शाळा स्थलांतराचो विशय सत्तरींत तापता

भांगरभूंय | प्रतिनिधी

कुमारखणींतली मुळावी शाळा पिसुर्ल्यां व्हरपाक हरकत; भागशिक्षण अधिकाऱ्यांक निवेदन

भांगरभूंय । प्रतिनिधी

वाळपयः गोंय सरकाराच्या शिक्षण खात्या वतीन मुळाव्यो शाळा स्थलांतरीत करपाच्या निर्णयाक सत्तरी म्हालांत व्हड प्रमाणांत विरोध जावपाक लागला. दिसान दीस ह्या विरोधाची धार खर जायत आसा.

पिसुर्ले पंचायतींतल्या कुमारखण वाठारांतल्या पालकांनी शुक्रारा वाळपय भागशिक्षण अधिकाऱ्यांची भेट घेतली. कुमारखण वाठारांतली शाळा सरकारान स्थलांतरीत करची न्हय, अशें सांगून ती पिसुर्ल्यां व्हरपाक खर विरोध केलो. हे शाळेचें स्थलांतर केलें जाल्यार गांवचे शिक्षणीक उदरगतीचेर परिणाम जातलो, अशें पालकांनी ह्या वेळार स्पश्ट केलें.

कुमारखणींतली मुळावी शाळा पिसुर्ल्यां व्हरपाचे आसा. हाका लागून भुरग्यांक थंय वचपाक अडचणी येतल्यो. पालकांक लेगीत हे संबंदांत समस्येक फुडो करचो पडटलो. हे खातीर सरकारान हो निर्णय घेवचो न्हय, अशी मागणी करपी निवेदन तांणी वाळपय भागशिक्षण अधिकाऱ्यांक सादर केलें.

सध्या हे मुळावे शाळेंत 19 विद्यार्थी शिकतात. जाल्यार आंगणवाडी शाळेंत 13 विद्यार्थी शिक्षण घेतात. फुडल्या वर्सां आंगणवाडींतले विद्यार्थी मुळावे शाळेंत प्रवेश घेतले. हाका लागून हे शाळेची पटसंख्या वाडटली. हाका लागून सरकाराचो हो निर्णय गांवचे शिक्षणीक उदरगतीचेर परिणाम करपाक शकता, अशें पालकांनी ह्या वेळार भागशिक्षण अधिकाऱ्यांक सांगलें.

पालकांनी ह्या वेळार सरकाराच्या निर्णयाक खर विरोध केलो. हे संबंदांत पालक शिक्षक संघाचे उपाध्यक्ष तुकाराम पर्येंकार हांणी सांगलें, वाळपय भागशिक्षण अधिकारी कार्यालयान ही मुळावी शाळा पिसुर्ल्या स्थलांतरीत करतले अशें म्हणलां. मजगतीं, ह्या प्रस्नाचेर भागशिक्षणाधिकारी श्रीरंग बर्वे आनी भालचंद्र भावे हांणी पालकांची समजूत काडपाचो यत्न केलो. हो निर्णय सरकाराचो. ताका लागून तुमी दिल्लें निवेदन सरकाराक सादर करतले. सरकार जो निर्णय घेतलें ताचेर फुडल्यो गजाली निंबून आसतल्यो, अशें ह्या वेळार तांणी सांगलें.

वेळ आयल्यार आंदोलनः पालकांचें म्हणणें

शाळा स्थलांतर संबंदांत पालकांची म्हत्वाची बसका हालींच जाली. हे बसकेंत कुमारखणींतली मुळावी शाळा स्थलांतरीत करपाक खर हरकत घेतली. खंयचेच स्थितींत ही शाळा स्थलांतरीत जावची न्हय हे खातीर गरज पडल्यार आंदोलन करतले, अशें पालकांचें म्हणणें आसा. हाका लागीन सरकारान शाळा स्थलांतरीत करपाचो निर्णय रद्द करचो, अशी मागणी पालकांनी केल्ल्याचें तुळशीदास पर्येंकार हांणी सांगलें.

शाळेच्या स्थलांतराक विरोधः राणे सरदेसाय

कुमारखणींतली मुळावी शाळा ही गांवचे आतां मेरेनचे उदरगतींतली म्हत्वाचो घटक. ज्या वेळार शिक्षणीक सुविधा नाशिल्ली त्या वेळार हे मुळावे शाळेच्या माध्यमांतल्यान ह्या गांवांतल्या लोकांक मुळावे शिक्षण मेळ्ळें. आयज ही शाळा दुसरे कडेन व्हेल्यार ह्या गांवांतल्या शिक्षणीक उदरगतीक धपको बसतलो. हे मुळावे शाळेच्या स्थलांतराक आपलो विरोध आसा, अशें ह्या वाठाराचे आदले पंच विकास राणे सरदेसाय हांणी सांगलें.