भांगरभूंय | प्रतिनिधी
पणजीः एप्रिलांत शिक्षणीक वर्स सुरू करून शिक्षक आनी विद्यार्थ्यांचो सकारात्मक प्रतिसाद पळोवपाक मेळ्ळा. शिक्षण खात्यान पांच शाळांची पळोवणी केली. तातूंत शाळेचे पयलेच दिसा सुमार १०० टक्के भुरग्यांची हजेरी दिसून आयल्या. एप्रिलांत शाळा सुरू करपांत विरोध करप्यांचो आंकडो सामकोच उणो आसा, अशें शिक्षण संचालक शैलेश झिंगडे हांणी सांगलें.
७ एप्रिल सावन नव्या शिक्षणीक वर्सा प्रमाण सव्वी ते धाव्वी आनी बारावी यत्तेंचे वर्ग सुरू जाल्यात. नवीन शिक्षणीक वर्साक कसो प्रतिसाद मेळ्ळा हे विशींची म्हायती शिक्षण संचालक शैलेश झिंगडे हांणी दिली. शिक्षण संचालनालयान पांच शाळांची पळोवणी केल्ली आनी पांचूय शाळेंत भुरगीं आनी शिक्षक सकारात्मक आसात. ह्या पांचूय शाळांनी सुमार १०० टक्के हजेरी आसली.
पांच शाळे मदले सेंट मायकल हायस्कूल ताळगांव, करंजाळे ओक्सिलियम हायस्कुलांत फकत सात भुरगीं येवंक नाशिल्लीं. के बी हेडगेवार हायस्कुल कुजिरा हांगा बरी परिस्थिती आशिल्ली, रोजरी स्कुलांत कांय पालकांनी भोवपाचो बेत आखिल्ल्यान ४ ते ५ भुरगीं गैरहजर आशिल्लीं आनी मुश्टीफंड हायस्कुलांत लेगीत वर्ग बरे भशेन चलताले, अशें झिंगडे हांणी सांगलें.
पयलीं आमी जुनांत शाळा सुरू करताले तेन्ना पुस्तकां पावनांत म्हण बोवाळ जातालो. पूण राज्य शिक्षण संसोधन आनी प्रशिक्षण परिशद (एससीइआरटी) संचालकान आठ दीस पयलींच पुस्तकां सगळ्या शाळांनी पावल्यांत म्हण स्पश्ट केलां, अशें झिंगडे हांणी सांगलें. सुमार १३ हजार लोकांनी आपलें निवेदन मांडटना चार हजार अर्जांचेर सयो मारिल्ल्यो. हाचे वेल्यान दिसून येता की एप्रिल म्हयन्यांत शाळा सुरू करपाक विरोध करप्यांचो आंकडो खूब उणो आसा. जर गोंयच्या वट्ट विद्यार्थ्यांचो आंकडो पळयल्यार नर्सरी ते १२ वी यत्ते मेरेन ३ लाख ४ हजार विद्यार्थी शिकतात. जर १५ हजार वयर पालक विरोध करतात जाल्यार तांचो आंकडो वट्ट विद्यार्थ्यांचे तुळेंत खुब उणो आसा, अशें झिंगडे हांणी म्हणलें.
शिक्षकांक एप्रील म्हयन्यांत सुटी मेळटाली देखून आतां शिक्षकांक त्रास जातलो असो युक्तिवाद पालक करताले. हो युक्तिवाद चुकीचो आसून शिक्षक पुराय एप्रिल म्हयन्यांत काम करताले आनी तांकां फक्त मे म्हयन्यांत सुटी आसताली. जायत्या शाळांनी १० आनी १२ वी यत्तेच्या भुरग्यां खातीर एप्रिलांत वर्ग भरताले. त्या भायर बाकीचे वर्ग जशे, खेळा आनी कंम्प्युटर हे काय वेळ वर्ग घेताले, अशें झिंगडे हांणी सांगलें.
हें सगळें आमी आतां राष्ट्रीय शिक्षणा खाला घेतलां आनी पांच दिसांच्या फरका उपरांत भुरगीं वर्गांत आयल्यांत. पांच दिसां भितर कसलेच साधन सुविधें बदल जावचे ना. ३० एप्रिलाक जर भुरगीं थंयसर बसून शिकतालीं जाल्यार पांच दिसां उपरांत येवन तांकां परत शिकपाक कसलेच त्रास नात. जर वर्ग नासले जाल्यार भुरगीं वतान वचून खेळपाचीं. गर्मी जातली म्हण भुरग्यांक आमी सकाळीं ११.३० सोडपाचे थारयलां. पूण ११.३० वरांचेर सोडल्यार लेगीत भुरगीं वतान वचून खेळटलीं. हांगा भुरग्यांचो प्रस्नच ना, अशें झिंगडे हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
