भांगरभूंय | प्रतिनिधी
शाळा आयच्यान सुरू जाल्या. शाळेंत वचप म्हणल्यार एक तरेचो उत्साह, मात्सो भंयूय दरेका भुरग्यां मदीं पातळटा. शाळा सुरू जाली काय नवे इश्ट, इश्टीणी, शिक्षक मेळटात. नवें वातावरण, नवें चैतन्यमय वातावरण.
पावसान मात्शी दडी मारल्या. शाळा सुरू जावचे पयलीं भुरग्यांक लागपी युनिफाॅर्म, स्कूल बॅग, टिफीन बाॅक्स, उदकाची बाटली, कंपास, पेन, पेन्सील, पुस्तकां, चोपड्यो, कव्हर, रेनकोट, सत्री, गमबूट घेवपाक दुकानां, माॅलांनी गर्दी जाल्ली. आयज, फाल्यांय जातली. शिक्षणीक वर्साचे तयारे खातीर पालकूय खूश आसतात.
शाळा म्हणली काय युनिफाॅर्म आयलोच. दरेके शाळेचो वेगवेगळो रंगीत युनिफाॅर्म आसता. थोडे रेडिमेड युनिफाॅर्म घेतात, तर थोडे शिवून घेतात. सध्या शिंपी तो शिवपांत गुल्ल आसतले. शाळा सुरू जाली काय पालकांचेर दडपणूय येता. बेगीन उठून सकाळीं भुरग्यांची तयारी करची पडटा. टिफीन बाॅक्स भरचो पडटा. वेणी, फणी, युनिफाॅर्म घालचो पडटा. कमरेक बेल्ट बांदचो पडटा. हीं सगलीं कामां वेळा भितर करचीं पडटात. भुरगीं व्हडलीं आसल्यार आपली तयारी आपूण करपाक शकतात. हें सगलें करपी बायल नोकरी करपी आसल्यार मागीर सगलीच धांदल. ते खातीर थोडीं रातची तयारी करून दवरतात.
भुरग्यांक व्हडली सुटी आशिल्ल्यान तांचे काम करपाचे पद्दतींत बदल जाल्लो आसता. पालकांच्योय संवयी बदलिल्ल्यो आसतात. शाळा सुरू जातकच सगल्यांचेंच वेळापत्रक बदलता. तांकां मागीर शाळेंत व्हरून पावोवचीं पडटात. आतां बालरथ, रिक्षा आसात. आदल्या तेंपार म्हणल्यार 30 वर्सां पयलीं भुरगीं आपूणच शाळेंत वतालीं. टिफीन, वाॅटर बोटल, रिक्षा, स्कूटर असले प्रकार तीं वापरनाशिल्लीं. भुरग्यांक शाळेंत हाड- व्हर करप ही तारे वयली व्हडली कसरत म्हणचें पडटलें.
आदल्या तेंपार पावस सुरू जालो काय शाळा सुरू जाताल्यो. अंदूं पावसाचें आगमन आठ दीस बेगीन जालां. शाळा आनी पावस हांचो ताळमेळ वेवस्थीत बशिल्लो आसा. पावसांत सत्री फुलोवन, रेनकोट घालून भुरग्यांक शाळेंत वचपाक मजा येता. आयज शाळा सुरू जाल्या. आतां सगले कडेन भुरग्यांचो किलबिलाट आयकूंक येतलो, उमेद पळोवपाक मेळटली.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
