शालेय शिक्षणांत फकत देवनागरीच आपणावया !

भांगरभूंय | प्रतिनिधी

आमी रोमी लिपयेंतल्या साहित्याक आनी सर्जनशिलतायेक पोसवण दिवयाच. पूण शालेय शिक्षणांत फकत देवनागरीच आपणावया! काळाची गरज ती!!

गोंयांत कोंकणी भाशेच्या अध्यापना खातीर देवनागरी वांगडा रोमी लिपयेच्याय वापरा संबंदीचो खाजगी थाराव हालींच घडून आयिल्ल्या विधानसभा अधिवेशनांत कॉंग्रेसीचे आमदार अॅड. कार्लूस फेरेरा हांणी मांडलो. ताचेर भासाभास जाली आनी उपरांत तो थाराव भोवमतान भायर मारलो. चर्चेवेळार गोंयचे मुख्यमंत्री डॉ प्रमोद सावंत हाणी खंबीर भुमिका घेवन जे प्रभावी मुद्दे मांडले ते खातीर तांची तोखणाय करपाकच जाय!
हो थाराव मांडटल्या अॅड. कार्लूस फेरेरा आनी हेर विरोधी आमदारांनी लिपयेचो संबंद सरळपणान धर्मा कडेन लायलो. धर्मीक दुस्वासाचो हो हुस्क्याचो काळ! गोंयांतय लोकसंख्येंत भोवसंख्येन आशिल्ल्या हिन्दू आनी क्रिस्तांव धर्मां मदीं वितुश्ट निर्माण करपाचे यत्न सातत्यान जायत आसात. अश्या वेळार गोंयच्या विंगड विंगड धर्मियांक एका धाग्यान बांदून दवरपी घटक म्हणल्यार कोंकणी भास आनी साहजीकच तिची देवनागरी लिपी. ती एका विशिश्ठ धर्माची लिपी न्हय. ती पुराय कोंकणी समाजाची सैमीक आनी शास्त्रीय लिपी. एका थारावीक काळांत इतिहासीक कारणांक लागून रोमी लिपी गोंयांत आयली आनी कोंकणी भाशेक चिकटली. परकी सत्ता वचून आमची सत्ता आयली तशी परकी लिपी वचून आमची लिपी येवपाची गरज आशिल्ली. पूण शेंकड्यांनी वर्सांची गुलामगिरीची मानसीकताय सहजपणान कशी कितें वचत आशिल्ली? कांय जाणांनी आपले सोयी खातीर रोमी लिपयेचो संबंद धर्मा कडेन जोडलो. धर्मा कडेन संबंद जोडले उपरांत तो राजकारणाचो विशय जालो. राजकारणांत साहजीकच भाशेचो मोग उणो आनी मतांचो चड!
खंयच्याय एका विशयाची जेन्ना शास्त्रीय वा तत्वीक बसका खबर नासता तेन्ना त्या विशयाचेर तज्ञांचीं मतां जाणून घेवप हें लोकप्रतिनिधींचे कर्तव्य आसता. तशें केलें ना जाल्यार लजेक पडपाची परिस्थिती येता. गोंयकारांनी हें अणभवलां.
कॉंग्रेस पक्षाचे सद्याक तीन आमदार विधानसभेंत आसात. तिगूय जाण पयलेच खेपे आमदार म्हूण निवडून आयल्यात. भाशीक आनी शिक्षणीक मुद्द्यांचेर हे आमदार भुमिका घेतात ती पळयल्यार कॉंग्रेसीच्या ध्येय धोरणां विशीं तांकां कितलें ज्ञान आसा म्हणपाचो दुबाव येता. कोंकणी भास आनी तिची लिपी ह्या विशयाचेर कॉंग्रेस पक्षाच्या फुडाऱ्यांनी 1987 वर्सा निमणी म्होर मारल्या. आपल्या राजकी सुवार्था खातीर काळा भायरे, समाजा मदीं वणटी उब्यो करपी मुद्दे भाशेचे बाबतींत हे आमदार मांडटात तेन्ना तांची काळकूट दिसता. ह्या पक्षाचे अध्यक्ष तरणाटे आनी पक्षांत नवे आशिल्ल्यान तांकांय घडये पक्षाच्या आदल्या भाशीक धोरणांचो विसर पडिल्लो आसूं येता.
