भांगरभूंय | प्रतिनिधी
एक काळ आशिल्लो, शिक्षक विद्यार्थ्यांक मारताले. फकत कुटल्यो, मुठी, थापटांनी न्हय, तर बेताचे बडयेन पसून मुतसर मारपी शिक्षक आशिल्ले. तातूंतले कांय जाण अजून जिवे आसात. मात, आतां काळ बदल्ला. भुरग्यांक तांचे पालक घरांत पसून हात लायनात, ते परकी मनशान मारिल्लें सोंसून घेतले? कायद्यानूय विद्यार्थ्यांक शारिरीक ख्यास्त करपाक मेळना. अर्थांत हें योग्य का अयोग्य, विद्यार्थ्यांचे मानसिकतायेचेर ताचो कितें परिणाम जाता, ते सुदारतात काय इबाडटात… हो संशोधनाचो विशय. हालींसराक गोंयांत शिक्षक विद्यार्थ्यांक चुकूनच मारता आसतले. पूण, हेर कडेन खेडेगांवांनीच न्हय, तर शारांनीय विद्यार्थ्यांक बडोवपी शिक्षक आसात. हालींच मुजफ्फरनगरांतल्या (उत्तर प्रदेश) खुब्बापूर गांवांतले शाळेंतलो व्हिडियो व्हायरल जाला. ताचे वयल्यान सध्या बोवाळ जाता. अक्षरशा दोन तट पडल्यात. मात, प्रशासनान रोखडीच हे घडणुकेची दखल घेवन ही खाजगी शाळा बंद करपाक सांगल्या, ही बरी गजाल. आमी ही शाळा कायमची बंद करपाक सांगिल्ली. कारण सरकाराच्या निकशांत ती बसना. सगल्या 50 विद्यार्थ्यांक सप्तका भितर सरकारी वा दुसऱ्या शाळांनी धाडटले, अशें शिक्षण अधिकाऱ्यांनी सांगलां.
नेहा पब्लीक स्कूल त्रिप्ता त्यागी (60) ही बायल चलयता. व्हिडियो प्रमाण, ह्या ल्हान विद्यार्थ्याचें गणित चुकलें. म्हणून तिणे ताका उबो करून एकेका भुरग्याक ताचेर थापट मारपाक सांगलें. एक- दोगांनी थापट मारतकच तो भुरगो रडपाक लागलो. व्हिडियोंत शिक्षिकेचीं उतरांय आयकूंक येतात, ह्या मुस्लीम भुरग्यांनी तांचे वस्तींत वच्चें. आरे, तूं असो कितें मारता? नेटान मार. आनीक कोण उरला मारपाचो? ताचो पोलो तांबडो जालो, आतां ताचे फाटीर मारात…..!! व्हिडियो व्हायरल जातकच, ही शिक्षिका भंयान कुळकुळ्ळ्या. आपूण दिव्यांग, म्हाका ताका मारपाक जमना, म्हूण भुरग्यांक मारपाक सांगलें, ताच्या काकानूच ताका मारपाक साांगलां… अशें ती सांगता. त्या भुरग्याच्या घरा राजकी फुडारी, पत्रकार पावल्यात. सोशल मिडियाचेरुय टिका जाता. ताच्या बापायन पुलीस कागाळ फाटीं घेवची म्हूण गांवकारांनी चेपण घालां. कागाळ फाटीं घेना जाल्यार गंभीर परिणाम भोगचे पडटले, अशी शिटकावणी पुरा गांवाच्या नरेंद्र त्यागी ह्या मुखेल्यान दिल्या. दुसरे वटेन भीम आर्मी आनी हेर पक्ष त्या कुटुंबा फाटल्यान रावल्यात. शेतकार फुडारी राकेश टिकैत हांणी तडजोड करून शिक्षिके आडची कागाळ फाटी घेवपाक सांगल्या. भुरग्याचो बापूय म्हणटा, हांव शेतांतलो मानाय. शिक्षिकेन माफी मागची इतलीच आमची इत्सा.
मस्ती करपी विद्यार्थ्यांच्या हातार पावत मारली वा एक थापट मारलें म्हूण पालक कागाळ करचो ना. ताची राष्ट्रीय पांवड्या वयली बातमीय जावची ना. पूण, ताका घावो जाय मेरेन वा फाटीर दाग ये म्हणसर मारप चुकीचें. ह्या व्हिडियोंत तर जात, धर्मा वयल्यान उलयिल्लें आयकूंक येता, तें आक्षेपार्ह. देशांत, खास करून सोशल मिडियाचेर आयज अल्पसंख्याकांचेर खर टिका वाचूंक मेळटा, व्हिडियो दिसतात. कांय घडणुकोय घडल्यात. खणून खणून आदलो इतिहास वयर काडप आनी तो वापरून वातावरणांत दुस्वासाचो दुर्गंध सोडपाचोय यत्न चालू आसा. आतां हें शाळांनी पावलां. औरंगजेबान वा ताच्या बापायन कितें केल्लें ताचे खातीर आतांच्या भुरग्यांक खेपल्यार 500 वर्सां पयलींचो घावो पेखतलो? प्रत्येकान अदीमदीं तेल ओतून हें होमखण पेटतूच दवरप समाजीक नदरेन धोक्याचें थारूं येता. सोशल मिडियाक लागून आयज खंयूय खट खूट जालें काय तें देशभर पातळटा. ताचो परिणाम भुरग्यांचे मानसिकतायेचेर जायना कित्या वयल्यान? जम्मू आनी काश्मीरांत फळ्यार जय श्रीराम बरयलें म्हूण विद्यार्थ्याक बडोवपी शिक्षकाक अटक जाल्या. त्या मानान ही शिक्षिका भाग्यवान. तिका अटक जावंक ना.
हो व्हिडियो त्या भुरग्याच्या चुलत भावानूच सगल्या भुरग्यां मुखार काडला. म्हणटकच तांचे सयत शिक्षिकेकूय ह्या प्रकाराचे कितें गंभीर परिणाम जावपाक शकतात, तें घडये खबर नासतलें. व्हिडियो व्हायरल जावंक नाशिल्लो जाल्यार हें प्रकरण मिटपाचेंय. शाळे सारक्या पवित्र जाग्याचेर ल्हान- ल्हान भुरग्यां मुखार एखाद्याक धर्मा वयल्यान चाळोवप, मारपाक लावप हे शिक्षकी पेशाक सोबून दिसलें ना. हें अशेंच चल्लें जाल्यार थापटां खावपी आनी तांकां थापटावपी भुरगे व्हडले जातकच नेमके खंयचो मार्ग आपणायतले, हाचो विचार देशांतल्या प्रत्येक पालक, शिक्षकांनी करचो. ह्यो घडणुको मेंदवा कुर्कुटांत सासणाच्यो उरूं येतात!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
