भांगरभूंय | प्रतिनिधी
पुलीस कर्मचाऱ्यांनी आपले मायभुंयेची राखण करपाक केल्ल्या त्यागाचो भोवमान करपाक भारत सरकार 21
आॅक्टोबराक पुलीस यादस्तीक दीस मनयतात. 1959 वर्सा लडाखांत चिनी सैनिकांनी घात करून कांय पुलिसांक जिवेशीं मारिल्ले.
भारत- चीन शिमेचेर तणाव चड आशिल्लो तेन्ना 21 ऑक्टोबर 1959 दिसा अक्साय चीनाच्या हॉट स्प्रिंग्सांत ड्युटीचेर आशिल्ल्या 10 भारतीय पुलीस अधिकाऱ्यांचेर चीनी सैन्यान हल्लो केलो. पुलीस अधिकाऱ्यांचेर गोळीबार जालो तेन्ना ते टोही मिशनाचेर आशिल्ले. ह्या फारपेटांत जायत्या जाणांक मरण आयिल्लें आनी जायते जखमी जाल्ले. हे घडणुके उपरांत 23 दिसांनी 13 नोव्हेंबर 1959 दिसा जवानांच्यो कुडी भारता वटेन परतून हाडलीं आनी उपरांत लश्करी भोवमानान निमाणे संस्कार जाले.
पुलीस महानिरिक्षकांच्या वर्सुकी परिशदेन जानेवारी 1960 त ह्या धाडसी पुलीस अधिकाऱ्यांचो उगडास करून आनी देशांत, परदेशांत देशाची सेवा करपी सगळ्या पुलीस अधिकाऱ्यांक मान दिवपाक 21 ऑक्टोबर हो पुलीस यादस्तीक दीस मानपाचो निर्णय घेतलो
या दिसा देशभरांतल्या पुलिसांनी केल्ल्या त्यागाचो भोवमान करतात. पुलीस अधिकारी कर्तव्यां करतना जीव कसो धोक्यांत घालतात आनी नागरिकांची राखण करपाक, यदो आनी सुवेवस्था सांबाळपा खातीर दर दिसा कश्ट घेतात हाचे कडेन हो दीस लक्ष ओडटा.
गोंय पुलिसांनीय निस्वार्थीपणान गोंयकारांची सेवा केल्या आनी शहिद जाल्ल्या आपल्या हुतात्म्यांचो ते अभिमान बाळगिता. ह्या दिसा निमतान मुखेल हवालदार बलराम बी शिंदे, पुलीस उप निरिक्षक परवेज गोम्स, हवालदार शैलेश के गांवकार आनी पुलीस हवालदार विश्वास बी देयकार हांकां श्रद्धांजली.
परवेज गोम्स
मुरगांव रावपी पीएसआय परवेज गोम्स हांची थेट पुलीस उपनिरिक्षक म्हणून भरती जाली. 16 मार्च 2013 दिसा तो हवालदार मारुती धुपवाडकार हांचे वांगडा फोंड्यां येरादारीच्या कामाचेर आशिल्ले. साडेसातांक अमिगोस जंक्शन, कुर्टी ताका वेगान चलपी ट्रक दिसलो आनी तांकां थांबपाचो संकेत दिलो. ड्रायव्हरान तशीच गाडी मुखार व्हेली. दुबावान परवेज मोटारसायकलीचेर फाटोफाट गेले उपरांत ताणें ट्रकाक ओव्हरटेक करून रावपाक सांगलें. पूण ट्रक रावलो ना. ताणें गोम्साक मोटारसायकली वांगडा सुमार 20 मीटर अंतराचेर फरफटत व्हेलो. जखमी गोम्स हांकां उपचारा वेळार मरण आयलें.
शैलेश गांवकार
हवालदार शैलेश के. गांवकार 16 जानेवारी 2022 चे रातीं नाकाबंदी करतालो. ताका स्कोडा रॅपिड गाडयेन (जीए- 5-डी-6430) गाडयेन ओडून व्हेलो. ड्रायव्हर सोऱ्याचे नशेंत आशिल्लो. शैलेश गांवकार जखमी जाला. ताका जिल्लो हॉस्पिटल मडगांवां व्हेलो, पूण ताका मरण आयलें.
विश्वास देईकार
दुसरे इंडिया रिझर्व्ह बटालियनाचे विश्वास बी. देईकार हे 16 जानेवारी 2022 चे रातीं नाकाबंदी करतना स्कोडा रॅपिड क्रमांक जीए-05-डी-6430 गाडयेन ओडून व्हेलो. ताका जीएमसी हॉस्पिटल बांबोळे मरण आयलें.
जॉन आगियार
98221 59705
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
