व्हिव्हा पुर्तुगाल घोशणे आड जाली बसका

भांगरभूंय | प्रतिनिधी

लिबिया लोबो सरदेसाय हांच्या वक्तव्याचो निशेध

कुंकळ्ळी : हांगाच्या इतिहासीक चिफ्टन्स स्मारक वाठारांत Viva Portugal हे घोशणे आड तशेंच दाद (रोहिदास) देसाय हांचे भुमिकेक समर्थन दिवपाक बसका जाली. बसकेंत लिबिया लोबो सरदेसाय हाच्या विधानाचो सगल्यांनी खर निशेध केलो.
युगांतर गोंयचे संस्थापक अभिदीप देसाय हांणी समाजांतले उरिल्ले वसणुकवादी मानसिकतायेचेर भाशण करतना सांगलें, गोंयांक मुक्ती खुबश्या जाणांच्या बलिदानांक लागून मेळ्ळां. परकी सत्तेचें गौरवीकरण करप हें स्वातंत्र्यसैनिकांचो अपमान आशिल्ल्याचें तांणी स्पश्ट केलें. तांणी मुखार म्हणलें, जर कोणाक पुर्तुगाला विशीं इतलीच आपुलकाय आसा, जाल्यार तांणी भारत सरकारान दिल्लो पद्मश्री सन्मान परत करपाचो विचार करचो.
बजरंग दल गोंयचे संयोजक विराज देसाय हांणी लिबिया लोबो सरदेसाय हांच्या वक्तव्याचो निशेध करीत म्हणलें, गोंय मुक्तिसंग्राम फकत सालाझार विरोधी चळवळ आशिल्ली, अशें म्हणप म्हणल्यार ४५० वर्सांच्या संघर्षाचो अपमान करपा सारकें आसा.
सुटके झुजारी शाबू देसाय हांचे पूत विशाल देसाय हांणी दाद देसाय हांच्या Viva Portugal म्हणप ना हे भुमिकेक फाटबळ दिलें. गोंयच्या स्वातंत्र्यलढ्याचो इतिहास उणो लेखपाचो कसलोय यत्न खपोवन घेवचे नात, अशें तांणी नमूद केलें.
कुंकळ्ळीचे युवा प्रतिनिधी दत्तू देसाय हांणी सांगलें, तरणाट्यांक गोंयचो खरो इतिहास समजून घेवपाक आनी सुटके झुजार्‍यांच्या बलिदानाचो सन्मान राखचो.
ज्युलियस परेरा हांणी सांगलें, कुंकळ्ळेंचे खुबशे क्रिस्तांव भाव Viva Portugal हे घोशणे आड आशिल्ल्यान ते वंदे मातरम हे घोशणेक मान दितात. धर्मा पलतडीं वचून गोंयच्या स्वातंत्र्याचो सन्मान करप हीच खरी भुमिका आशिल्ल्याचें तांणी सांगलें.
मिथील देसाय हांणी पुर्तुगेज राजवटी मजगतीं तांच्या कुटुंबाचेर जाल्ल्या अत्याचारांचो उल्लेख केलो. Viva Portugal ही घोशणा ही आयकतना खुबश्या कुटुंबाचे आदले घावे ताजे जातात.
सुटके झुजारी प्रभाकर वैद्य हांचे पूत शैलेश वैद्य हांचे सयत खुबशे मानेस्त हे बसकेक हाजीर आशिल्ले.
बसकेचे निमाणे कडेन सगल्यांनी Viva Portugal घोशणेचो खर निशेध केलो. गोंय मुक्त आशिल्ल्यान सुटके झुजार्‍यांच्या बलिदानाचा सन्मान राखपा खातीर समाज एकठांय आशिल्ल्याचो संदेश हे बसकेन दिलो.