भांगरभूंय | प्रतिनिधी
नवी दिल्ली, खबरां संस्था : शेकड्यांनी वर्सां पयलीं नामनेचे कवी रवींद्रनाथ टागोर हांणी विश्व भारतीची स्थापना केली. त्या शांतिनिकेतन स्थळाक युनेस्कोच्या संवसारी दायज स्थळांचे वळेरेंत आस्पाव केला. युनेस्कोन आयतारा ‘एक्स’चेर (ट्वीटर) ही घोशणा केली. अस्तंत बंगालच्या बीरभूम जिल्ह्यातल्या ह्या स्थळाक संवसारीक दायज म्हणून मान्यताय मेळचे खातीर भारत कडल्यान फाटपुरवण करप चालूच आसलें. सध्या सावदी अरेबियांत सुरू आशिल्ल्या संवसारीक दायज समितीचे बसकेंत हो निर्णय घेतलो. अस्तंत बंगालाची मुख्यमंत्री ममता बॅनर्जी हांणी, आमचे खातीर ही व्हड अभिमानाची गजाल अशें म्हणलें.
नामनेची पुरातत्व वास्तुविशारद आभा नारायण- लांबा हांणी हे खातीर दस्तावेज तयार केल्ले. कांय म्हयन्यां आदीं ह्या वाठारांतली आंतरराष्ट्रीय सल्लागार संस्था आयकोमॉस हांणी शांतिनिकेतना विशीं युनेस्कोक शिफारस केल्ली. शांतिनिकेतन हें विद्यापीठाचें शार कोलकात्ता सावन १६० किलोमीटराचेर आसा. रवींद्रनाथ टागोर हांचे बापूय देबेंद्रनाथ हांणी हांगा सगळ्यांत पयलीं एका आश्रमाची स्थापना केल्ली. हांगा ध्यानधारणे खातीर प्रवेश दितना कसलेच तरेचो जातीपंथ भेदभाव करिनात.
गुरुदेव रवींद्रनाथ टागोर हे व्हडले कवी, कथाकार, कादंबरीकार, संगीतकार. तांणी भारत, बांगलादेश आनी श्रीलंकेचें राष्ट्रगीत बरयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
