भांगरभूंय | प्रतिनिधी
पणजीः राज्यांत चली विद्यार्थ्यांची भलायकीची कुयदाद घेवपा खातीर आनी तशेंच तांकां दुयेंसमुक्त करपाक केंद्र सरकारान फाटल्या वर्सा ६८.५१ लाख निधी मंजूर केला. जाल्यार पोशण अभियाना खाला राज्याक फाटले तीन वर्सा सुमार ४० कोटी मंजूर जाल्यात. शाळेंत वचपी चलयांची भलायकी आनी पोशण सुदरपा खातीर सरकारान वेगवेगळ्यो येवजण्यो राबयता, अशी म्हायती भलायकी आनी कुटूंब कल्याण मंत्रालायन दिल्या.
लोकसभेच्या पटलार लेखी जापेंत भलायकी आनी कुटूंब कल्याण राज्य मंत्री अनुप्रिया पटेल हांणी ही म्हायती दिल्या. शाळेंत वचपी चलयांची भलायकेची जतनाय घेवपा खातीर आनी तांकां बरें पोशण मेळचें म्हण खासा येवजण्यो राबोवन राष्ट्रीय भलायकी अभियाना खाला वेगवेगवेळ्या गजालीं खातीर केंद्र सरकारान निधी दिता.
हे येवजणे खाला राष्ट्रीय भलायकी अभियाना वरवीं आर्थीक वर्स २०२३-२४सात ६८.५१ लाख निधी केंद्र सरकारांतल्यान आयला. तातूंत मासीक पाळेंत नितळसाण दवरपा खातीर ६.२९ लाख, राष्ट्रीय दंतनाशक दिसा खातीर १७.८९ लाख आनी सप्तकी आयरन फॉलीक एसिडचो डोस दिवपा खातीर ४४.३३ लाख केंद्र सरकारान मंजूर केल्यात. तशेंच चलयां मदीं कुपोशण नियंत्रीत दवरपा खातीर शाळांनी मिशन पोशण २.० ही येवजण राबयतात आनी हे येवजणे खाला फाटल्या तीन वर्सांनी सरकाराक ३९.४९ कोटी आयल्यात.
हे येवजणे खाला सरकारी, अनुदानीत शाळेंत आनी आंगणवाडींत चलयां खातीर सप्तकी आयरन फॉलीक एसिड डोस दितात, सेनेटरी नेपकीन वापरून मासीक पातळी वेळार नितळसाण दवरपा खातीर १०-१९ वर्सा पिरायेच्या चलया मदी जागृताय करता, राष्ट्रीय दंतनाशक दीस मनोवन दंताचे सक्रमण आडावपा खातीर फ्रेब्रेर आनी आॅगस्ट म्हयन्यांत दोन खेपें १ ते १९ वर्सा पिरायच्या चलयांक अल्बेंडाझोल गुळयो दितात आनी मिशन पोशण २.० खाला कुपोशणाच्या समस्येक आव्हान दिवन १४ ते १८ वर्सा पिरायेच्या चलयांक कड्डण आनी पुश्टीक अन्न दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
