‘व्हायट कॉलर’ आतंकवादाची एंट्री

भांगरभूंय | प्रतिनिधी

दिल्लींत 10 नोव्हेंब्राक लाल किल्लो वाठारांत मेट्रो स्टेशनाच्या प्रवेश मार्गाच्या लागसार आत्मघातकी आतंकवाद्यान जबरदस्त स्फोट घडोवन हाडलो. तातूंत आतां मेरेन 13 जाण सोंपल्यात आनी 20 जाण जखमी जाल्यात. तोच स्फोट थंयच्यान लागीच आशिल्ल्या चांदनी चौक वाठारांत घडोवन हाडिल्लो जाल्यार चड प्रमाणांत जीण आनी संपत्तीची हानी जावपाची. आतां तपास यंत्रणांची चक्रां घुंवपाक लागल्यात, तेन्ना तो हल्लो एकसुरो नासून एका व्हड आतंकवादी कटाचो भाग जावन आशिल्लो हे मुखार आयलां. आतंकवादी हे गरीब घरांतले अशिक्षित, उणे शिक्षित, बेरोजगार अशी धारणा आशिल्ली. दिल्ली स्फोट प्रकरणांतले आतंकवादी कार्डियोलोजिस्ट, एम.डी पदवीधारक तशेंच वैजकी व्याख्याते, विद्यार्थी श्रेणींतले आसात. एक आतंकवादी महिला दोतोर उत्तर प्रदेश सरकारच्या वैजकी पदां खातीर घेतिल्ली स्पर्धात्मक भरती परिक्षा उत्तीर्ण जाल्ली. माध्यमिक आनी दोतोरकीची परिक्षाय ती विशेश योग्यतेंत उत्तीर्ण जाल्ली. मनशांची भलायकी बरी करपाची, जीण वाटोवपाचो सोपूत घेवपी हे ‘देवदूत’ शेजारच्या देशांतल्या आतंकी संघटनांच्या प्रभावा खाला जीण सोंपोवपी कट्टर आतंकवादी अवतारांत दिसप, तांच्या मोटारींत, घरांत, कॉलेजांतल्या लॉकरांत जीण वाटोवपी वखदां, उपकरणांच्या जाग्यार जीण सोंपोवपी रसायनां, स्फोटकां, रायफल्स, एके- 47 , बॅरेटा पिस्तूलां सांपडप ही मनीसपणाक काळे फासपी कर्मां देशाचे सुरक्षेचे दृश्टीन हुस्क्याची गजाल.
आतंकवाद आयज फकत काश्मीरा पुरतो सिमित उरिल्लो ना तर तो दिल्ली, हरयाना, उत्तर प्रदेश, गुजरात राज्यांनी जिहादाचें रूप धारण करपाक लागला हें तपास यंत्रणाच्या हालींच्या चवकशेंतल्यान उघड जावपाक लागलां. ह्या कारस्थानी दोतोर पंगडान डिसेंबर 6 तारखेक, म्हणल्यार 1992 वर्सा बाबरी मस्जिद उडयिल्ल्या वर्सुकी दिसा, स्फोट घडोवन हाडपाची तयारी सुरू केल्ली. 32 वापरिल्ल्यो गाडयांची खरेदी, स्फोटकांचो, पिस्तुलांचो आनी बाँब तयार करपा खातीर लागपी रासायनिक खतां, सर्कीटां, डिटोनेटर हांचो साठो हें सगळें एकाच वेळार अनेक सुवातींनी स्फोट घडोवन हाडपी कटाचो भाग जावन आशिल्लो. गुजरातेंत सांपडिल्ल्या आतंकवादी दोतोरांचे पाकिस्तान आनी अफगणिस्तानांतले हेंडलर ड्रॉनां वरवी तांकां शस्त्रां, स्फोटकां आमचे शिमेंत पावयताले. पाकिस्तान आनी अफगाणिस्तानां मदीं सद्या संबद इबाडिल्ले आसले आनी अफगाण तालिबान शासका वांगडा आमी संबद सुदारिल्ले आसले तरी त्या दोन देशांत वावुरपी आतंकवादी संघटना मदीं वितुश्ट ना आनी भारतांत आंतकवाद पातळावपाच्या बाबतीत ते एकमेकां वागडा सहकार्य करतात अशें दिसता आनी तुर्कियेंतल्याय आतंकी संघटनांचो तांकां सहकार आसपाक शकता. एका फरारी आतंकवादी दोतोरान अफगाणिस्तानांत आस्रय घेतला ताका तालिबान शासक आमचे सुवादीन करत अशें दिसना.
