भांगरभूंय | प्रतिनिधी
13 उद्देजकांक भेटयतले पुरस्कार; अनील खंवटे हांकां जिणे गौरव पुरस्कार
पणजी: व्हायब्रंट गोंय फावंडेशना वतीन 17 डिसेंबराक व्हायब्रंट गोंय प्रेरणा पुरस्कार 2025, पुरस्कार सुवाळो आयोजीत केला. हातूंत विवीध 13 श्रेणी मदल्या उद्देजकांक पुरस्कार भेटयतले. जाल्यार अनील खंवटे हांकां जिणे गौरव पुरस्कारान भोवमानीत करतले अशें फावंडेशनाचे अध्यक्ष रसीक नायक हांणी सांगलें.
बुधवारा पणजेंत जाल्ले पत्रकार परिशदेंत ते उलयताले. ह्या वेळार मनोज पाटील, राज कुमार कामत, अजय ग्रामोपध्ये, दिनेश धुळपकार हाजीर आशिल्ले.
नायक हांणी सांगलें की, अंदूं 13 श्रेणींत पुरस्कार दितले. हातूंत सर्वोत्कृश्ट निर्यातदार, सेवा निर्यातदार, उद्देजक, पर्यटन ब्रँड, अनिवासी गोंयकार, विंटेज, रियल इस्टेट, फार्मा, शिक्षण संस्था, बिझनेस हावस अशा विभागांत पुरस्कार दितले. उद्देग मळार नाविन्यपूर्ण आनी प्रामाणीकपणान काम करून राज्याच्या अर्थीक आनी समाजीक उदरगत घडोवपी उद्देजकांक पुरस्कार दितले. पुरस्कारा खातीर फावंडेशनाच्या संकेत थळार नामांकन उर्जा उपलब्ध करून दिल्यात.
हाचे आदीं 2023 वर्सा हे पुरस्कार दिल्ले. तेन्ना सुमार 460 अर्ज आयिल्ले. अंदूं एक हजारा परस चड अर्ज येतले अशी आमची अपेक्षा आसा. सर्वोत्कृश्ट बायल उद्देजक असो स्वतंत्र पुरस्कार आसलो तरी हेर श्रेणींत लेगीत बायल उद्देजक अर्ज करूंक शकतात. हे पुरस्कार गोंयच्या उद्देग मळाक प्रोत्साहन दितले. तशेंच कांय म्हयन्यां भितर फावंडेशना वतीन ग्लोबल टेक, ग्रीन गोंय तशेंच बिझनेस शिखर संमेलनाचें लेगीत आयोजन करतले अशें नायक हांणी सांगलें.
आफ्रिकन देशां कडेन वेपार
फावंडेशना वतीन गोंयच्या उद्देजकां कडल्यान आफ्रिकन देशांनी बाजारपेठ सोदपाचें काम सुरू आसा. सद्या आमची झिंम्बाब्वे, केनियांतल्या वेपारी मंडळा कडेन चर्चा सुरू आसा. हे विशीं आमी सकारात्मक आसात अशें राज कुमार कामत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
