भांगरभूंय | प्रतिनिधी
नवी दिल्ली, खबरां संस्था ः व्हॉट्सॲपा वयल्यान फेक कॉल वा स्पॅम मेसेज येवपाचो त्रास जायत्या जाणांक सोंसचो पडटा. हाका लागून जायत्या जाणांची सायबर फटवणूक जाता. व्हॉट्सॲप नेमांचे उल्लंघन करपी वापरप्यां आड दर म्हयन्याक कारवाय करता. एप्रील म्हयन्यांत व्हॉट्सॲपान 71 लाख भारतीय व्हॉट्सॲप वापरप्यां आड कारवाय केल्या. मेटाच्या व्हॉट्सॲपाचेर 1 एप्रिल ते 20 एप्रिल 2024 ह्या काळांत केल्ल्या कारवायेचो तपशील दिला. व्हॉट्सॲपाचो गैरवापर करप्यांचेर कायमचे निर्बंध घाल्या.
एप्रील म्हयन्यांत व्हॉट्सॲपान 71,82,000 वापरप्यांचेर कायमची बंदी घाली. तातूंतले 13,02,000 अकाऊंट्स कोणेंच रिपोर्ट करुंक ना तरी काडून उडयल्यात. विशेश म्हळ्यार एप्रील म्हयन्यांत व्हॉट्सॲपाक 10,554 वापरप्यां कडल्यान अकाऊंट्स रिपोर्ट आयल्यात. ह्या आदाराचेर फकत स अकाऊंट्साचेर कारवाय जाली.
भारताच्या म्हायती तंत्रज्ञान नेम, 2021 प्रमाण ही कारवाय केल्या अशें व्हॉट्सॲपान जाहीर केलां. वापरप्यांच्यो कागाळी आनी कायद्याचें उल्लंघन नियंत्रीत करपा खातीर ह्या नेमांत तरतुदी केल्यात. एप्रील म्हयन्यां प्रमाणच व्हॉट्सॲप जून म्हयन्यांत चुकीची वागणूक, वापरप्यांच्यो कागाळी आनी मशीन लर्निंग हांच्या आदारान खर कारवाय करपाक शकता.
व्हॉट्सॲपान अकाऊंट्स कित्याक बंद केलें?
व्हॉट्सॲप सुरक्षीत आनी बरें वातावरण आसपा खातीर चुकीच्या वापरप्यांचेर व्हॉट्सॲपा वरवीं बंदी घालपाची कारवाय जाता. जे अकाऊंट्स फट म्हायती दिता, अर्थीक घोटाळे, वा हानीकारक संदेश धाडतात त्या अकाऊंट्साचेर नेम आनी सेवा अटींचें उल्लंघन केल्ल्यान कारवाय करपाक शकतात. थळाव्या कायद्यांचें उल्लंघन केल्यार अशा अकाऊंट्स आड कारवाय करूं येता. कांय वापरप्यांनी वापरप्याचो अकाऊंट्स रिपोर्ट केलो आसल्यार अश्या प्रकरणांत त्या खात्याची म्हायती घेवन अकाऊंट्स बंद करपाची कारवाय जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