काश्मिरांत कलम 370 निरस्त केले उपरांत थंयचे रहिवासी देशाचे मुख्य धारेंत समाविश्ट जाल्ले कारणान काश्मिरांत आतंकवाद सोंपलो म्हूण निश्चिंत रावपाचे दीस आतां गेले. संपूर्ण देश जिहादी संघटनांच्या रडाराचेर आसा अशें दिसपाक लागलां. जैश ए मोहम्मद, लष्कर-ए-तायबा वांगडा आता अन्सार- गझवत-ए हिंद, अल-कायदा आनी इस्लामिक स्टेट हांच्यो पावलखुणो देशांतल्या आतंकवादी पंगडांत दिसपाक लागल्यात. इस्लामीक स्टेट- खोरासान प्रॉविन्स (ISKP) ही इस्लामिक स्टेटाची (IS) आतंकी संघटनेची एक शाखा आनी तांचे चडशे झुजारू अफगाणिस्तान आनी पाकिस्तानांत सक्रिय आशिल्ले कारणान त्या भागांत ती चड प्रभावशाली आसा. अफगाणिस्तान ते म्यांमार मेरेन अखंड भारत अस्तित्वांत येवचो हे विचारधारेचे भारतांत आसात तशेंच अफगाणिस्तान, पाकिस्तान, ताजिकीस्तान, इराण, उझबेकिस्तान,भारत, बांगलादेश हांकां एका इस्लामी राजवट- खिलाफता खाला हाडपा खातीर हो ISKP आतंकी पंगड काम करता आनी त्या उद्देशान वयल्या देशांतल्या तरणाट्यांक भरती करून तांकां कट्टरपंथीय दिक्षा दिता. गेल्ले सप्तकांत दोतोरांचो आतंकी पंगड सांपडला ताचे सभासद ह्या मोड्यूला खाला प्रभावित जाल्ले आसुंयेता.
देशांत सुरक्षा यंत्रणांचे कार्यशैलींत आमी प्रशासनिक आनी तंत्रज्ञानाच्यो दिसपट्ट्यो सुधारणा करत आसात. देशांत ‘मल्टी एजन्सी’ केंद्र स्थापन्न जाल्ले कारणान देशांतल्यो आतंकवाद विरोधी तपास यंत्रणा आता गुप्त माहिती एकामेका वांगडा साझी करता आसतना परदेशी बनावटीची अत्याधुनिक घातक शस्त्रां, स्फोटकां शेजारच्या देशांतल्यान आमच्या देशांत पावतात तेन्ना खंय तरी आमी उणें पडटात अशें दिसपाक लागला.
रक्तबीज राक्षसाच्या रक्ताच्या थेंबातल्यान नवे राक्षस जल्माक येताले हे आतंकवाद्याच्या बाबतीत घडटा हे हमास पंगडाक पुरतो काबार करपाक भायर सरिल्ल्या इझ्रायल सरकाराक आनी नेतनयाहूकय कळ्ळें. हमासचे प्रमुख आनी दुय्यम दर्जाच्या नेत्यांक ताणी लेबनॉन, इराण, कतर देशांत हल्ले घडोवन मारून उडयले तेन्ना तांचो जागो नव्या नेत्यांनी घेतलो आनी शेवटा हमासाक काबार करूंक भायर सरिल्ल्या इझ्रायलाक अमेरिकेच्या मध्यस्थीन तांचेच वांगडा झुजबंदी कबलात करची पडली. आतंकवादाक आळो घालपाक जाता, पूण तो संपूर्णपणान बंद करतले अशे आमचे राजनेते म्हणटात तें तितलें सोंपें न्हय. आपली जीण सोंपोवपाक भायर सरिल्ल्या आत्मघाती आतंकवाद्याक जगांतलें खयंचेय सरकार भिरांत तरी कसली घालतलें?
