भांगरभूंय | प्रतिनिधी
रेल्वे पुलिसांच्या पालवान सोंपयलो आवय कडेन
मडगांव: मंगळुरू एक्स्प्रेसींतल्या एस 3 ह्या डब्यांत 13 वर्सां पिरायेचो चलो तिकेट तपासपी राघवेंद्र शेट्टी हांकां सांपडलो. चवकशी करतकूच शाळेच्या हॉस्टेलांतल्यान तो पळून गेल्ल्याचें मुखार आयलें. रेल्वे पुलीस दळाच्या पालवान चल्याक परतून ताचे आवय कडेन सोंपयलो.
कोंकण रेल्वे मार्गा वेल्या मंगळुरू एक्स्प्रेसींत 4 डिसेंबर दिसा एस 3 ह्या डब्यांत सान पिरायेचो चलो एकलोच प्रवास करतालो. तिकेट तपासपी राघवेंद्र शेट्टी हाणें त्या चल्या कडेन चवकशी करतकूच ताका प्रवासा विशीं योग्य म्हायती दिवंक आयली ना. तांणी ताच्या बॅगेची तापसणी केली तेन्ना शाळेचें वळखपत्र सांपडलें. उपरांत राघवेंद्र हांणी शाळेच्या अधिकाऱ्यां कडेन संपर्क सादलो तेन्ना तो चलो ताच्या बॉर्डींग हॉस्टेलांतल्यान पळून गेल्ल्याचें सांगलें.
हो चलो ताच्या आवय बराबर रावतालो. ती घरकाम करता. तिकाय चलो सांपडिल्ल्याची म्हायती रेल्वे सुरक्षा दळा कडल्यान दिली. उडुपी आरपीएफा कडेन चल्याक दिले उपरांत ताका भुरगीं सांबाळ केंद्रांत दवरला. तिकेट तपासपी राघवेंद्र हांच्या ह्या कृतीची खदल घेवन कोंकण रेल्वेचे अध्यक्ष संतोष कुमार झा हांणी तांकां पांच हजार रुपयांचें इनाम जाहीर करून तांच्या कामाची तोखणाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
