भांगरभूंय | प्रतिनिधी
अमेरिकेंतल्या नागरिकांकूय ट्रम्पाचें हें विस्तारवादी धोरण मान्य ना. पूण ट्रम्प आपलें आडमुठें धोरण सोडपाक तयार ना.
अमेरिकेचे राष्ट्राध्यक्ष डोनल्ड ट्रम्पाची दादागिरी दिसानदीस वाडतूच चल्ल्या. अमेरिकेन तेलाच्या सांठ्या खातीर व्हेनेझुएला ह्या ल्हानशा देशाचेर दादागिरी करून त्या देशाच्या राष्ट्राध्यक्षांचें अपहरण करून तांकां अटक केली आनी स्वताक व्हेनेझुएला ह्या देशाचे कार्यकारी अध्यक्ष म्हूण घोशीत केलो. उपरांत ताणें इराणांतल्या आंदोलनांक तेंको दिवन तो देश अस्थीर करपाचो डाव आंखलो. पूण तातूंत ताका येश मेळूंक नाशिल्ल्यान ताणें इझ्रायलाक बराबर घेवन इराणाचेर अमेरिकेन मोटो हल्लो केलो आनी त्या हल्ल्यांत इराणाचे सर्वोच्च धर्मीक फुडारी आयातुल्ला खामेनी हांकां जिवेशी मारले. अमेरिकेचे हे दादागिरीक इराणान जशाक तशी जाप दिल्ल्यान व्हड झुजाक तोंड फुटलें. हें झूज अजून लेगीत चालू आसून ह्या झुजाची झळ पुराय जगाक बसत आसा. स्वताच्या सुवार्था खातीर अमेरिका जगाचेर दादागिरी करता.
अमेरिकेच्या ह्या दादागिरीचेर पुराय जग निशेध करीत आसतनाच ट्रम्पाची नदर क्युबा ह्या ल्हानशा देशाचेर पडल्या. व्हेनेझुएला आनी इराण आतां कोण? असो प्रस्न विचारताले. पूण ताची जाप स्वता डोनाल्ड ट्रम्पानूच दिली. ट्रम्पान लॅटीन अमेरिकन फुडाऱ्यांचे कार्यावळींत उलयतना क्युबांतल्या कम्युनिस्ट सरकाराक शिटकावणी दिवन म्हणलें, क्युबाक स्वातंत्र्य मेळोवन दिवपाची वेळ आयल्या. क्युबातल्या लोकांनी स्वता जावन हें सरकार उमथावन उडोवचें नाजाल्यार अमेरिकेचे खर कारवायेक सामकार वच्चें. हाचोच अर्थ अमेरिकेन जें इराणांत केलां तेंच तो क्युबातूय करतलो. ट्रम्पाचे हे शिटकावणेची क्युबाच्या राष्ट्राध्यक्षान खर उतरांनी निशेध केला आसून अमेरिकेच्या संभाव्या आक्रमणाक तोंड दिवपा खातीर आपल्या शस्त्रांची सज्जता वाडयल्या. ट्रम्पान अशी शिटकावणी फक्त क्युबाकूच दिल्या अशें न्हय. कांय दिसां पयलीं ग्रीनलॅण्ड ह्या ल्हानशा देशाकूय ताणें अशीच शिटकावणी दिल्ली. ग्रीनलॅण्डान स्वता जावन अमेरिकेंत विलीन जावचें आनी जर ग्रीनलॅण्ड स्वता जावन अमेरिकेंत विलीन जालें ना जाल्यार अमेरिका लश्करी बळाचो वापर करून त्या देशाक अमेरिकेंत विलीन करतली अशी धमकी ट्रम्पान ग्रीनलॅण्डाक दिल्ली.
इतलेंच न्हय तर जे देश ग्रीनलॅण्डाचें समर्थन करतले त्या देशांचेर अमेरिका खर आयात शुल्क अर्थांत टेरीफ लायतले अशी धमकी दिवन तांकां ब्लॅकमेल केले. ग्रीनलॅण्डाक समर्थन दिवपी युरोपीयन देशांक केल्लें हें ब्लॅकमेलूच आसा. डोनाल्ड ट्रम्पाच्या ह्या ब्लॅकमेली आड युरोपांत व्हड प्रमाणांत तिडक उक्तायतात. ट्रम्पाचे हे दादागिरी आड डेन्मार्काची राजधानी कोपेनहेगन आनी हेर शारांनी हजारांनी लोकांनी रस्त्यार देंवून आंदोलन केलें आनी ग्रीनलॅण्ड हो विकावू देश न्हय अश्यो घोशणा दिल्यो. इंग्लंड, फ्रान्स ह्या देशांनी लेगीत ट्रम्पाच्या ह्या धोरणाचेर टिका केली आनी डोनाल्ड ट्रम्पान ही दादागिरी थांबोवची अशें निवेदन दिलें. फक्त युरोपूच न्हय जाल्यार पुराय जग अमेरिकेचे दादागिरी आड एकवटान येत आसा. डोनाल्ड ट्रम्पा आड अमेरिका खंडांतूय खदखद आसा. डोनाल्ड ट्रम्पाच्या विस्तारवादी धोरणा आड दक्षीण अमेरिका खंडांतल्या देशांतूय व्हड प्रमाणांत निरशेणी आसा. आयज ह्या देशांनी जाहीरपणान तशें उलोवन दाखोवंक नासलें तरी तेवूय ट्रम्पाचेर निरशेल्यात.
अमेरिकेंतल्या नागरिकांकूय ट्रम्पाचें हें विस्तारवादी धोरण मान्य ना. पूण ट्रम्प आपलें आडमुठें धोरण सोडपाक तयार ना. कितेंय करून आपल्या शेजरा आशिल्ल्या ल्हान देशांक अमेरिकेंत विलीन करून घेवपाचें, तेलांचो सांठो आशिल्ल्या राष्ट्रांचेर ताबो मेळोवन थंयचे तेल सांठे ताब्यांत घेवप तशेंच जे देश आपले आयकुचे नात तांचेर खर टेरीफ लावन तांकां ब्लॅकमेल करप आनी पुराय जगाचेर आपली एकाहाती हुकूमत गाजवोवप हेंच ट्राम्पाचें धोरण आसा, आनी ट्रम्पाचें हेंच विस्तारवादी धोरण जगाक झुजाच्या लोटांत घेवन वता. अर्थांत हें आतांच सुरू आसा अशें न्हय जाल्यार अमेरिका महासत्ता जायत सावनूच हो देश आंतरराष्ट्रीय नेम आनी कायदे पांया पोंदा माड्डून हेर देशां मदीं हस्तक्षेप करीत आयला. अमेरिकेन वेगळीं वेगळीं कारणां मुखार करून हेर देशांचेर झूज लादलां. ताचें व्हड मोल ह्या देशांक आनी जगाक फारीक करचें पडलां. स्वता अमेरिकेकूय ह्या झुजाचें व्हड परिणाम भोगचे पडल्यात.
व्हिएतनाम, अफगाणिस्तान, इराकांत झुजां करून ताचेर लाखांनी डॉलर खर्च करून अमेरिकेन कितें साद्य केलें असो प्रस्न अमेरिकेंतूय विचारतात. पूण अमेरिकेन त्या काळांत झूज सुरू करपा फाटलो आपलो सुवार्थ लिपोवपा खातीर वेगळीं वेगळीं कारणां दिलीं. पूण ट्रम्प मात आपूण सुरू करीत आशिल्ल्या झुजा फाटलो सुवार्थ लिपोवन दवरपाचें मनीसपण लेगीत दाखोवपाक तयार ना.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
