद्राच्या स्थापणुकेक येवकार दिला.
बुधवारा मंत्रीमंडळाची बसका जाली. हे बसकेंत हेर निर्णयां सयत भाशा संशोधन केंद्र स्थापन करपाक मान्यताय दिली. मुख्यमंत्री डॉ. प्रमोद सावंत हांणी मंत्रीमंडळ बसके उपरांत ही म्हायती दिली.
भाशा संशोधन केंद्र स्थापन करपाची घोशणा मुख्यमंत्र्यांनी 2023 – 24 वर्साच्या अर्थसंकल्पांत केल्ली. ते प्रमाण आतां मंत्रीमंडळान मान्यताय दिल्या. राजभाशेची कार्यवाही, कोंकणी भाशेंतल्या पोरण्यां दस्तावेजाची जतनाय करपाचो हेत आसा. तशेंच कोंकणी व्याकरण, इतिहास, संस्कृती हांच्या दस्तावेजांचें पुनर्मुद्रण जातलें. कोंकणी भाशेंत तरेकवार शब्द आसात. पोरणें शब्द आतां नश्ट जावपाक लागल्यात. कोंकणीच्यो तरेकवार बोली आसात. कोंकणी भाशेचें शास्त्रीय, सांस्कृतीक संशोधन करपाचो हेत हाचे फाटल्यान आसा. केंद्र सरकारच्या सहकार्यान हे केंद्र कार्यान्वीत जातलें.
अणकार करप्याचे सुवातेर संशोधन अधिकारी
राजभास खात्यांत ज्येश्ठ अणकार करप्यांची चार पदां रितीं आसात. पात्र उमेदवाराच्या उणावाक लागून ही पदां रिती आसात. ज्येश्ठ अणकार करप्यांचे सुवातेर आतां भाशा संशोधन अधिकारी (1 पद), भाशा संशोधन अधिकारी (1 पद), भाशा संशोधन सहाय्यक (2 पदां) आनी संगणक एनालिस्ट (1 पद) हांची भरती जातली. अणकार करप्यांची पदां रद्द जातली.
ह्या चार पदांचेर वर्सुकीं 28 लाख 80 हजार रुपया खर्चाची तजवीज आसा. नवी पदां कंत्राटी आसतली. ह्या पदांचेर वर्सुकीं 12 लाख 60 हजार रुपया खर्च जातलो.
तशेंच सध्या रिते आशिल्लें सहाय्यक संचालक (मराठी) ह्या पदा बदला सहाय्यक संचालक (संशोधन आनी प्रशिक्षण) अशें नामकरण जातले.
कोंकणी बोलीचेर संशोधन जावचे: प्रा. प्रकाश पर्येंकार
कोंकणी भाशेंत ग्रामीण कोश ना. पेडणें, बार्देश, साश्ट, सत्तरी ह्या म्हालांत कोंकणीच्याे वेगळ्यो बोली आसात. बोली तशेंच कोंकणी भाशेचें शास्त्रीय नदरेन संशोधन जावपाक जाय, अशें प्रा. प्रकाश पर्येकार हांणी सांगलें.
कोंकणी आनी हेर भाशांचें संशोधन जावचें: डॉ. पूर्णानंद च्यारी
कोंकणी आनी हेर भारतीय भाशेमदल्या संबंदाचेर संशोधन जावपाक जाय. विदेशी संशोधक लेगीत आतां कोंकणी भाशेचेर संशोधन करपाक लागल्यात. कोंकणी संशोधन केंद्र सुरू जावप ही बरी गजाल आसा, अशें डॉ. पूर्णानंद च्यारी हांणी म्हणलें.
कोंकणी प्रमाण कोश अधिसुचीत जावचो: डॉ. प्रकाश वजरीकार
कोंकणी भाशेंत प्रमाण शब्दावली तशेंच प्रमाण लेखनाची पद्दत अधिसुचीत जावपाक जाय. प्रशासनांत खंयच्या शब्दांचो वापर जावचो, ते शब्द निश्चीत जावपाक जाय. तशेंच कोंकणींत परिभाशा कोश तयार जावचे, असो हेत कोंकणी संशोधन केंद्रा फाटल्यान आशिल्लो. कोंकणी भास ही ज्ञानाची भास जावपाक जाय, अशें डॉ. प्रकाश वजरीकार हांणी म्हणलें.
राजभाशेची कार्यवाही ना, हेर उपक्रम कित्याक? : अॅड. उदय भेंब्रे
राजभास कायद्याची कार्यवाही करप हो राजभास संचालनालयाचो मुखेल उद्देश आसा. हो उद्देश साध्य करपाचे सोडून हेर उपक्रम कित्याक? संशोधना खातीर हेर संस्था आसात. गोंय विद्यापिठांत कोंकणी भाशेचें संशोधन करपाक बरोच वाव आसा. सरकारी अधिकारी, कर्मचारी हांकां कोंकणी भास येना. तांकां प्रशिक्षण दिवन राजभाशेची कार्यवाही करप हो राजभास संचालनालयाचो हेत आसपाक जाय. मूळे हेत पुराय जावंक नासतना हेर उपक्रम करपा कडेन संचालनालयाचो खर्च जाता. संशोधन केंद्र स्थापन जाले तरी हेत साध्य जावपा विशीं दुबाव आसा, अशें अॅड. उदय भेंब्रें हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
