शांत न्हीद : बरे भलायकेचो कानमंत्र

भांगरभूंय | प्रतिनिधी

न्हीद म्हणजे मनशाचें अर्दें आयुश्य अशें आमचे पुर्वज म्हणटाले. आदल्या तेंपार लोक रातचे वेळार न्हिदप आनी फांतोडेर उठप हो नित्यक्रम पाळटाले. कश्ट करताले. देखून तांकां पुरो जातालें आनी रोखडीच झेम पडटाली. 

आयज आमची जिणेशैली बदल्ल्या. राहणीमान, जेवणखाण हातूंत व्हडलो फरक पडला. कांय लोक कामाचें, जेवणा- खाणाचें वेळापत्रक तयार करतात, तरीय तातूंत बदल जाता. कसलीय बादा मदीं येताच. जेवण करचे वेळार नळाचें उदक वता. लायट टप्प करून वता. मागीर हातांत घेतिल्लें काम थोड्या वेळा खातीर लांबणेर पडटा. झपाझप कामां जायनात. 

केन्नाय सकस आहारा बदला वेळ नाशिल्ल्यान कितेंय खांवचें पडटा. केन्नाय कामाक उशीर जाता, ताका लागून ताकतिकेन कितेंय चाबडावचें पडटा. ताका लागून आहारांत बदल घडटा. रातचें उसरां जेवप, टीव्ही पळयत पळयत पाऊण वर जेवप, मोबायल पळयत जागरणां करप, हें भलायकेक बरें न्हय. 

उसरां जेविल्ल्यान आमचे न्हिदेचेर वायट परिणाम जाता. अन्न पचपाक खूबसो वेळ लागता. पोटाचेर ताण येता आनी न्हीद येवपाक आडमेळीं येतात. बेगीन जेवले जाल्यार न्हिदचे पयलीं आंगणांत, बाल्कनींत शतपावली घालप, थोडें चलप चड बरें. 

दुसरें म्हणल्यार उसरां जेवल्यार मोटसाण, एसिडीटीचो त्रास जाता. ताळ्या कडेन जळजळ, धेंकर, अपचन असले उपद्रव जातात. उसरां जेवल्यार आमची कूड उसरां न्हिदपाक तयार जाता. उसरां न्हिदल्यार भलायकेच्यो तरातरांच्यो कागाळी सुरू जातात. फट दिसता जाल्यार मुद्दाम एक दीस रातचें जागरण करून पळयात.

सकाळी उठूंक आळस येता. सभाव चिडचिडो, तापट जाता. नाश्तो खायन दिसना. कामार वचन दिसना. म्हणून म्हणटा वेळाचेर आहार घेवचो. रातचो हलको आहार घेवचो. मात्सो व्यायाम करचो. रातचें णवा पयलीं जेवचें. साडेधाच्या सुमाराक हाथरुणार पडचें. सकाळीं साता पयलीं उठचें. हो कानमंत्र लक्षांत दवरात. 

गोड गोड चाॅकलेट

चाॅकलेट कोणाक आवडना. ल्हान भुरग्यां पसून जाण्ट्यां मेरेन सगल्यांक ती आवडटा. इक्लेर, काॅफी बायट, मेलडी, कच्चा मँगो, कच्चा कैरी अश्यो कितल्याच तरांच्यो चाॅकलेटी तोंडांत उडोवपाची संवय सगल्यांक जाल्या.आतांच्या तेंपार म्हारग्यो कॅडबेरी, किटकॅट, पर्क अश्यो चाॅकलेटी बाजारांत मेळटात. 20 ते 50 रुपया एक. पूण खूबजाण, खास करून तरणाटे त्यो विकत घेतात आनी आपले आवडटे व्यक्तीक दितात.

चाॅकलेटींची लोकप्रियता पळोवन ह्या उत्पादनां खूब वाड जाल्या. वेगवेगळ्या रुचीच्यो चाॅकलेटी मेळटात. प्रत्येकाची आवड वेगळी. चाॅकलेट खंयच्याय वेळार खावं येता. ती खावपाक वेळाचें बंधन ना. कोण टाॅफी खातात, तर कोण मोव लुसलुशीत कॅडबेरी. भुरग्याच्या वाडदिसाक ताका माणकुलीं भुरगीं चडशीं म्हारग कॅडबेरी दितात. खोशेच्या वेळार कॅडबेरी गिफ्ट म्हूण दिवपाचें सध्या फॅड आयलां. व्हॅलेंटायन डे, फ्रेंडशीप डे, मदर्स डे, सिनीयर सिटीझन डे, भाऊबीज, रक्षाबंधन ह्या दिसांनीय एकमेकांक कॅडबेरी दिवन आपलो मोग व्यक्त करतात. 

संवसारांत चाॅकलेट डे मनयतात. ते दीस चाॅकलेटीची लोकप्रीयता कितली तें कळटा. खरेंच चाॅकलेट ती मागीर सादी जावं, कॅडबेरी जावं सगल्यांत लोकप्रीय जिनसां मदीं तिचो आसपाव जाता. चाॅकलेट हें आनंद, खोशी, उत्सवाचो संगम जावन आसा. जें लोकां मदीं मोग, आपुलकेचें नातें निर्माण करता. ते जणएकल्याच्या जिवितांत गोडसाण वाडयता आनी सुखद, अनुभुती दिता. भलायकी बरी दवरता. 

चाॅकलेट घेतना, दुसऱ्यांक दितना एक सुंदर नातें निर्माण जाता. त्या वेळार मुखार बशिल्लो गुलाबाचे नाजूक कळये प्रमाण फुलून वता. चाॅकलेट जिबेचेर दवरली काय विरघळून वता. सुवादीक काजू, बदाम आशिल्ली कॅडबेरी आनीक खायन दिसता. एकमेकांच्या मोगाच्या जाळ्यांत गुरफटून वता जणएकलो, अशी ही चाॅकलेटीची किमया. गोडेंमुताचें दुयेंस आशिल्ल्यां खातीर पसून खास शुगरफ्री चाॅकलेटी बाजारांत मेळटात. तांणी पसून जाय तितल्यो चाॅकलेटी खावन मौजमजा करपा जाता. भिवपाची गरज ना. 

सिद्धी तिळवे

7972535321