भांगरभूंय | प्रतिनिधी
दिवचल : दिवचलच्या व्हाळशी – बोड्ड्यां नव्या बायपास मार्गा वयल्या येरादारी जुंव्याक वाळवे सर्कल हें नांव दिवपाक बोड्डें कोमुनिदादीन हरकत घेतल्या. ते सुवातेर उबारिल्ल्या लेखनाचें प्रतीक आशिल्ल्या व्हड पेनाक आपलो विरोध नाशिल्ल्याचेंय तांणी म्हणलां.
पुराय म्हायती प्रमाण ज्येश्ठ पत्रकार सुरेश वळवे हांणी स्वताच्या खर्चान ह्या येरादारी जुंव्याचेर लेखनाचें प्रतीक आशिल्ली व्हड पेनाची प्रतिकृती उबारून भौशीक बांदकाम खात्या कडल्यान रितसर परवानगी घेवन बुधवारा हे प्रतिकृतीचें उक्तावण करपाचें निश्चीत केल्लें. मात ह्या जुंव्याक वाळवे सर्कल नांव दिल्ल्यान आयत्या वेलार बोड्डें कोमुनिदादीन विरोध केल्ल्यान हो उक्तावण सुवाळो जालो ना. हे विशीं नगराध्यक्ष विजयकुमार नाटेकार हांणी पालिका बसका घेवन योग्य तो निर्णय घेतले, अशें सांगलां.
ह्या सुवाळ्याक केरळाचे राज्यपाल राजेंद्र आर्लेकार हाजीर रावपाचे आशिल्ले. पूण ते कांय कारणांक लागून पावले नात. सुरवेक सर्कला लागसार आशिल्ल्या ओपन अॅर सभाघरांत उपचारीक सुवाळो आमदार डॉ. चंद्रकांत शेट्ये हांचे हस्तुकीं दिवली प्टोवन जालो. ह्या वेळार पद्मश्री विनायक खेडेकार, नगराध्यक्ष विजयकुमार नाटेकेर, सुरेश वाळवे हाजीर आशिल्ले.
हो सुवाळो सोंपले उपरांत वाळवे सर्कल नामकरण आनी भव्य पेनाचें उक्तावण करचे खातीर आमदार आनी हेर मानेस्त सर्कला कडेन आयले. थंय जमिल्ल्या बोड्डें कोमुनिदादीचे अध्यक्ष पुंडलीक पळ, गुरुदत्त पळ, सुनील पळ, शैलेश फळदेसाय, मिलिंद पळ तशेंच बोड्डेंच्या कांय थळाव्या लोकांनी वाळवे सर्कल नामकरणाक विरोध करपी पत्र दिवन लेगीत तशेंच थळाव्या लोकांक विस्वासांत घेनासतना वाळवे सर्कल नामकरण कशें केलें, असो प्रस्न उपस्थीत करून नांव काडात आनी उक्तावण करात अशें सांगलें. भौशीक बांदकाम विभागा कडल्यान तें सर्कल बांदचे खातीर आनी नामकरणा खातीर रितसर परवानगी घेतल्या, अशें सुरेश वाळवे आनी विजयकुमार नाटेकार हांणी सांगलें. पेनाक आमचो विरोध ना, पूण वाळवे सर्कल नामकरणाक विरोध आसा. नांव दिवपाचेंच आसा जाल्यार थळाव्या देवदेवतांचें नांव दियात, अशें विरोध करप्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