आयज विंगड विंगड धर्मांचे गोंयकार भुरगे तशेंच हेर प्रांतांतल्यान गोंयांत स्थायीक जाल्ले हजारांनी भुरगे देवनागरी लिपयेंत कोंकणी भास शिकतात. कोंकणी विशयांत धावी, बारावी, पदवी आनी पदव्युत्तर सारख्या परिक्षांनी पास जावपी विद्यार्थ्यां मदीं सगल्या समाजांतले, धर्मांतले भुरगे आसतात. कोंकणी भास शिकतना देवनागरी लिपयेचो वापर केल्ल्यान तांकां हिन्दी भाशेचें अध्ययन सोंपें जाता म्हणपाचें अणभव सांगता. एखाद्या भारतीय भाशे खातीर परदेशी लिपयेचो वापर शिक्षणांत जाता म्हणपाची देख भारतांत खंयच मेळची ना.
कर्नाटक राज्यांत कोंकणी भाशे खातीर कन्नड आनी देवनागरी लिपयेचो वापर करपाची मेकळीक दिल्या म्हणपाचें आमदार कार्लूस फेरेरा हांचें म्हणणें आसा. गजाल खरी आसली तरी तांकां वास्तवाची जाण ना. कर्नाटकांत सरकारान 2007 वर्सा सावन 6 वी ते 10 वी मेरेन देवनागरी वा कन्नड लिपयेंतल्यान कोंकणी तिसरी भास म्हूण शिकोवपाक मान्यताय दिल्या. ताचें कारण देवनागरी ही कोंकणी भाशेची सभावीक लिपी आनी कन्नड ही त्या राज्याची थळावी लिपी आसा. राजभाशेंतय त्या लिपयेक मान्यताय आसा. आतां मेरेन त्या राज्यांत चार- पांच हजार भुरगे कोंकणी विशय घेवन धावी यत्ता पास जाल्यात. कर्नाटकांत माध्यमीक पांवड्यार कोंकणी भास घेवन सद्याक शिकपी भुरग्यांची संख्या 260 इतली आसा. हीं सगलीं भुरगीं देवनागरी लिपयेंत शिकतात हें विशेश! ह्या शाळांनी कोंकणी भास शिकोवपी शिक्षकांचो पगार मंगळुरूचें विश्व कोंकणी केंद्र दिता. वांगडाच विद्यार्थ्यांक शिश्यवृत्ती भेटयता. डॉ. कस्तुरी मोहन पै हांचें ह्या वावरांत विशेश योगदान आसा.
विधानसभेंतले चर्चेंत उलयतना आमदार क्रुझ सिल्वा हाणी आपले चवथी यत्तेंत शिकतले धुवेची देख दिली. ती खंय कोंकणी विशयाच्या वर्गांत न्हिदता! क्रुझबाब, कोंकणी विशय रोमी लिपयेंत शिकयल्यार ती जागी उरतली हाची तुमकां खात्री आसा. आनी लिपयेचो संबंद फकत बरोवपा कडेन येता. उलोवपा कडेन न्हय. तुमचे धुवेक जेन्ना माध्यमीक पांवड्यार हिन्दी विशय शिकचो पडटलो तेन्ना तुमी तेय भाशे खातीर रोमी लिपयेची मागणी करतले व्हय?
रोमी लिपयेंतल्यान शिकपाचें आसल्यार दालगादो कोंकणी अकादमी सारख्या संस्थेंतल्यान शिकपाची वास्तव आनी योग्य सुचोवणी मुख्यमंत्र्यांनी केल्या. जो समाज उदरगतीशील आसता तो सदांच काळा भायलें आसा तें फाटल्यान दवरून फुडाराचीं पावलां मारता. जाल्यार कांय जाणांक काळखांतच रावपाक आवडटा. लिपयेच्या नांवान भुरगे पिरायेचेर धर्मीक वेगळोचार तयार करपी हो अविचार. गोंयच्या फुडारा खातीर भोव हुस्क्याचो. एक कोंकणी समाज पूण भाशेचे दोन वर्ग, दोन पाठ्यपुस्तकां, दोन शिक्षक, दोन प्रस्नपत्रिका आदीं.
राजभास कायद्या प्रमाण गोंयच्या शासकी नोकऱ्यां खातीर कोंकणी भाशेच्या गिन्यानाची गरज आसा. कोंकणी भास म्हणल्यार देवनागरी लिपयेंतली कोंकणी भास अशी कायद्याची व्याख्या आसा. रोमी लिपयेची मागणी करतल्यांनी हाचो विचार करपाची गरज आसा.
भाशेच्या शिक्षणा खातीर खंयची लिपी वापरप हो शिक्षणतज्ञांनी आनी भासशास्त्रींनी घेवपाचो निर्णय. तांकांच तो घेवं दी. आमी रोमी लिपयेंतल्या साहित्याक आनी सर्जनशिलतायेक पोसवण दिवयाच. पूण शालेय शिक्षणांत फकत देवनागरीच आपणावया! काळाची गरज ती!!

अनंत अग्नी
9422439903