भांगरभूंय | प्रतिनिधी
लोलयेंच्या श्रीदामोदर विद्यालयाच्या शतकपूर्तीच्या निमतान शाळेंतले (1972 ते 2014) म्हजे प्रदीर्घ शिक्षकी कारकिर्दींतल्या आनी (2008 ते 2014 काळांतल्या) मुख्याध्यापक पदावेल्यान उबारिल्ल्या उद्येगपर्वाच्या इतिहासाचें हें सिंहावलोकन.
नूतन इमारत बांधकाम आनी मैदानाचे निर्मिती खातीर संस्थाचालकां वरवी सर्वसंमतीन कामाची कंत्राटां दिल्लीं आनी तातुंतल्या एक- दोन गजालींचेर म्हज्या वांगड्यां वरवी अंशतः नजर दवरपाचीय वेवस्था केल्ली तरीकूय काम उत्तम आसचें, ऐन वेळार उप्रासपी अडचणींवर रोखडोच इलाज जावचो आनी पयशांचो विनियोगय योग्य तरेन घडचो हाचे खातीर सगळ्याच कामाचेर म्हाका जबाबदारीन लक्ष दवरप भाग आशिल्लें.
मोठ्या प्रयत्नांनी संपादन केल्लें धन योग्य तरेन कारणी लावचे खातीर जांची मदत जाली ते वास्तुविशारद मंदार उपासनी आनी जयेश फडते तशेंच सगळे कंत्राटदार तर तोखणायेक पात्र आसातच. बगर सदांच शाळे खातीर मदतीचो हात फुडें करपी खास करून वेदव्यास उर्फ बाळ परशुराम आचार्य हांच्या प्रमाणच शाळे फाटलो संलग्न जमनीचो पटो शाळेक मेळोवन दिवपी (चंद्रशेखर आचार्य, विश्वेश आचार्य, देवदत्त आचार्य, दामोदर आचार्य प्रभृती) आचार्य कुटुंबीय, सुमुख प्रभू देसाय, तशेंच अभियंते मनोज आमशेकार, आदले विद्यार्थी कॅप्टन ऍडी व्हियेगश, कंत्राटदार दर्शन प्रभू गांवकार ,सर्व्हेयर सुभाष पागी हांचेंय योगदान शाळेक लाभिल्ले आसा. तशेच थळावी पंचायत, वीज अभियंते गोविंद भट हांचे सयत विवीध सरकारी अधिकारी, वास्तुविशारद योगेश प्रभू गांवकार हांचेंय योगदान शाळेक लाबलां. श्रीदामोदर व श्रीकेशव ह्या उभय देवालयांचे ॠण तर केन्नाच फिटप शक्य ना.
म्हज्या आग्रहाचे विनवणेक लागून, अनेकानेक प्रबोधनपर कार्यक्रमांच्या निमतान शाळेक भेट दिवन विद्यार्थ्याक सन्मार्ग दाखोवपी शिक्षणतज्ञ प्रा. भिकू पै आंगले, गुरुवर्य प्रा रमेश सप्रे, लेखिका माधवी देसाई, संस्कृत तज्ञ शिरीश भेडसगावकर, ज्ञानपीठ जैतिवंत साहित्यकार दामोदर मावजो, वास्तुविशारद, पर्यावरणतज्ञ कमलाकर साधले, गुजरात उच्च न्यायालयाचे निवृत्त मुख्य न्यायाधीश गुरुदास कामत, चिन्मय मिशनचे प. पू. प्रल्हाद चैतन्य जी, प्रा. नारायण भा. देसाय, डाॅ. सच्चिदानंद शेवडे, वे. शा. सं. प्रा. सदाशिव टेंग्से, ह. भ. प. निशाकांत टेंगसे, कायदेतज्ञ सतीश सोनक, पर्यावरणतज्ञ प्रा.राजेंद्र केरकार, प्रा. दिलीप बेतकीकार, प्रा. अनिल सामंत, प्रा .रत्नाकर लेले, प्रा. विवेक कामत, डाॅ. अजय वैद्य, प्रा यशवंत पराडकार, साखळीच्या प्रोग्रेस हायस्कूलाचे तत्कालीन अध्वर्यू नरसिंह उर्फ नारायण गोविन्द भटगांवकार, पैंगीणच्या श्रीश्रद्धानंद विद्यालयाचे आदले मुख्याध्यापक फ. य. प्रभू गांवकार ह्या आनी अशा कितल्याच ऋषितुल्य व्यक्तींचो तर हांव ऋणी आसांच.
