भांगरभूंय | प्रतिनिधी
सुभाष वेलिंगकार हांच्या वक्तव्याक लागून चालू आशिल्लो वाद अजून शांत जावंक ना. काल सांजवेळा मेरेन ते विशीं खबरो, पत्रकां, सोशल मिडियाचेर व्हिडीयो येताले. शेनवारा रातीं मडगांव आंदोलन गुठलावन लोक घरा गेल्ले. पूण उबे आशिल्ल्या कांय आंदोलकांक धांवडावपाक पुलिसांनी लाठीमार केलो, तातूंत पत्रकार, कामा वयल्यान घरा वचपी तरणाट्याकूय मार खावचो पडलो. एकल्याक दुचाकी चालकाक आंदोलकांनी हॅल्मेटान मारलो. काल आयताराय पुलीस आनी आंदोलकां मदीं बाचाबाची जाली. आतां प्रा. वेलिंगकार हांच्या समर्थना खातीर हिंदुत्वनिश्ठ संघटनांचे वावुरपी देवल्यात. बोडगेश्वर देवळा मुखार जाल्ले सभेंत, प्रा. वेलिंगकार हांकां अटक जाल्यार गोंय पेटून उठ्ठलें अशी शिटकावणी तांणी दिल्या. ते वटेन पुलीस प्रा. वेलिंगकारांक सोदतात. तांच्या घराचेर नोटिसो लावन येतात. हाचे आदीं फादर बोल्मॅक्स हांचे आडूय असोच बोवाळ जाल्लो. धर्मीक भावना दुखिल्ल्यान तांणी निमणी माफी मागिल्ली. तांचे आड उपरांत याचिकाय दाखल जाल्ली. कोर्टान ती भायर मारली. प्रा. वेलिंगकार हांणीय माफी मागून हें प्रकरण सोंपोवचें, अशी मागणी कांय समाजीक फुडाऱ्यांनी मारल्या. हो लेख बरय मेरेन तरी प्रा. वेलिंगकार मेळूंक नाशिल्ले.
गोंयांतलें वातावरण तशें शांत. कांय वर्सां पयलीं कुडचड्यार व्हडलो वाद, बोवाळ जाल्लो तितलोच. हेर राज्यांनी मिरवणूक धर्मीक थळा मुखार थांबोवन माराण मारले म्हूण दंगल जाता. कोणे थळा मुखार मास उडयलें जाल्यार दोन धर्मीक गट एकमेकांच्या आंगार वतात. पुलीस, लश्कराचेर गुंडे मारतात. गाय व्हरतना कोणूय दिसलो काय ताच्या आंगार धांवतात. आमच्या भांगराळ्या गोंयांत तशें दिसना. कारण, गोंयची लोकसंख्या उणी. पयलीं सावन सगले एकमेकांक वळखतात, वांगडा शिकतात, खेळटात. म्हणटकच कडवेंपण तांच्या आंगांत ना. हाच्यो देखी दिवपाची गरज ना. मात, काळ बदल्ला, तशे सगल्याच धर्मांचे, पंथांचे कांय लोक (सगलेच न्हय) चड कडवे जाल्यात. हम करेसो कायदा पद्दतीन वागपाक लागल्यात. भावचार, मोग, मायपासाचें कपयाळें पिस्टून उडोवपाचें कर्म कांय भायल्या सुवार्थी लोकांनी केलां. तांकां आमच्या नीज गोंयकारांचीय साथ मेळ्ळ्या. हांगाच्या धर्मीक, समाजीक एकचाराक वेर वचपा सारकी परिस्थिती निर्माण जाल्या. फुडले पिळगेचेर हाचे परिणाम जावपाची भिरांत न्हयकारपाक येना. कारण, आतांच कांय म्हापुरुशां विशीं तांच्या मनांत गैरसमज आशिल्ल्याचें जाणवता. कोणे भरलें हें वीख तांच्या काळजांत? कित्या खातीर? ते नोकरेक लागतले, संवसार मांडटले तेन्ना गोंयचो समाजीक एकवट सांबाळटले काय? काय एकमेकांक दुस्वासान पळयतले? काय भायर एक भितर एक करतले? गोंयची एक वळख आसा, ती पुसू वचपाक लागल्या. ही हुस्क्याची गजाल.
शिक्षकांनी, कलाकारांनी, विचारवंतांनी, धर्मीक, समाजीक संस्थांनी सध्या चलपी हो वाद बेगीन शांत जावचो हे खातीर पेंगट बांदून वावराक लागचें पडटलें. कांय जाणांनी शांतीकायेचो उलो मारला. पूण, चोंब्यांनी रस्त्यार देंवले काय सुशिक्षीत, शांत, मोगाळ मनीस पसून आक्रमक जाता. तेन्ना सगल्यांची तिडक न्हिवोवपाचें काम झुजा पावंड्यार करचें पडटलें. राज्या मुखार पर्यावरणाच्या इबाडा सारक्यो जायत्यो व्हडल्यो समस्या आसात, गोंय गोंयकारां खातीर फुडाराक सुरक्षीत दवरपाचेंय काम आसा. तेन्ना शांतीकाय राखून निशेध करचो, अशें इगर्जमातेन म्हणलां. गोंयांतलो धर्मीक एकवट कायम उरपाक जाय, तेन्ना कायद्यान कितें आसा ती कारवाय सरकारान करची, असो उलोय तिणें मारला. बऱ्याच समाजीक फुडाऱ्यांच्या मतान, जमनींचें रुपांतर आनी विक्रे वयलें लोकांचें लक्ष दुसरे कडेन वच्चें म्हूण हो वाद मुद्दाम तयार केला. रुपांतरीत जाल्यात, त्यो जमनी सरकार, कोमुनिदादीच्यो काय खाजगी ताचो सोद घेवन त्यो विकतात कोण तें पळोवचें पडटलें. गोंय जर अशें भलत्याच लोकांच्या हातांत गेलें जाल्यार फाटल्या काळा प्रमाण आमचेर परतून गुलामा वरी जगपाचो वेळ येवं येता.
दोनूय वटेनच्या लोकांनी धर्मीक अशांततायेचे
बाबतींत आमचें गोंय हेर कांय राज्यांचे वाटेर वच्चें
न्हय, हे खातीर शितीदान पावलां उबारचीं. प्रधानमंत्री मोदी हांणी आठ म्हयन्यां पयलीं गोंयची शांतीकाय,
एकचारा खातीर तुस्त केल्ली. आदलें कितें तरी उस्तुन काडून ताचो सदांच फायदो जाताच अशें ना. केन्ना तें बुमरँग जाता. मागीर समाजाक, फुडल्या पिळग्यांक ताचे परिणाम भोगचे पडटात, हाचीय जाण दवरुंक जाय. आमी गोंयकार शाणे, विचारी जावंया. गोंय, गोंयकार गोंयकारपणाच्या प्रस्नांचेर लक्ष आनी लक्ष्य केंद्रीत करुंया. आंगांतलो सर्वधर्मसमभाव जागोवया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
