भांगरभूंय | प्रतिनिधी
भांगरभूंय । प्रतिनिधी
पणजीः फाटल्या चार वर्सांत राज्यांत येवपी 800 व्हीआयपी आनी व्हीव्हीआयपी सोयऱ्यांचेर गोंय सरकारान सुमार 7.89 कोटी रुपया खर्च केल्यात. सगळ्यांत चड 2022 त 2.86 कोटी सरकारान मोडल्यात. तांची रावपाची, जेवणाची आनी भोंवपाची सोय करपा खातीर सरकाराक खर्च आयलां, अशी म्हायती शिष्टाचार खात्यान दिल्या.
केपेंचे आमदार एल्टन डिकोस्टा हांणी विचारिल्ल्या प्रश्नाक लेखी जाप दितना शिष्टाचार मंत्री मावीन गुदीन्हो हांणी ही म्हायती दिली. गोंयांक भेट दिवपी व्हीआयपी सोयरे देखीक केंद्रीय मंत्री, राज्य मंत्री, सरकारी अधिकारी आनी हेर राज्यांतले मंत्री, आमदार आनी तांचे सोयरे हांचो आस्पाव आसा. तांचे भेटी वेळार तांचे सेवेत दिल्ले अधिकारी, गाडयो, रावपाची आनी जेवणाचे सोयीचेर फाटल्या चार वर्सांत 7,89,25,727 इतलो खर्च आयला.
फाटल्या चार वर्सांत 807 सोयऱ्यां मदले वर्स 2020 त जानेवारी ते डिसेंबर मजगतीं 57 सोयरे गोंया पावले आनी तांचेर रु. 41.33 लाख इतलो खर्च जालो. वर्स 2021 त सोयऱ्यांच्या आंकड्यांत व्हडली वाड जावन जानेवरी ते डिसेंबर मजगतीं 160 सोयरे पावले आनी रु. 2.22 कोटी खर्च सरकारान केलो. 2022 त आंकडो परत वाडून जानेवरी ते डिसेंबर 183 सोयरे आयले आनी 2.86 कोटी खर्च सरकारांक आयलो.
वर्स 2023 त सोयऱ्यांच्या आंकड्यांत परत व्हडली वाड जावन जानेवरी ते डिसेंबर मजगतीं 236 सोयरे आयले आनी सरकारान तांचेर 1.40 कोटी मोडले. वर्स 2024 त सोयरांचो आंकडो देंवून जानेवरी ते डिसेंबर मजगतीं 141 सोयरे आयले आनी सरकारांक तांचेर 98.61 लाख इतलो खर्च आयलो. जाल्यार ह्या वर्सा 2025 त जानेवारी 2025 ते 6 मार्च 2025 मेरेन 31 सोयरे राज्यांत आयले आनी सरकारान आतां मेरेन 4.10 लाख खर्च केल्यात.
व्हीआयपी सोयऱ्यांचेर जाल्लो खर्च-
| वर्स | सोयरे | खर्च |
| 2020 | 57 | 41.33 लाख |
| 2021 | 160 | 2.22 कोटी |
| 2022 | 183 | 2.86 कोटी |
| 2023 | 236 | 1.40 कोटी |
| 2024 | 141 | 98.61 लाख |
| 2025 | 31 | 4.10 लाख (मार्च मेरेन) |
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