म्हजे विनवणे वेल्यान विद्यालयाक परोपरीन मदत करपी दानशूर व्यक्तीं खेरीज म्हज्या उल्याक अनुकूल प्रतिसाद दिवपी वल्लभ पै (दूरदर्शन संच), खासदार रमाकांत आंगले (एलसीडी प्रोजेक्टर आनी डीव्हीडी प्लेयर), एमईएसचे अध्यक्ष परेश जोशी (अर्थीक मदत), राकेश करमली (ग्रंथालया खातीर अर्थीक मदत), खासदार शांताराम नायक (संगणक, लॅपटॉप, प्रतिमुद्रा यंत्र), गौतम भेंडे आनी रोटरी क्लब पणजी (लॅपटॉप) हांचो, आत्मीयतेन शाळेक मदत करपी हेर अनेकांचो तशेंच इंटरनेट जोडणी, पुस्तकां आनी अन्य तरेकवार साधनसुविधा दिवपी शासकीय यंत्रणेचोय हांव उपकारी. रोटरी क्लबा सारक्यो सेवाभावी संस्था, फोमेतो, सिप्ला हांचे सारके उद्येग समूह, थळाव्यो बँको आनी हेर जायत्या दानशूर व्यक्तींचे उपकार मानप हें म्हजें कर्तव्य जावन आसा. शाळेवेल्या मोगान शाळेक आदल्या विद्यार्थ्यां कडच्यान खूब अर्थीक मदत मेळ्ळ्या, हाचोय हांव उल्लेख करतां. अक्षरशः ‘अनंत हस्ते कमलावराने’ …म्हणचे तशे हे ईश्वरी कृपेचो उल्लेख करप ह्या लेखाच्या आंवाठा भायलें आसा.
मुख्याध्यापक म्हणून स वर्सांच म्हज्या हातांत येवपाचीं आसात हाचें भान दवरून तितल्याच काळा भितर आजमेरेन शाळे खातीर पळयिल्लीं सगळीं सपनां म्हाका साकार करपाचीं आशिल्लीं. शाळेची भव्य वास्तू आनी मैदानाची निर्मितीच न्ही तर पीडब्ल्यूडीच्या पालवान शाळेची राखणे वणत तशेंच (आतां मेरेन आशिल्ल्या अरुंद वाटेच्या जाग्यार आपले हात उबारून सगळ्यांक प्रेमान वेंगावपी) सोबीत प्रवेशद्वारा सकट भव्य अशा सोपानमार्गाची निर्मिती, शाळेच्या आधारा खातीर कन्या वसतीगृह शाळेक जोडून घेवप आनी चल्यांच्या वसतीगृहाखातीरय आदिवासी कल्याण संचलनालया कडच्यान प्रतिवर्सुकी नियमित अर्थीक अनुदान मेळोवप, सर्वसामान्य विद्यार्थ्यांकय स्वावलंबी करचे आनी अर्थार्जना खातीर गावच्या तरुण पिळगेक नाईलाजान स्थलांतर करचे पडचे न्ही ह्या खातीर पुण्याच्या LAHI संस्थेच्या मदतीन ‘स्वाधीन’ सारको महत्वाकांक्षी प्रकल्प यशस्वी रीतीन चालीक लावप , पंचायतीच्या मदतीन पंचायतीच्या बांयंतल्यान पंपान शाळे खातीर उदकाची पुरवण करून घेवप,…अशी अनेकानेक कामां जिद्द, चिकाटी आनी परिश्रमांच्या बळग्यार हांव पूर्ण करपाक शकलो हाचो म्हाका अभिमान आसा.
शाळेक थळावे ग्रामसंस्थे कडच्यान फुडाराच्या येवजण्यां खातीर 1 लाख चौ. मि. आकाराचो व्हडलो भूंयखंड मेळचो, श्रीकेशव देवालयाच्या बांयंतल्यानूय शाळेक उदकाची पुरवण जावची आनी इतलेच न्ही तर शाळेक नूतन प्रसाधन संकुल आनी एक विज्ञानकेंद्रय मेळचे आनी शाळेक सातत्यान संख्याबल मेळचें म्हणून तिका प्राथमिक विभागय जोडून घेवचो हे खातीर संबंदीतां कडेन अर्ज सादर करून हांवें प्रयत्न चालीक लायिल्ले. हातूंतल्या केशव देवालया कडसून बांयचे खातीर आनी सरकारा कडसून नूतन प्रसाधनसंकुल आनी प्राथमिक विभागा खातीर मंजुरीय मेळिल्ली. चल्यां खातीर शक्य जाल्यार खासदार निधींतल्यान जांव अन्य माध्यमांतल्यान विद्यार्थी वसतिगृहाच्या निर्मिती खातीरय हांव प्रयत्नशील आशिल्लो. संकल्पीत नूतन वसतिगृहा खातीर जमीन दिवपाचें वचन वै. नारायण आचार्य हांच्या कुटुंबियां वरवी दिल्लें. म्हजो मामेभाव पवन परशुराम भट हाणे म्हज्या उल्याक लागून संकल्पित वसतिगृहाचो विनामूल्य काढून दिल्लो आराखडो आनी अंदाजपत्रका सकट आमचो वसतिगृहा खातीरचो अर्ज खासदार शांताराम नायक हांच्या लागी सुपुर्द करून हे यत्न चालू आशिल्ले. मात नवी अधिक बरी येवजण येवपाची आसा अशें कळिल्ल्यान कांय काळ रावप भाग आशिल्ले.
(मुखार चलता)
(लेखक लोलयेंच्या श्रीदामोदर विद्यालयाचे आदले मुख्याध्यापक आसात.)
शंभू गोपाळ प्रभू देसाय
9403272947
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
