भांगरभूंय | प्रतिनिधी
कोंकणी भाशा मंडळ, गोंय ही कोंकणी भाशा, साहित्य, शिक्षण, समाज आनी संस्कृतीचे उदरगती खातीर ओंपिल्ली गोंयांतली एक आद्य संस्था. मंडळ फाटलीं 23 वर्सां शणै गोंयबाब कथामाळ ह्या नांवान एक काणी सांगपाची सर्त घडोवन हाडटा. उपाट, प्रतिश्ठा आनी प्रतिसाद मेळयिल्ले, हे सर्तीक पुराय गोंयच्या 6000 वयर सर्तक वांटेकार जाले. जाल्यार अंदूं हे सर्तीन 19 केंद्रांनी वचून 1,226 हो विक्रमी आंकडो हुंपलो. गोंयभरच्यान हे सर्तींत वांटेकार जाल्ल्या भुरगी, मानेस्तां कडल्यान प्रतिक्रियांच्या रुपांत तयार केल्लो हो अहवाल…
सगल्यांचो हातभार ः भाशा मंडळ
कोंकणी भाशा मंडळ आयोजीत 24 वी शणै गोंयबाब कथामाळ ह्या वर्सा 2 ऑगस्टाक केंद्र पातळेचेर जाली. उपाट प्रतिसाद लाबलो. 1226 भुरग्यांनी एकाच दिसा वांटो घेतलो. हो कोंकणी काणयांचो उत्सव. पुराय सर्तीचें श्रेय उल्हास गांवकार आनी गौरांग भांडिये, पलाश अग्नी आनी 19 केंद्रांतल्या सगळ्यां मानेस्तांक तशेंच वावुरपी समितीचे वांगडी हांकां फावता. तेच भशेन आमकां मानसीक आदार दिवपी एस. सी. ई. आर. टी, गोंयांतलीं विद्यालयां, प्राध्यापक, शिक्षक, आप वावुरपी आमकां हातभार लायला.
कलेच्या मळार वावुरपी जायते कलाकार परिक्षक म्हूण निसुवार्थीपणान परिक्षण करतात. हें करतना आमी तांकां सर्तीच्यो कांय गायड लायन्स दितात, बसका घेतात ताका लेगीत हे जाणकार मनीस उक्ते मनान आदार दितात. तेचवरी ते आमकां सुचोवण्यो दिवन आपले दुबाव पयस करून आमचे वांगडा एका फास्केंत रावन काम करतात. तशेंच भाशा मंडळ भुरग्यांच्या हातात योग्य ते पुस्तक पडचें, तांकां काणयांच्या आदारान आधुनीक विचारांचे लागीं जोडचे. देखून मंडळ शिक्षकां खातीर प्रशिक्षणां दितात. पालकां खातीरय आमी कार्यशाळा आयोजीत केल्यो. ही सर्त जैतीवंत करपा खातीर आमकां सगळ्यांनी हातभार लायला, हेंच आमचें बळगें. हाचें श्रेय आमी तांकांच दितात. कोंकणी भाशा मंडळ तांच्या सदांच उपकारांत रावतलें.
अंदुं विक्रमी आंकडो ः मंगलदास
शणै गोंयबाब कथामाळेन ह्या वर्सा केंद्र पांवडयार विक्रमी आंकडो हुंपलो. केंद्रां 19, वांटेकार सर्तक 1,226 परिक्षक 171, आपवावुरपी आनी सह-आयोजक लागीं- लागीं 250 शालेय पांवडयार वांटेकार विद्यार्थ्यांचो आंकडो 6010, ह्या विक्रमी जैतांत वांटेकार जाल्ल्या दर एकल्याक आमी दिनवासतात म्हणपाचें मंडळाचे सचीव मंगलदास भटान सांगलें.
पूर्व तयारी हें एक आव्हानः उल्हास गांवकार
जुना सावन आमी कथामाळेचे तयारेक लागले. मंडळाची अध्यक्ष रत्नमाला दिवकार, मंगलदास भट, चेतन आचार्य, पुरूषोत्तम वेर्लेकार, गौरांग भांडिये हांचे मार्गदर्शन लाबलें. मुखेलपणान सर्तीच्यो तारखो आनी केंद्रां थारावप जालें. आमी सर्तीचें नियोजन करतना, ह्या वर्सा वांटेकार जावपी भुरग्यांचो आंकडो वाडोवप आनी तशेंच शिक्षण धोरणा प्रमाणें शिक्षकांक प्रशिक्षण दिवप. शिक्षकां खातीर जी. एस. ई. आर. टी. हांच्या जोडपालवान पुराय म्हयनो कार्यशाळा आयोजीत करप. सगळे शिक्षक व्यस्त जावन एन. ई. पी.चे प्रशिक्षणांत आशिल्ले दिसले. उपरांत आमी जी. एस. ई. कडेन उलोवप केलें आनी 2 आनी 10 ऑगस्टाक कथामाळ घेवपा विशीं आमकां दोन म्हयन्यांच्यो कार्यावळी दिवच्यो अशी मागणी केली.
