भांगरभूंय | प्रतिनिधी
कोलकाता, खबरां संस्था ः अस्तंत बंगालांतल्या बीरभूम जिल्ह्यांत आशिल्ल्या शांतिनिकेतनाचो सप्टेंबर 2023 वर्सा युनेस्कोच्या संवसारीक दायज वळेरेंत आस्पाव जालो. नोव्हेंबरांत विद्यापिठांतल्या फातराच्या फळयेचेर प्रधानमंत्री नरेंद्र मोदी आनी कुलगुरू हांचीं नांवां आशिल्लो फलक लायलो आनी व्हड वाद निर्माण जाल्लो.
बिरेस्तारा 7 डिसेंबराक वादग्रस्त फलक बदल्ला. विद्यापिठांत लायिल्ल्या नव्या फलकांचो मजकूर केंद्रीय शिक्षण मंत्रालयान मान्य केला. ह्या फलकाचेर प्रधानमंत्री आनी कुलगुरू हांचीं नांवां काडल्यांत आनी टागोरांचें नांव दवरलां.
नव्या फलकाचेर अशें बरयलां, ‘गुरुदेव रवींद्रनाथ टागोर हांणी 1901 वर्सा अस्तंत बंगालाच्या गांवगिऱ्या वाठारांत स्थापन केल्ले शांतिनिकेतन हे भारताच्या शास्त्रीय परंपरेंतल्यान रुजिल्ली शिक्षण आनी शिक्षणाचें केंद्र जालें. ’
शांतिनिकेतन हें संवसारीक दायज स्थळ म्हूण जाहीर जालें तेन्ना ऑक्टोबर-नोव्हेंबरांत विद्यापिठाच्या वेवस्थापनान 3 फलक लायले. फलक लायल्या उपरांत वाद सुरू जालो आनी ताकाच लागून हो बदल केला.
नव्या फलकाचेर टिका करून मुख्यमंत्री ममता बॅनर्जी हांणी विद्यापिठाच्या प्रशासनाक मुजत दिल्ली. तिणें सांगिल्लें – शांतिनिकेतनाची वळख रवींद्रनाथ टागोरा कडेन आसा आनी ताचें नांव फलका वयल्यान काडून उडयलां. आमी दुर्गा पुजेक लागून ओगी राविल्ले.
विश्व भारती विद्यापिठान 24 वरां भितर टागोराचें नांव आशिल्लो फलक लावंक ना जाल्यार कविगुरूंचो फोटो हड्ड्यार लावन आमी निशेध करतले. शुक्रारा 27 ऑक्टोबराक तृणमूल काँग्रेसीच्या फुडारी आनी कार्यकर्त्यांनीय विद्यापिठा भायर निशेध केलो.
शांति निकेतन संबंदीत इतिहास
रवींद्रनाथ टागोरांचो बापूय देबेंद्रनाथ टागोर हांणी 1863 वर्सा शांतिनिकेतन आश्रम म्हणून सुरू केल्लो. 1901 वर्सा रवींद्रनाथ टागोरान ताचें रुपांतर गुरूकुल पद्दतीचेर आदारिल्लें शाळा आनी कला केंद्रांत केलें.
टागोरान हांगा 1921 वर्सा विश्वभारतीची थापणूक केली आनी 1951 वर्सा ती केंद्रीय विद्यापीठ आनी राश्ट्रीय म्हत्वाची संस्था म्हूण जाहीर जाली. रवींद्रनाथ टागोर हांगा बरोच काळ रावले. संवसारभर 1172 संवसारीक दायज थळां आसात. शांतीनिकेतन हें भारतांतलें 41 वें दायज थळ संवसारीक दायज वळेरेंत आस्पाविल्ले आसा. कितलेशेच दीस ताचो दायज वळेरेंत आस्पाव करपाची मागणी आशिल्ली.
हाचे आदीं आग्राचो किल्लो, अजिंठा लेणी, ताजमहाल, कोणार्क सूर्य देवूळ, काझीरंगा राश्ट्रीय उद्यान, फतेहपूर सीक्री, सांची आनी जयपूरचो जंतर मंतर ह्या सारक्या जायत्या दायज थळांचो आस्पाव हे वळेरेंत केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