“सगळ्या तरेच्या आतंकवादी घटनां आड सरकाराची शून्य सहनशिलता आसतली हाचे विशीं आमी अविचल आसात”, “जापसालदार आतंकवाद्याक आसात थंयच्यान सोदून काडून तांका ताच्या कर्माची फळा भोगपाक लायतले”, “देशांत घडपी आतंकवादी घडणुकेक आमी आमच्या देशा आड झुज मानून तांका मजत दिवपी देशा आड झुजाची कारवाय करतले.” प्रत्येक फावटी कांड घडले उपरांत सरकार, मंत्र्यां वतीन हीं असलीं वक्तव्यां दिवप सुरू जाता खरें, पूण आदल्या आतंकी घडणुकेंतल्यान देख घेत तपासणी यंत्रणांनी आपल्या कामांत सुधारणा केल्यांत अशें दिसना.
पुलवामांत लष्करी ताफ्याचेर स्फोटकांनी भरिल्ली कार आपटून 40 सैनिकांक हुतात्मा करपी ते आरडीएक्स मुळांत आयलें खंयच्यान, ती गाडी कोणाची, कोण चलयतालो आनी कितले लोक तातूंत गुंतिल्ले हाचे सविस्तर अशें विवरण मेळ्ळेंच ना. बैसरन, पहलगामच्या 22 एप्रिलच्या हल्लांत आतंकवादी फारपेट करून धावले ना तर तांणी सुसेगादपणान प्रत्येक भोंवडेकाराची सविस्तर मुलाखत घेवन वेंचून तांकां मारले. काश्मीर खोऱ्यांत पुलीस, सेना, तपास संस्थांची सुसज्ज यंत्रणा पळयतां तांची रोखडीच वळख जावन ते आतंकी 24 वरां भितर जेरबंद जावपाचे वा एन्कांवटरांत सोंपपाचे. पहलगाम खुनी सत्राच्या तीन म्हयने उपरांत जुलय 28 तारखेक- संसद सत्राच्या आदल्या दिसा -पहलगाम कांडात दोशी आशिल्ल्या तीग जणांक जवानांनी दाचिगामांत मारून उडयले अशें विधान गृह मंत्र्यान संसदेंत केलें. ते खंय बोल्सांत पाकिस्तानचे मतदाता कार्ड आनी ‘मेड इन पाकिस्तान’ चॉकलेटी घेवन भोंवताले म्हूण तांची ओळख पटली अशेंय गृहमंत्र्यांनी सांगलें. इझ्रयला सारकिल्ल्या ल्हानशा देशान तंत्रज्ञान आनी गुप्तहेरांचे जाळें वापरून हिझबोलाच्या नेत्यांक लेबनॉनांत आनी हमासच्या टॉपच्या नेत्यांक इराण आनी कतारांत रहवाशी वस्तींत वेंचून मारून उडयल्यात. तर आतंकवाद्यांक आमच्याच देशांत सोदून काडून सोंपोवपाक इतलो कळाव जावप हाचो अर्थ गुप्तहेर यंत्रणा म्हायती एकठांय करपाच्या कामांत प्रभावी, सशक्त ना अशें जाता.