23 जुलयाक चार सुवातेर कार्यशाळा घडोवन हाडल्यो. दुसरे वटेन आमी ह्या वर्सा केंद्रा वाडोवपांचेर भर दिली. तीं केंद्रा खंय ? आनी तांतूंत खंयच्यो शाळा जोडपाच्यो? हाचेर विचार जालो. हे विशीं आमी भाग शिक्षण अधिकाऱ्या कडेन उलयले. उपरांत आमकां 19 केंद्राचे संयोजक, सह-संयोजक थारोवपाचें काम केलें. तांची ऑनलायन बसका घेवन जोड संस्था, आप वावुरपी, परिक्षक, सुवात थारावच्यो आनी आमकां कळोवचें अशें तांकां सुचयलें.
हो सगळो वावर करतना दुसरे वटेन पलाश अग्नीन भाशा मंडळाचे कर्मचारी वांगड्यांक घेवन पत्रकां तयार केलीं. ह्या वर्सा हीं पत्रकां हातांनी शाळेंत पावोवची असो थाराव घेतलो. ही पत्रकां संयोजक आनी सह-संयोजकांनी त्या दिसांनी चलपी जी. एस. ई. आर. टी. एन. ई. पी विशीं 12 जाग्यांचेर कार्यशाळा चलताल्यो त्या सुवातेर वचून हीं पत्रकां संयोजकांनी वांटलीं. तेचपरी संयोजक आनी सहसंयोजकांनी आपल्या केंद्रांतल्या दरेक शाळेक पत्रां पावोवपाचें काम केलें. मजगतीं भाशा मंडळाच्या वतीन चार म्हालांनी, शिक्षकां खातीर पणजी, दिवचल, काणकोण आनी मडगांव प्रशिक्षण कार्यशाळा आयोजीत केल्ल्यो. तांतूंत 480 शिक्षक वांटेकार जाले. तशेंच अंदूं वर्सा, आमकां धारबांदोडयां केंद्रा वेले आमचे संयोजक अमेय नायकान म्हणलें – भागशिक्षण अधिकारी गणेश गावडेच्या मतान,- अंदू वर्सा हे सर्तीत भुरग्यांचो आंकडो वाडटलो. सरकारी प्राथमीक शाळांतल्या 47 भुरगीं वांटेकार जातलीं.
मजगती शिरोडें नवें केन्द्र आशिल्ल्यान आमचे मुखार एक खर आव्हान आशिल्लें. केंद्राचे संयोजक विशाल खांडेपारकार आनी आकाश गांवकार, फ्रांसिस फेर्नांडीस हांणी हें वजें उखलून आमचो भार उणो केलो. ह्या केंद्रात प्रशिक्षण दिवपा खातीर सेगीत आमी दोन बसका घडोवन हाडल्यो. ह्या सर्तींत रत्नमाला दिवकार हिचें खूब मोलादीक मार्गदर्शन लाबलें. ए. डी. आय -क पत्रां करप, प्रशिक्षकांक संदेश धाडप अशीं साबार कामां आमी केलीं. आप वावुरपी आनी प्रशिक्षक आनी चडशे शिक्षक आनी हेर शाळांचे कर्मचारी आशिल्ले. शिक्षण संचालनालय आनी उच्च शिक्षण संचालनालय हांची मान्यताय घेवन प्रशिक्षक आनी आयोजक तशेंच हेरांक ओन डयूटी पत्रां दिवचीं म्हणपाची आमी मागणी केल्ली. ती मागणी मान्य करून आमकां खूब मोलाचें सहकार्य केलें. माँजीनीसाचे वतीन सगळ्यांक शीत-पेयां दिवपाची वेवस्था केल्ली.
राजभाशा संचालनालयाच्या वतीन आमकां अर्थीक आदार लाभलो. ही सर्त जैतीवंत करपा खातीर पड्ड्या फाटल्यान रावन काम करपी सगळे संयोजक, सह-संयोजक थळाव्यो संस्था, अध्यक्ष, सचीव, भांडारी आनी कोंकणी भाशा मंडळाचे वांगडी हांणी रात-दीस एक करून ही सर्त जैतीवंत केली.
(मुखार चलता)
विशाल सिनाय खांडेपारकार
8080622370
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
