शाळेंत मोबायल नाका; युनेस्कोचो सल्लो योग्यूच

भांगरभूंय | प्रतिनिधी

वर्गांत विद्यार्थ्यांची अध्ययन तांक वाडोवपाची आसत जाल्यार वर्गांतल्यान स्मार्टफोनाक हद्दपार करचोच पडटलो.

युनेस्को ह्या आंतरराष्ट्रीय संस्थेन विद्यार्थी शाळेंत जो स्मार्टफोन वापरतात ताचेर बंदी घालची अशी सुचोवणी केल्या. युनेस्कोचे हे
सुचोवणेक संवसारभर येवकार दितात. युनेस्कोच्या ह्या मताचेर संवसारांतल्या सगल्याच शिक्षणीक आनी मानसोपचार तज्ञांनी सहमती दाखयल्या. तशें पळोवंक गेल्यार आयज संवसारभरांतल्या 25 टक्के शाळांनी विद्यार्थ्यांच्या स्मार्टफोनाचेर बंदी घाल्या. पूण अजून लेगीत 75 टक्के शाळांनी विद्यार्थ्यांक स्मार्टफोन वापरपाक परवानगी आसा हें लेगीत सत्य आसा.
स्मार्टफोनाचो वापर फाटल्या तीन वर्सांत कितले तरी पटीन वाडला. पयलीं व्हडल्या मनशांच्या हातांत दिसपी स्मार्टफोन आयज शाळेंतल्या भुरग्यांच्या हातांत दिसून येता. कोरोना काळांत जेन्ना शाळा बंद आशिल्ल्यो तेन्ना स्मार्टफोन हेंच शिक्षणाचें एकसुरें माध्यम जाल्लें. ताका लागून पालकांनी आपल्या भुरग्यांक मोबायल विकते घेवन दिले. कोरोना काळांत स्मार्टफोना वरवीं शिक्षक ऑनलायन अध्यापन करताले. ताका लागून स्मार्टफोन हो विद्यार्थ्यांचे जिणेंतलो अविभाज्य घटक जालो. कोरोना काळांत जरी स्मार्टफोन हें शिक्षणाचें माध्यम आसलें तरी त्या माध्यमांतल्यान ऑनलायन शिक्षण हें कितलें प्रभावी थारता हेंवूय संवसारान पळयलें.
कोरोना काळांतूच शिक्षकांचें म्हत्व अधोरेखीत जालें. स्मार्टफोन असो की संगणक शिक्षकांची सुवात कोणूच घेवंक शकना हेंच त्या वेळार सिद्ध जालें. संगणक स्मार्टफोन हे फक्त साधन आसून शिक्षकांची बरोबरी करूंक शकना हें त्या वेळार पुराय संवसारान पळयलें. वास्तवीक शिक्षणां मदीं संगणक, स्मार्टफोन हांचो बरो वापर करूं येता. संगणक स्मार्टफोन म्हायतीचो खजिनो उपलब्ध जाता पूण दरेक फावटी स्मार्टफोनाचो वापर करुनूच अध्यापन करूंक जाय अशेंय ना. अध्ययन-अध्यापन प्रक्रियेंत संगणकाचो, स्मार्टफोनाचो अतिरेकी वापर जालो जाल्यार अध्ययन-अध्यापन प्रक्रियाच निरस जातली.
अध्ययन-अध्यापन प्रक्रियेंत आंतरक्रिया खूब म्हत्वाच्यो आसतात. विद्यार्थी-शिक्षक, विद्यार्थी-विद्यार्थी, विद्यार्थी-पालक, पालक-शिक्षक ह्यो आंतरक्रिया शिक्षण प्रक्रियेंत खूब म्हत्वाच्यो अासतात. डिजिटल माध्यमांत ह्या आंतरक्रियांक वाव नसता. स्मार्टफोन, संगणक हाचे सारकीं डिजिटल माध्यमां कितलींय प्रभावशाली आसलीं तरी शिक्षक आनी विद्यार्थी हांचे मदीं संवाद घडोवंक शकनात, म्हणूनच ए आय (आर्टिफिशल इंटिलिजन्स) वा खंयच्याय डिजिटल तंत्रज्ञाना कडेन मनशा खातीर सहाय्यक घटक म्हणूनच पळोवंक जाय. शाळेंत जर डिजिटल माध्यमाचो अदीक वापर जालो जाल्यार शिक्षणीक दर्जो देंवता हेंवूय युनेस्कोन आपल्या अहवालांत सांगलां.
स्मार्टफोनाचो व्हड प्रमाणांत वापर करपी विद्यार्थ्यां मदीं भावनात्मक नदरेन नकारात्मक प्रभाव पडटना दिसता. वर्गांत विद्यार्थ्यांची अध्ययन तांक वाडोवपाची आसत जाल्यार वर्गांतल्यान स्मार्टफोनाक हद्दपार करचोच पडटलो. विद्यार्थी जर वर्गांत स्मार्टफोन हाडटात आसत जाल्यार ते सेगीत स्मार्टफोनाचेरूच व्यस्त आसतात. कोणाचेंच आयकनात. सेगीत स्मार्टफोन वापरिल्ल्यान विद्यार्थ्यांक स्मार्टफोनाचें वेसन लागता, न्हय आयज खूबशा विद्यार्थ्यांक स्मार्टफोनाचें वेसन लागलांच. ताचे वायट परिणाम लेगीत दिसून येत आसात. स्मार्टफोनाच्या अतिरेकी वापराक लागून खूबशा विद्यार्थ्यां मदीं शारिरीक आनी मानसीक समस्या निर्माण जाल्ल्याचें आमी पळयत आसात.
स्मार्टफोनाच्या वेसनाक लागून विद्यार्थी एकोलकोंडो जायत आसा. विद्यार्थ्यां मदीं तिडक वाडल्या. मोबायलाच्या अतिरेकी वापराक लागून विद्यार्थी हिंसक जायत आसून स्मार्टफोनाच्या अतिरेकी वापराक लागून विद्यार्थी कुडीन मोटो जायत चल्ला. ल्हान पिरायेंतूच ताका वक्ल लागलां. स्मार्टफोनाक लागून विद्यार्थी मैदाना वेले खेळ विसरून गेल्यात. एकूणच स्मार्टफोनाक लागून विद्यार्थ्यांची शारिरीक आनी मानसीक जडणघडण खुंटल्या.
किशोर पिरायेचीं भुरगीं जाल्यार स्मार्टफोनाचो गैरवापर करतना दिसून येतात. कोरोना काळांत ऑनलायन शिक्षणा खातीर पालकांनी घेवन दिल्ल्या स्मार्टफोनाचो वापर ते गेम खेळप, व्हिडिओ तयार करप, रिल्स तयार करप, सोशल मिडिया, यु ट्यूब, वॅबसिरीज पळोवपा खातीर करतात. एकूणच विद्यार्थ्यांच्या हातांत आशिल्लो स्मार्टफोन हो शिक्षणा खातीर उणो आनी हेर गजालीं खातीर चड वापरप जाता. हाका लागून शाळेंतल्यान स्मार्टफोन हद्दपार करचो ही युनेस्कोची सुचोवणी योग्यूच आसा. शाळा, पालक आनी सरकारान हाचो गंभीरतायेन विचार करचो.

श्याम ठाणेदार
9922546295