भांगरभूंय | प्रतिनिधी
कोंकणीचे आद्य प्रवर्तक शणै गोंयबाब हांची आयज पुण्यतीथ. ते निमतान….
कोंकणी साहित्य चळवळीचे जनक आनी कोंकणीचे आद्य प्रवर्तक म्हळ्यार शणै गोंयबाब. तांची आयज पुण्यतीथ. तांकां आर्गां ओंपतना हड्डें अभिमानान भरून येता. शणै गोंयबाब हांची जयंती 23 जूनाक मनयतात. खूब कार्यावळी जातात. त्या मानान आज पुण्यतिथीक तितल्यो कार्यावळी जायनात. अजाप दिसता.
शणै गोंयबाबांच्या पुण्यतीथीक आनी जयंतीक कार्यावळी जावंक जाय. सगळे तरेच्यो. सगळ्या पिराय गटां खातीर. विद्यार्थ्यांचो सहभाग जाय. शिक्षकांचो सहभाग जाय. शणै गोंयबाबांच्या साहित्यांतली वासाळ कोंकणी वा तांच्या अणकारीत नाटकांतले नीज शुद्ध कोंकणीचो दिश्टावो घडोवपी संवाद ह्या विशयांचेर एकाडेमीक भासाभास जावंक जाय. अभिवाचन जावंक जाय. परीसंवाद वा वेबिनार जावंक जाय.
चत्राय – जयंती वा पुण्यतीथी दिसा गोंयबाबांच्या फोट्याक हार घालतकच गंभीर चर्चा जावंक जाय. शणै गोंयबाबांच्या साहित्याचेर. हालींसराक कांय नव- विद्वान आनी आप घोशित कोकणी मोगी गोंयचो राजकी फुडार वा राज्याचें पर्यावरण आनी परिसर असले भलतेच विशय निवडून ताचेर तवशें किसचें तशें उलयतात. गोंयबाबांचेर उलयतलो जाल्यार तांच्या साहित्याचें वाचन करूंक जाय. मागीर भासाभास आनी विचार मंथन करप शक्य आसा. भलत्याच विशयाचेर बडबड करून व्हांवप समा न्हय.
शणै गोंयबाब हांची जल्मशती कार्यावळ दिवचले जाल्ली. हांव रवीन्द्रबाबां वांगडा गेल्लों. दिसभराची कार्यावळ. मरसर पावस. नगरपालिका सभाघरांत कवी संमेलन जालें. सगळे म्हालगडे आशिल्ले. व्यासाश्रम मठांत जेवणाची आनी मदल्या विसवाची कार्यावळ जाली. सांजे अवर लेडी ऑफ ग्रेस हायस्कूलांत समारोपाची कार्यावळ. उमेद, उत्साह हांकां ओतो. हांव तेन्ना सवेंत आशिल्लो. आनंदाच्यो कुरवो अजून काळजांत कोरांतल्यात. कोंकणी प्रेमाची बुन्याद घट्ट जाली. शणै गोंयबाबांचें घर पळेलें.
डॉ. माधवी सरदेसाय हांचे कडेन हांव शणै गोंयबाबांचें साहित्य ह्या विशयाचेर खूब उलयलां. खुबूच. हाचें कारण म्हळ्यार माधवीन भासशास्त्र शिकतना गोंयबाब खंडांचीं पारायणां केल्लीं आनी टिपणां नोंद करून दवरिल्लीं. शणै गोंयबाबांची उतरावळ माधवीन म्हाका दाखयल्ली आऩी कांय उतरांचेर आमी चर्चाय केल्ली. ‘नीट’ ही वैजकी प्रवेश परीक्षा दिवपाक तेरा भारतीय भासांतल्यान प्रस्नपत्रिका आसात. तातूंत आमची कोंकणी ना. ती बेगीन येवंक जाय. तकनीकी पारिभाशीक उतरावळ बेगीन येवची ही माधवीबायची तळमळ आशिल्ली. ती बेगीन येवंक जाय. ती उतरावळ जाली म्हणटकच नीट परीक्षेंत लेगीत कोंकणींतल्यान प्रस्नपत्रिका दिवप शक्य जातलें. शणै गोंयबाबांची जी खटपट त्या काळांत आशिल्ली ती फळाक येतली. तींच तांकां खरीं आर्गां थारतलीं. परीसंवाद, चर्चासत्रां, भाशणां नाका अशें न्हय. पूण हेच वांगडा ठोस अशें काम जाय. जें गोंयबाबांनी खुद्द हयातभर केलें.
काम म्हत्वाचें. फक्त नियोजन, आंखणी करून फायदो ना. वेव्हारीक पांवड्यार काम जावंक जाय. गोंयबाबाच्या तिथीक जयंतीक भुरग्यां खातीर प्रस्नमंच सर्ती घेवंक जाय. तांच्या पुस्तकांतल्या उतरांचेर साहित्याचेर आदारीत ही सर्त आसची. देखीक हो प्रस्न पळेयात. बाबुमामाल्या पणसाची सबंद भतग्रामांत नामना अशें गोंयबाबान बरयलां. भतग्राम म्हळ्यार कितें? जाप – दिवचल वाठार.
शणै गोंयबाबांनी मोलिएराचीं जीं नाटकां अणकारीत केल्यांत, तांचें अभिवाचन करूं येता. ते विशींची सर्त घेवं येता. तरेकवार नवकल्पना मुखार हाडून खूब कितें करूं येता.
गोंयबाब साहित्यांतली उतरावळ संकलित करपाचोय वावर जावंक जाय. कोंकणीचें संशोधन करपी विद्यार्थ्यांनी हें काम हातांत घेवं येता. तातूंतल्यान गोंयबाब कोश तयार करूं येता. शेक्सपियराच्या खेळांची माळ गोंयबाबान रूपांतरीत केल्या. ताचें सादरीकरण युवा कलाकारांनी करूं येता. तांच्या अणकार कौशल्यांतल्यान खूब कितें शिकपा सारकें आसा. तांच्या निबंदांतल्यान शैली शिकपा सारकी आसा. तांच्या संशोधनांतल्यान आऩी अभ्यासांतल्यान खूब शिकूं येता.
गोंयबाबान एक बरेंच प्रेरक विचार वाशीन दिल्लें तें अशें – सगळो संवसार तुज्या एकल्याच्याच खांदार अशें समजून आतांच कामाक लाग. तुज्या हातांतल्यान चिमटीभर तरी बरें घडून येतलें.
मुजरत. बरें घडटलेंच. यत्न, खटपट, धडपड योग्य मार्गान, योग्य दिशेन केंद्रीत आसत जाल्यार. तें एकवटीतपणान करूया. फाल्यां? आयज?.. आतां? आतांच. चला, कोंकणी सेवेक लागुया.
मुकेश थळी
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
