भांगरभूंय | प्रतिनिधी
नवी दिल्ली, खबरां संस्था ः भारताच्या अणुऊर्जा कार्यावळीचेर काम करपी शास्त्रज्ञ एम. आर. श्रीनिवासन (95) संवसाराक अंतरले. श्रीनिवासन हांकां 1984 वर्सा पद्मश्री, 1990 वर्सा पद्मभूषण आनी 2015 वर्सा पद्मविभूषण किताब फावो जाल्यात.
ब्रिटीश भारतांत जल्मल्ले श्रीनिवासन कॅनडाक गेले आनी तांणी गॅस टर्बायन तंत्रगिन्यानाचो अभ्यास केलो. तांचो जल्म 5 जानेवारी 1930 दिसा बेंगळुरू शारांत जालो. तांणी म्हैसूरच्या इंटरमीडिएट कॉलेजींत विज्ञानाचें शिक्षण घेतलें. ह्या काळांत तांणी इंग्लीश आनी संस्कृत भाश शिक्षणाचें माध्यम म्हूण निवडलें.
1950 वर्सा तांणी एम विश्वेश्वरय्या कॉलेज ऑफ इंजिनियरिंगांतल्यान मेकॅनिकल इंजिनिअरिंग पदवी मेळयली. 1952 वर्सा पदव्युत्तर अभ्यास पुराय जातकच फुडल्या अभ्यासा खातीर ते कॅनडांतल्या मॉन्ट्रियलाच्या मॅकगिल विद्यापिठांत गेले. थंय तांणी गॅस टर्बायन तंत्रगिन्यानांत विशेशज्ञता घेवन पीएचडी केली.
देश जालो अणुऊर्जा शक्ती
सप्टेंबर 1955 त श्रीनिवासन अणुऊर्जा विभागांत सामील जालें. हांगा तांणी भारताच्या अणुऊर्जेचे जनक होमी जहांगीर भाभा हांचे वांगडा काम करपाक सुरवात केली. ह्या दोगांयनी ऑगस्ट 1956 त देशांतली पयली अणुभट्टी ‘अप्सरा’ बांदली. श्रीनिवासन अणुऊर्जा आयोगाचे अध्यक्ष जाले. 1987 वर्सा तांणी मुंबय शारांत भारत अणुशक्ती म्हामंडळाची (NPCIL) थापणूक केली. तांच्या फुडारपणा खाल एनपीसीआयएलान देशांत 18 अणुऊर्जा प्रकल्प उबारले.
श्रीनिवासन हे वर्ल्ड असोसिएशन ऑफ न्यूक्लियर ऑपरेटर्स (WANO) हे संस्थेचे संस्थापक वांगडी, इंडियन नॅशनल अकाडमी ऑफ इंजिनियरिंग अँड इन्स्टिट्यूशन ऑफ इंजिनियर्स हे संस्थेचे फेलो आनी इंडियन न्यूक्लियर सोसायटीचे एमेरिटस फेलो आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
