भांगरभूंय | प्रतिनिधी
माशेलः कोंकणी चळवळीचे जनक शणै गोंयबाब हांच्या फ्रेंच आनी इंग्लीश नाटकांचे अणकार विद्यार्थ्यांनी बारीकसाणेन अभ्यासचे अशें आवाहन अश्टताशी लेखक मुकेश थळी हांणी केलें. गोंयबाबांच्या पुण्यतीथी निमतान खांडोळें- माशेलांतल्या सरकारी महाविद्यालयात कार्यावळ जाली. थळी आनी प्राध्यापकांनी गोंयबाबांच्या फोटवाक पुष्पांजली अर्पण केली. प्राचार्य पूर्णकला सामंत हांणी गोंयबाबांचें साहित्य वाचून विद्यार्थ्यांनी स्फूर्ती घेवची, कोंकणी भाशा सुदारची असो उलो मारलो.
साहित्य अकादेमी पुरस्कार मेळिल्ले खातीर थळी हांचो प्राचार्य सामंत हांचे हस्तुकीं भोवमान जालो. ते उपरांत पीजी अनुवाद पदविका विद्यार्थ्यां खातीर थळी हांचें बातम्यांचो अणकार ह्या विशयाचेर व्याख्यान जालें. मिडिया खातीर अणकाराची भाशा सोपीं आनी सुटसुटीत आसचीं आनी ते खातीर वाक्यां ल्हान आसचीं अशें थळी हांणी सांगलें. बऱ्या अणकाराचे गुणधर्म आनी मानदंड तांणी देखी दिवन स्पश्ट केलें. कठीण बरोवप सोपें आनी सोपें बरोवप कठीण आसता हो सिद्धांत सांगून सोपें बरोवप सोंपें कशें करप हो कानमंत्र दिलो.
थळी हांणी रेडीयो, टीव्ही आनी खबरां पत्रांत अणकार कसो करतात हें स्पश्ट करून अनुवाद कुशळटायेचे तंत्र आनी मंत्र हे विशीं मार्गदर्शन केलें. अनुवादकान शब्दकोश, वेगवेगळ्या भाशांतलें चौफेर वाचन आनी नेमान सराव ही त्रिसूत्री पुरायेन आपणावची अशें आवाहन तांणी केलें. विद्यार्थ्यांक अणकार करपा खातीर एक उतारो दिवन थळी हांणी विद्यार्थ्यांक वेव्हारीक नदरेन कुशळटाय आपणावप कशी हाची प्रेरणा दिली.
सची नायक हांणी सूत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
