भांगरभूंय | प्रतिनिधी
अहिल्यानगर, खबरां संस्था: शनी शिंगणापूर संस्थानाचे सीईओ नितीन शेटे हांणी शनी शिगणापूर वाठारांतूच आशिल्ल्या तांच्या घरांतूच आत्महत्त्या केल्ल्या म्हायती मुखार आयली. फाटल्या कांय दिसां सावन शनी शिगणापूर संस्थान विवीध मुद्यांक लागून चर्चेंत आसा. म्हयन्याभरा आदीं ११४ मुस्लीम कर्मचारी घेतिल्ल्यान संस्थानाच्या विश्वस्त मंडळाचेर आरोप केल्ले. उपरांत देवस्थानाचे बनावट अॅप्स तयार करून पयशांचोय घोटाळो केल्ल्याचो आरोप जाल्लो. ह्या प्रकरणांत सध्या चवकशी सुरू आसा.
नितीन शेटे हांणी आत्महत्त्या कित्याक केली? हाचे कारण आजूनय समजूंक ना. मात विश्वस्त मंडळान केल्ले अनियमीतताये विशीं एफआयआर दाखल केल्या. हे विशीं चवकशी सुरू आसतनाच शेटे हांणी आत्महत्त्या केल्ल्यान हाचो संबंद लुटमारी कडेन आसा काय? असो प्रस्न हजर करता.
शनी शिंगणापूर देवस्थानाचे बनावट अॅप्स तयार करून पयशांचो घोटाळो केल्ल्या प्रकरणांत सायबर खात्याच्या पुलीस उपमहानिरीक्षकांचे देखरेखी खाला चवकशी आनी कारवाय केली. ह्या प्रकरणांत शिर्डी आनी पंढरपुरच्या फाटभूंयेर शनी शिंगणापूर देवळांत देवळाची समिती स्थापन करपाचो राज्य सरकाराचो विचार आशिल्ल्याची म्हायती मुख्यमंत्री देवेंद्र फडणवीस हांणी विधानसभेंत दिल्ली. हे खातीर कायदो करपाची सरकाराची तयारी आशिल्ल्याचेंय तांणी म्हणिल्लें. ह्या देवळाच्या विस्वासू मंडळान कारभारांत केल्ल्या अनियमीतताये विशीं एफआयआर दाखल करपाचे आदेश दिल्ल्याची घोशणा मुख्यमंत्र्यानी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
