व्हॉट्सअॅपाचेर येवपी हे मॅसेज धोक्याचे, चुकूनूय करूंक नाकात क्लिक

भांगरभूंय | प्रतिनिधी

मोबायलाच्या वापराक लागून दिसपट्टे जिणेंत जायत्यो गजाली खूब सोंप्यो जाल्यात. पूण, ह्या स्मार्टफोनाचे फायदे तशेंच लुकसाणूय आसा. स्मार्टफोनाचेर सोशल मिडिया अॅपांचेर येवपी संदेश चड करून फटवणुकीचे आसतात. देखून एके कंपनीन ह्या घोटाळ्याचो अभ्यास करून आनी खंयचे संदेश वापरप्यांक धोक्याचे आसात हाची वळेरी तयार केल्या.
सुरक्षा कंपनी एमसीअफीने मॅकॅफी (McAfee) हालींच जागतीक घोटाळ्याच्या संदेशांचेर अभ्यास करुन स्मार्टफोन वापरपी आनी सोशल मिडिया वापरप्यां खातीर एक वळेरी जाहीर केल्या. तातूंत सात धोक्याचे संदेश दिल्ले आसात. ज्यांतूतल्यान एसएमएस वा व्हॉट्सअॅपाचेर डिव्हायस हॅक करपाक वा पयशे चोरपाक मॅसेज धाडटात. 82 टक्के भारतीय अशा मॅसेजांचेर क्लिक करून घोटाळ्यांक बळी पडटात असोय दावो अहवालांत केला.

‘सात’ धोक्याच्या संदेशांची वळेरी

1. तुमकां इनाम मेळ्ळां (You’ve won a prize) –
   व्हॉट्सअॅप वा एसएमएसाचेर परबीं! तुमी इतले रोख पयशे जिखल्यात असो संदेश तुमकां खूबदां मेळटलो. अशा मॅसेजांत अकाऊंट वयले पयशे चोरपाची शक्यताय 99 टक्के आसा. अशे संदेश स्मार्टफोन वापरप्यांचे वळखपत्र वा पयशे चोरपा खातीर धाडटात.
2. बोगस नोकरी संबंदी अधिसुचोवण्यो आनी ऑफर (​Fake job notifications or offers​) –
   व्हॉट्सअॅप वा एसएमएसाचेर जॉब ऑफर केन्नाच येना. खंयचीच वेवसायीक कंपनी तुमकां अशा प्लॅटफॉर्मांचेर केन्नाच संपर्क करची ना. देखून नोकरी संबंदीत व्हॉट्सअॅप वा एसएमएस मॅसेज मेळटा जाल्यार तो एक घोटाळो आसतलो.
3. URL आशिल्ले बँकचो संदेश (Bank alert messages with URL) –
   तुमकां चड करून URL वरवीं केवायसी भरपाक सांगपी एसएमएस संदेश मेळटात. तशेंच बँके संबंदीत संदेशूय व्हॉट्सअॅपाचेर धाडटात. देखून स्मार्टफोनाचेर URL लिंक आनी बँकेचो व्हॉट्सअॅप मॅसेज तुमचे पयशे चोरपाच्या हेतान येता हें सगळ्यांनी लक्षांत दवरचें.
4. तुमी करूंक नाशिल्ल्या खरेदी विशीं म्हायती (Information about a purchase that you haven’t made) –
   तुमी खंयचीच वस्त खरेदी करूंक ना आनी ताचीं अपडेट एसएमएस वरवीं तुमकां येता जाल्यार तो एक प्रकारचो घोटाळो आसूं येता. अशे संदेश वापरप्यांचो फोन हॅक करपा खातीर आसतात.
5. नेटफ्लिक्स वा ओटीटी प्लॅटफॉर्मचे सबस्क्रिप्शन (​Netflix OTT subscription updates​) –
   जायते सिनेमा, सिरियल, वेब सीरिज ओटीटी प्लॅटफॉर्माचेर पळयतात. ओटीटीची लोकप्रियता दिसानदीस वाडत आशिल्ल्यान फटींगांचे पाय नेटफ्लिक्साच्या एसएमएस वा हेर ओटीटी सबस्क्रिप्शना वरवीं स्मार्टफोन वापरप्यांक आकर्शित करपाचे यत्न करतात. तातूंत फुकट ऑफर वा तत्काळ सबस्क्रिप्शन सारकिल्या एसएमएसचो आस्पाव जाता.
6. बनावट डिलिव्हरी समस्यांची सुचोवणी (​Fake missed delivery, or delivery problem, notification​) –
   तुमी जायते फावटीं वस्त ऑर्डर करतात आनी ताचे ऑनलायन पयशे फारीक करतात. पूण, केन्ना केन्नाय तुमची वस्त तुमचे कडेन पावना वा पयशे फारीक केल्या उपरांत ते तुमकां ती वस्त दिवपाक न्हयकार दितात. देखून अशा जायत्या डिलिव्हरी समस्या विशीं एसएमएस वा व्हॉट्सअॅप नोटिफिकेशन धोक्याची थारूंक शकता.
7. ॲमेझॉन वा खात्यां संबंदीत सुचोवणी संदेश (Amazon security alert or notification messages regarding account update) –
   ॲमेझॉन संबंदीत सुरक्षा सावधानताय तशेंच तुमच्या खात्यां संबंदीत खंयच्याय अपडेटा विशीं तुमकां एसएमएस वरवीं येत आसल्यार जतनाय घेयात. कारण, ॲमेझॉन वा खंयचीय ई- कॉमर्स कंपनी तुमकां म्हत्वाच्या सुचोवण्यां खातीर केन्नाच एसएमएस वा व्हॉट्सअॅपा वरवीं संपर्क करची ना. अशे संदेश तुमकां येतात जाल्यार तो एक घोटाळो.