भांगरभूंय | प्रतिनिधी
बारावी यत्तेचे विद्यार्थी परीक्षा दिवन निकाला कडेन नदरो लावन बसतले. निकाल लाग मेरेन तांच्या हातांत बरोच वेळ आसतलो. त्या वेळाचें कितें करप, हो जसो प्रस्न तांचे मुखार आसा, तोच प्रस्न हेर विद्यार्थी परिक्षा जातकूच तांकां तशेंच तांच्या पालकांक लेगीत पडूं शकता. व्हड शारांनी विद्यार्थ्यांनी सुटयेचो लाव घेवचो म्हूण थोड्या दिसांची शिबिरां आयोजित करतात. हांचो लाव सगळ्यांक मेळटा वा ते घेतात अशें ना, पूण तुमी हांचो फायदो जरूर घेवचो. एक म्हणल्यार तुमी कितें तरी नवें शिकतात, जें तुमकां जिवितांत उपेगी पडूं शकता. आमच्या शेजराक आंबोली गांव आसा, थंय सैनिक शाळा आसा. ती दर वर्सा शिबिरां आयोजित करता. कोरोना खातीर आयोजित करप शक्य जालें ना, पूण अंदूं तांणी साहस शिबीर आयोजित केलां.
हें ‘साहसी उन्हाळी शिबीर’ एप्रिल ते मे म्हयन्यांन जावपाचें आसा. 15 एप्रिल ते 21 एप्रिल आनी 22 एप्रिल तें 28 एप्रिल अशा दोन गटांनी हें शिबीर जावपाचें आसा. हातूंत तुमकां सुकणीं, जनावरां पळोवप, तांकां जाणून घेवप, फुडारपण उदरगत, दोंगर हुपप, योग आनी खेळ, रायफल शूटिंग आनी रॅपलिंग हे साहसी प्रकार शिकपाक मेळटले. खंयचें शिबीर म्हणलें काय थंय शिस्त आयलीच आनी ती आसपाकूच जाय. है सैनिकी शाळेंतले शिबीर म्हळ्यार शिस्त आसतलीच, खेरीज शिकोवपी तज्ञ आसतले, हातून दुबावूच ना. खंयच्याय शिबिराचे बरेच लाव आसतात. ते म्हळ्यार शिबिरांत तुमी घरा कडल्यान पयस रावपाची संवय लायतात. तुमचो व्यक्तिमत्व विकास घडोवन हाडपाक ज्यो गजाली जाय त्यो तुमी शिकतात. नवी गजाल शिकपाक मेळटा, नव्यो वळखी जातात आनी मुखेल म्हळ्यार सगळ्या वांगडा वावुरपाची एक संवय लागता. ह्या शिबिरान रॅपलिंग सारको साहसी प्रकार आसा. ताका उदकाची गरज आसता. खरें म्हणल्यार गोंयांक 105 कि मी इतली दर्यादेग आसा. हाका लागून आमकां उदकाचो वांगड सदांच आसता. तेन्ना पेंवपाक येवप कठीण न्हय. पूण, आमी असल्या गजालीं कडेन आडनदर करतात. तें जावपाक फावना. उदक म्हळ्यार सैमाचो व्हड अवतार. समुद्रा कडल्यान आमी जायत्यो गजाली शिकूं शकतात. आमकां जो दर्या आसा ताचें नांव अरबी समुद्र. हें तुमी शाळांनी शिकल्या आसतले, पूण सगल्योच गजाली तुमकां शाळांनी शिकपाक मेळटात, अशें ना. शिबिरां भितर बऱ्योच गजाली ह्यो शाळांनी शिकपाक मेळनात, त्यो शिकूंक मेळटा. आपलें करियर घटमूट करपाक ह्यो गजाली बऱ्योच म्हत्वाचो आसतात. सादी कुजनांतली गजाल घेयात. आमी वर्सभर ताच्या वांगडा आसतात, पूण आमी केन्ना प्रस्न विचारला की दुदाचें धंय कशें जाता? कांय भाजयो खाताना गळ्या कडे खाज येवंक जायना म्हूण आवय कितें करता आसतली? आमच्या कुडीच्या भागांतल्यान रगत आयलें जाल्यार हळदूच कित्याक वापरतात? अशे प्रस्न आमका पडपाक जाय. हातूंतल्यान तुमची उमळशीक जागी जावपाक मजत जातली. शिबिरांत वाटेकार जाले उपरांत तुमचो आत्मविस्वास वाडूं शकता, प्रस्न विचारपाची हांगां चड संद मेळटा.
मेकळेंपण येवपाक शिबिराचो आमकां लाव जाता तो वेगळोच. तुमका जर शिबिराक वचपाचें आसा तर ताची म्हायती दिसाळ्यांनी येता, नाजाल्यार आतां फेसबुका वरवीं कळूं शकता. धरून चला, तुमका शिबिरांतले विशय आवडूंक नात जाल्यार तुमी तुमच्या वाठारान ताचें आयोजन करपाक कोणाकूय सांगू शकतात. सगळ्या शिबिरांनी तुमकां आवडतात ते विशय आसतलेच अशें ना. हीच शिकवण मोलादीक आसा. आपले जिणेंत सगळ्योच गजाली आमकां आवडटात अशो नासतल्यो तेन्ना आमकां खंय तरी एड्जस्ट करून घेवचेंच पडटा. ह्यो गजाली आयुश्यांत खूब म्हत्वाचो आसतात. ही एक प्रकारची परिक्षा आसा, जिचे प्रस्न तुमकां खबर आसनात. जीण म्हळ्यार कितें? तर प्रस्न खबर नाशिल्ली परिक्षाच. तेन्ना खंयच्या तरी शिबीराक वचात आनी करियराची गुंतवणूक करात. जर तुमी आंबोली सैनिकी शाळेन आयोजित केल्ल्या शिबिराची चड म्हायती घेवपाक सोदतात, तर तुमी दीपक सर (9423304518) ना जाल्यार राजेंद्र (9403366229) हांकां संपर्क करून चड म्हायती घेवं शकतात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
