शक्तीमान येतलो थिएटरांत

भांगरभूंय | प्रतिनिधी

सगल्यांत लोकप्रीय टीव्ही माळ शक्तीमान परतून एकदां येवपाचे तयारेंत आसा. निर्माते ह्या प्रतिश्ठीत पात्रा खातीर नवें मुखामळ सोदताले, तांचो हो सोद आतां सोंपला. मिडिया रिपोर्टा प्रमाण दक्षीणेचो सुपरस्टार अल्लू अर्जून शक्तीमानाची भुमिका साकारपाक शकता. हे खेपे शक्तीमानाची काणी प्रेक्षकांक एके नवे शैलींत दाखयतले.
मेळिल्ले म्हायती प्रमाण शक्तीमान व्हड पड्ड्यार येतलो. अल्लू अर्जून शक्तीमानाचे भुमिकेंत दिसपाची शक्यताय आसा. विशेश म्हणल्यार नामनेचे दक्षीणेंतले दिग्दर्शक बेसील जोसेफ ह्या प्रकल्पाचें दिग्दर्शन करतले. हो चित्रपट सोनी पिक्चर्साच्या बॅनरा खाला तयार करतले. इतलेंच न्हय जाल्यार दोन व्हड आंतरराष्ट्रीय स्टुडियो गीता आर्ट्स वांगडा आदार करपाक तयार आसात. अशें आसलें तरूय ह्या प्रकरणांत अजून कसलेंच अधिकृत विधान येवंक ना.
2021 त ओटीटीचेर प्रदर्शीत जाल्ल्या ‘मिन्नल मुरली’ ह्या चित्रपटा खातीर बेसीलाचें खूब कवतूक जाल्लें. कोरोना म्हामारीक लागून हो चित्रपट ओटीटी प्लॅटफॉर्म नेटफ्लिक्साचेर प्रदर्शीत करचो पडिल्लो.
2024 त मुकेश खन्ना हाणें एक व्हिडियो शॅर केल्लो. तातूंत ताणें म्हणिल्लें, अल्लू अर्जून फुडलो सुपरहिरोचे भुमिके खातीर एक बरो पर्याय आसपाक शकता. आपूण खंयचेच गजाली खातीर बांदील ना, पूण आपल्याक दिसता अल्लू अर्जून शक्तीमान जावपाक शकता. ताचें रूप आनी उंचाय बरी आसा. तरी लेगीत पुष्पाच्या निर्मात्यांनी ताका खलनायक केला. तरी लेगीत तो शक्तीमानाचे भुमिकेंत सोबतलो. निमाणो निर्णय निर्मात्यांचो आसतलो, अशेंय मुकेश खन्नान म्हणलां.
फाटल्या एका वर्सा सावन शक्तीमाना वयल्यान वाद चल्ला. पोरूं मुकेश खन्ना हाणें एका पॉडकास्टांत स्पश्ट केल्लें, रणवीर शक्तीमान जावपाक इत्सूक आसा. मुकेश अधिकारा खातीर ताका मेळपाक तीन वरां वाट पळयली. पूण रणवीराक मेळ्ळे उपरांत मुकेश हाणें ताका अधिकार दिवपाक न्हयकार दिलो, कारण ताका ताच्या मुखामळाचेर निरागसता दिसूंक नाशिल्ली.
90 च्या दसकांत शक्तीमान हो सुपरहिरो शो दरेका घरांत फामाद आशिल्लो. हो शो 1997 ते 2005 मेरेन टीव्हीचेर चलतालो. ह्या शोंत शक्तीमानाचे भुमिके खातीर मुकेश खन्ना हाणें खूब प्रसिद्धी मेळयली.
2022 त सोनि पिक्चर्सान एका व्हिडियो वरवीं शक्तीमान ह्या मेगा बजेट चित्रपटाची घोशणा केल्या. हो चित्रपट 200 ते 3दद कोटींच्या बजेटांत तयार करतले. निर्माते तो आंतरराष्ट्रीय पांवड्याचेर तयार करपाची येवजण आंखतात. रणवीरच्या आदीं ‘गली बॉय’ फेम सिद्धांत चतुर्वेदीचें नांव ह्या चित्रपटांत शक्तीमानाचे भुमिके खातीर मुखार आयिल्लें. सध्या हो चित्रपट खूब काळ आडकून उरला.