भांगरभूंय | प्रतिनिधी
मरण अायिल्ल्याच्या कुटुंबाक 35.42 लाख रुपया लुकसाण भरपाय दिवची
-उत्तर गोंय मोटार अपघात दावो न्यायाधिकरणाचो आदेश
म्हापशेंः करासवाड्यार ट्रक आनी दुचाकी हांचे मदीं जाल्ल्या अपघातांत मरण आयिल्ल्या शामल शैलेश नाबर (39, आकय) हिचो दावेदार घरकार आनी भुरग्यांक 35.42 लाख रुपया ‘नो फॉल्ट दायित्व’ रकमे सयत भरपाय दिवपाचो आदेश उत्तर गोंय मोटार अपघात दावो न्यायाधिकरणान (लवाद) ट्रक चालक आनी धनयाक दिला.
ह्या प्रकरणांत शैलेश गजानन नाबर, धूव प्रिथा शैलेश नाबर आनी चलो जैमीन नाबर हांणी प्रतिवादी ट्रक चालक हाजीमलांग मुर्तूश शेख (तीन माड कुचेली, मूळ मुस्लिमवाडो-भोम) आनी ट्रक धनी कुलंदाई येसू (कोलवाळ) हांचे अाड लवादा कडेन याचिका दाखल करून लुकसाण भरपाय म्हूण 36.70 लाख रुपया रकमेचो दावो केल्लो. ही याचिका 14 डिसेंबर 2019 त दाखल जाल्ली.
अपघातांत मरण आयिल्ली शामल नबार ही दोनपावला लुसीड ट्रेईल्स एंटरटेनमेंट प्रा. लि. कंपनींत सोशल मिडिया मार्केटींग एक्झीक्युटिव्ह म्हूण नोकरेक आशिल्ली. तिका म्हयन्याक 20 हजार रुपया वेतन मेळटालें. ते प्रमाण तिचे वर्सुकीं उत्पन्न 2.40 लाख रुपया आशिल्लें.
तशेंच सर्वोच्च न्यायालयान निश्कर्शा प्रमाण मरण अायिल्ली व्यक्ती निश्चीत पगाराचेर आसत आनी ताची पिराय 40 वर्सां परस उणी आसल्यार तिच्या उत्पन्नांत 40 टक्के वाड करची. ते प्रमाण शामल हिचे वर्सुकीं उत्पन्न 3.36 लाख आशिल्लें.
तशेंच मरण आयिल्ल्या व्यक्तीची पिराय 36 ते 40 मजगतीं आसल्यार दावेदार लुकसाण भरपाये खातीर पात्र आसा. ते प्रमाण भरपाय रक्कम 33.60 लाख रुपया तिचेर निंबून आशिल्ल्यांचें लुकसाण जालां,
असो निश्कर्श लवादान नोंदोवन डिसेंबर 2020 पसून 6 टक्के वर्सुकीं कळंतरा सयत 35.42 लाख रुपया लुकसाण भरपाय दाव्याच्या स्वरूपांत दिवपाचो आदेश लवादाचे वांगडी एडगर फर्नांडीस हांणी दिला.
दावेदारांक देय रक्कमेंतल्यान दरेकी 3.50 लाख रुपया रक्कम तांच्या नांवान तांचे पसंतीच्या खंयचेय राष्ट्रीयकृत बँकेंत कायम ठेवींत एक आनी तीन वर्सांच्या कालावधी खातीर गुंतवणूक करची आनी उरिल्लीं रक्कम तांच्या खात्यांतूच धनादेशा वरवीं जमा करपाचे निर्देश ह्या निवाड्यांत लवादान दिल्यात.
याचिकादारा वतीन अॅड. डी. गांवकार हांणी जाल्यार प्रतिवादी वतीन अॅड. एस. पाटील हांणी लवादा कडेन युक्तीवाद केलो.
मजगतीं, हो अपघात करासवाड्यार 9 मार्च 2020 त सकाळीं 7.45 वराच्या सुमाराक घडिल्लो. मरण आयिल्ली शामल नबार ही जीए 03 एजे 2942 क्रमांकाच्या अॅक्टीवा दुचाकी वयल्यान भुरग्यांक म्हापश्यां शाळेंत पावोवन घरा वताली. जाल्यार घडणूक थळार स्कुटरीक जीए 03 एन 3400 क्रमांकाचो आयचर ट्रकाचो धपको बशिल्लो. हो ट्रक हाजीमलंग शेख चलयतालो. अपघाताचो पंचनामो तेन्नाचे पुलीस उपनिरिक्षक आशिष पोरोब आनी हवालदार भगवान शेटकार हांणी केल्लो.
सर्वोच्च न्यायालयाच्या निश्कर्शा प्रमाण मरण अायिल्ली व्यक्ती निश्चीत पगाराचेर आसत आनी ताची पिराय 40 वर्सां परस उणी आसल्यार तिच्या उत्पन्नांत 40 टक्के वाड करची. ते प्रमाण शामल हिचे वर्सुकीं उत्पन्न 3.36 लाख आशिल्लें.
मरण आयिल्ल्या व्यक्तीची पिराय 36 ते 40 मजगतीं आसल्यार दावेदार लुकसाण भरपाये खातीर पात्र थारता. ते प्रमाण भरपाय रक्कम 33.60 लाख रुपया तिचेर निंबून आशिल्ल्यांचें लुकसाण जालां,
असो निश्कर्श लवादान नोंदोवन डिसेंबर 2020 पसून 6 टक्के वर्सुकीं कळंतरा सयत 35.42 लाख रुपया लुकसाण भरपाय दाव्याच्या स्वरूपांत दिवपाचो आदेश लवादान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
