भांगरभूंय | प्रतिनिधी
पणजी : देशभरांतल्या शाळांनी वाडत चलिल्या अपघातांक लागून केंद्रीय शिक्षण मंत्रालयान हुस्को उक्तायला. तांणी सगल्या राज्यांक आनी केंद्र साशीत प्रदेशांक शाळांनी विद्यार्थ्यांचे सुरक्षितताये खातीर बेगोबेग उपाय काडपाचे निर्देश दिल्यात.
हेच फाटभूंयेर राष्ट्रीय सुरक्षा संहिते प्रमाण शाळांनी ‘सेफ्टी ऑडिट’ सक्तीचें केलां. ह्या ऑडिटां खाला शाळेची इमारत, फायर सेफ्टी वेवस्था, विजेची वायरिंग तशेंच विद्यार्थी वापरपी सगल्यो सुविधा हांची बारकायेन तपासणी करप गरजेचें. आपत्कालीन परिस्थितीत विद्यार्थ्यांक आनी शालेय कर्मचार्यांनी कशी तयारी दवरची हाचें प्रशिक्षण दिवपूय आतां सक्तीचें केलां.
हालींच राजस्थानांतल्या झालावाड जिल्ह्यांत सरकारी शाळेची इमारत कोसळून सात विद्यार्थ्यांक मरण आयलें. तर, झारखंडच्या रांची शारांत सेगीत पडपी पावसाक लागून शाळेच्या पांख्याचो कांय भाग कोसळून एकल्याक मरण आयलें, तशेंच जायते विद्यार्थी जखमी जाल्ले. हे विशीं उलयतना, हालींच शाळांनी जाल्ल्या अपघातांक लागून सुरक्षेचो प्रस्न मुखार आयला अशें शिक्षण मंत्रालयाच्या अधिकार्यांनी स्पश्ट केलां.
अशे तरेच्या घडणुको परत घडच्यो न्हय हे खातीर प्रशासनान सादूर रावचें, शाळांतले उणाव सोदून काडचे आनी बेगोबेग सुदारणा करची अशें शिक्षण मंत्रालयान स्पश्टपणान सांगलां. सगल्या राज्य शिक्षण खात्यांक, शाळा मंडळांक आनी संबंदीत अधिकार्यांक बेगोबेग ह्यो सुचोवण्यो चालीक लावपाक सुरवात करपाचे निर्देश दिल्यात.
सेफ्टी खातीर म्हत्वाच्यो सुचवण्यो:
-विद्यार्थ्यांची येरादारी करपी वाहनांची सुरक्षा तपासणी करची.
-फायर सेफ्टी उपकरणांची कार्यक्षमता, आपत्कालीन परिस्थितींत भायर पडपाचे मार्ग आनी विजेची वायरिंग नेमान तपासची.
-अपघात जाल्यार जापसालदारकी निण्चीत करपा खातीर यंत्रणा कार्यान्वीत करचीं.
-राष्ट्रीय आपत्ती वेवस्थापन प्राधिकरण, अग्निशमन दळ, पुलीस आनी वैजकी यंत्रणांच्या सहकार्यान मॉक ड्रिल्स आनी प्रशिक्षण सत्र आयोजीत करचे.
-विद्यार्थ्यांच्या मानसीक भलायकेची राखण करपा खातीर समुपदेशन सत्रां घेवचीं.
-पालक, थळावे समाज मुखेली आनी स्वराज्य संस्था हांकां शाळेंतले सुरक्षे विशीं जागृत करचे.
-गांवांतल्या शाळांनी कितें दुरुस्त करपा सारकें दिसल्यार नागरिकांनी रोखडेंच प्रशासनाक संपर्क करचो आनी प्रशासनान रोखडींच पावलां उबारचीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
