भांगरभूंय | प्रतिनिधी
म्हापशें: बंदीरवाडो, बादेड शापोरा फाटल्या दोन म्हयन्यां सावन अनियमीत उदका पुरवण जाता. ताका लागून थळावे लोक आक्रमक जाल्यात. उदका पुरवण विभागांतले कर्मचारीच उदक वाडी, शिवोली वाठारांत घुंवडायतात, असो गंभीर आरोप ह्या लोकांनी केला.
बिरेस्तारा सकाळीं आक्रमक जाल्ले थळावे लोक एकवटीत जाले. बायलो हातांत कळसुल्यो घेवन भायर सरल्यो. ह्या वेळार आदले उपसरपंच सागर नायक, आदले पंच संदेश खोर्जुवेंकार आनी लोक व्हड संख्येन हाजीर आशिल्ले.
वाडी शिवोली आनी बंदीरवाडो, बादे, शापोरा ह्या वाठारांनी पयऱ्यान उदका पुरवण करतात. बिरेस्तारा बंदीरवाडो, बादे, शापोरा वाठारांत उदका पुरवण करपाचो दीस आशिल्लो. पूण त्या दिसा वाडी शिवोले उदका पुरवण केली. हाका लागून लोक खुबळ्ळे आनी तांणी कर्मचाऱ्यांक जाब विचारलो. उदका पुरवण खात्याच्या कनिश्ठ अभियंत्यांक आपोवन हाडले आनी वाडी वाठारांत उदक सोडिल्ल्याचें तांचे नदरेक हाडून दिलें. हो प्रकार ताकतिकेन बंद करचो, ना जाल्यार खर आंदोलन हातांत घेवपाची शिटकावणी खुबळिल्ल्या लोकांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
