शक्य आसा…. आनी नाय बी!!

भांगरभूंय | प्रतिनिधी

गोंयांत अशीं कांय मळां आसात, जंय गोंयकार तरणाटे हाताच्या बोटांचेर मेजपा इतले आसात. नवी पिळगी आपूण जावन पोरणे पिळगेचो जागो घेतली, हे खातीरुय यत्न करचे पडटले.

मनीस जगतलो जाल्यार ताका अन्न, उदक, वस्त्र, आसरो जाय. बरी भलायकीय गरजेची. ताचे भायर ताच्यो वाठार, परिस्थिती प्रमाण आवडी- निवडी आसतात. पूण हें सगलें करपाक, मेळपाक मुखेलपणान जाय तो पयसो. तो चडशे लोक बऱ्या- वायट मार्गान मेळयतात. कांय जाण जाण्ट्यांनी जोडून दवरिल्ल्या म्हालवजाचेर जियेतात. पूण पयशे मेळोवपाक हात- पांय हालोवचेच पडटात. ते खातीर नोकरी, वेवसाय, धंदो करचोच पडटा….. आनी आजकाल कांयच सोंपेंपणान मेळना. बरी नोकरी, वेवसाय करतलो जाल्यार शिक्षण जाय, नातर वशिलो. नोकरी गांवांतूच मेळपाची शाश्वतीय हालींसराक उरूंक ना. ते खातीर गांव सोडचो पडटा. विशेश म्हणल्यार गांव सोडून हेडपीच यशस्वी थारल्यात. अर्थांत ताचे फाटल्यान तांची जिद्द, मेहनत, सोंशिकसाण, चिवट सभावूय आसा. गोंयकार एका काळार भायर वचपाक फाटीं फुडें जाताले. सगले होम सीक म्हणटात तसले आशिल्ले. मात, क्रिस्तांव भाव देश स्वतंत्र जावचे पयलीं सावन पाकिस्तान (तेन्नाचो भारत), आफ्रिका, युरोप, देशाच्या हेर राज्यांनी गेल्ल्याचीं उदाहरणां आसात. आखाती देशांनी तांणीच पयलें पावल दवरलें. आतां परिस्थिती बदल्ल्या. सगलेच गोंया भायर शिक्षण, नोकरे खातीर वतात. खास करून आयटी मळा वयले तरणाटे. कारण गोंया परस तांकां भायर चड वाव आसा. आतां थळाव्यां खातीर 70 टक्के नोकऱ्यांची हमी घेवनुच उद्देगांक मान्यताय दितले, अशें उतर मुख्यमंत्री प्रमोद सावंत हांणी दिलां. कुशळटाय उदरगत खातें आनी गुंतवणूक उर्बा मंडळ तांचेच कडेन आसा. म्हणटकच हाचे मुखार गोंयकारांक मानवतात, तसलेच उद्देग येतले, अशी आस्त बाळगुपाक हरकत ना.
गोंयकार एका काळार बारीकसारीक कामां करपाक फाटीं सरताले. मात, आतां राज्य मनीसबळ उदरगत म्हामंडळा खाला सादारण देड हजार थळाव्यांक नोकऱ्यो मेळ्ळ्यात. खुद्द मुख्यमंत्री सावंत हांणी विधानसभेंत ही म्हायती दिल्या. तातूंत सुरक्षा रक्षक, अटेंडंट, प्लंबर, लिफ्ट आॅपरेटर असल्योय नोकऱ्यो आसात. कुशळटायेचीं कामां करप्यांक आयज बरे दीस आयल्यात. ताचो लाव गोंयकार तरणाट्यांनी घेवंक फावो. गोंय हें कलेची खण आशिल्लें, फुडल्या पांच वर्सां भितर तें कुशळटायेचें आगर जातलें, हाचे खातीर यत्न जाय. शक्य आसा हें. आयटीआयंत (आयआयटीचो अजून पत्तो ना.) अभ्यासक्रम पुराय केल्ल्या कितल्या तरणाट्यांक नोकरी मेळ्ळ्या, हाचो डाटा सरकारा कडेन ना. नोकऱ्यां खातीर गरजेचे अभ्यासक्रम आयटीआयंत नात. कुशळटाय उदरगती खातीर केंद्रा कडल्यान आयिल्लो पयसोय पुराय खर्च जावंक ना, अशें आमदार डाॅ. चंद्रकांत शेट्ये हांणी सांगलें. विजय सरदेसाय हांणीय हो मुद्दो लावन धरलो. गोंयच्या तरणाट्यांची मानसिकताय वळखून आनी फुडल्या 20 वर्सांनी खंयच्या उद्देगांक, वेवसायांक मागणी येतली हाचो अभ्यास करून ते तरेचे उद्देग गोंयांत हाडचे. कश्टाचीं कामां आशिल्ले उद्देग हाडल्यार तीं कामां करपी मनीसबळ ज्या राज्यांत आसा, तेच लोक गोंयांत येतले. गोंयांतल्या उद्देगीक वसणुकांनी कसले कारखाने आसात, थंय कितले परप्रांतीय कामाक आसात, हाचो अभ्यास केल्यार एकूणच उद्देगीक मळाचो अदमास सरकाराक येतलो. गोंयकारांनीय आतां नोकरी, कामां बाबतींतलो चोखंदळपणा उणो केल्यार बरो.
थळाव्यांक 70 टक्के नोकऱ्यांची हमी दिवपी उद्देगांकूच मान्यताय दितले, हें 20- 30 वर्सां सावन गोंयकार आयकत आयल्यात. निदान आतांची ही घोशणा घोशणाच थारची न्हय. 70 टक्के थळाव्यांक रोजगार मेळप शक्य आसा… आनी नाय बी. सरकारी यंत्रणा, उद्देग धनी आनी खुद्द थळावे तरणाटे हांचेर तें अवलंबून आसा. तातूंत अडचणीय आसात. सगल्या पदां खातीर लायक गोंयकार तरणाटे मेळप कठीण. ते मेळपाक जाय जाल्यार ते तरेचे अभ्यासक्रम हांगा पयलीं सुरू जावंक जाय. भायल्यान येवपी व्हडले उद्देग वयल्या पदांचेर आपले मनीस हाडटात. तरीय चडांत चड जागे थळाव्यांक दिवप तांकां तशें कठीण वचूं नये. सध्या गोंयांत अशीं कांय मळां आसात, जंय गोंयकार तरणाटे हाताच्या बोटांचेर मेजपा इतले उरल्यात. नवी पिळगी आपूण जावन पोरणे पिळगेचो जागो घेतली, हे खातीरुय यत्न करचे पडटले. सरकारान ही थळाव्यांक 70 टक्के नोकऱ्यांची संकल्पना बेगीन चालीक लावची.