उच्च शिक्षित आतंकवादी अवतार धारण करपाक लागतात तेन्ना देशांतल्या आतंक विरोधी तपास यंत्रणांक तांचे परस एक पावल फुडें रावचें पडटलें. ह्या दोतोरांच्या पंगडान एकमेकां वांगडा संवाद सादपा खातीर इन्स्क्रीप्टेड डिजीटल स्वतंत्र अशें वेब तयार केल्लें. दोन वर्सां सावन ते ह्या कारस्थानांक आकार दिताले. ताणीं विविध धर्मदाय संस्था स्थापून 26 लाख निधीय एकठांय केल्लो. ह्या सगळ्याचो सुगावो तपास यंत्रणाक लागलो ना. एका दोतोरान केल्ले ल्हानशे चुकीक लागून हें कारस्थान उक्तडार आयलें. सेना आनी सुरक्षा यंत्रणांक धमकी दिवपी पोश्टरां तो वण्टीर लायतालो तेन्ना ताका धरिल्लो. पुलिसी
हिसको दाखोवन केल्ले पद्धतशीर चवकशींत तो सगळें ओंकून मेकळो जालो. हे देशी आतंकी पंगड अर्थिक आनी तंत्रज्ञानाच्या बाबतीत आत्मनिर्भर जावन वापुरपाक लागल्यात ही चिंतेची बाब.
आमचे पुलीस, आतंक विरोधी तपास यंत्रणांनी उमर खालीद, शर्जिल इमाम, गुलफिशा फातीमा ह्या CAA च्या विरोधांत उलोवपी विद्यार्थी संघटनांच्या नेत्यां आड UAPA कायद्यांतली देशद्रोहाची खर कलमा लावन गेल्लीं पांच वर्सां मायस काळ जामीन मेळप कुस्तार करून न्यायालयांत ट्रायल सुरू न करता फकत दर वर्सा पुलीस सप्लिमेंटरी चार्जशीट (पूरक आरोपपत्रां) दाखल करून बंदखणीत कुसयल्यांत. स्फोट, सशस्त्र उठावांतल्यान देशाच्या सार्वभौमत्वाक धोको उत्पन्न करपी खऱ्या देशद्रोही आतंकी पंगडाच्या विरोधांतल्या कारवायांत ह्या यंत्रणांनी तितलोच उत्साह दाखयिल्लो जाल्यार स्फोट, हल्ल्याचे प्रसंग घडचे नाशिल्ले. देशांत वर्सभर ह्या ना त्या राज्यांत वेंचणुको जायत आसतात, तेन्ना आपल्या सत्तापक्षाच्या वतीन त्या वेंचणुकांत रणनिती तयार करप, तीस- चाळीस प्रचार सभांक संबोधित करपाच्या कामांत देशाचे प्रधानमंत्री, गृह मंत्री, रक्षामंत्री थंय वेळ वगडायतान दिसतात. देशाची भायली आनी अंतर्गत सुरक्षा ही ह्या तिगुयजणांच्या संविधानिक पदांची जापसालदारी, तेन्ना तांणी देश सुरक्षेच्या दृश्टीन आंतरराष्ट्रीय मळार विदेश रणनितीतले ‘चाणक्य’ जावप योग्य थारतले, संकुचित पक्षीय राजकारणांतले न्हय. हालीं देशांत दिल्ली स्फोटाची याद ताजी आसतना बिहार वेंचणुकांत जैता उपरांत रस्त्यार राजकारणांतले जल्लोष करत बेभान जावन नाचपी जनता संवेदनहीन
दिसली.
आता सिंदूर 2.0 खाला पाकिस्तानाचेर हल्लो केल्यार चीन परतून तांका प्रत्यक्ष मजत करतलो आनी हाली आमी सुरक्षा फ्रेमवर्क हस्ताक्षरीत केल्लें आसलें तरी अमेरिका आमचे वांगडा उबो दिसचो ना. दिल्ली स्फोटा उपरांत अमेरिकन दुतावासान फकत ‘प्रार्थना आनी सांत्वना’ दिल्ल्यो. आतंकवादाचो उल्लेख केलो ना- धिक्कारलो ना. मात दुसऱ्या दिसा पाकिस्तानांत स्फोट घडलो तेन्ना थंयच्या अमेरिकन मात तो आतंकी हल्लो म्हणत निशेध व्यक्त करून अमेरिका पाकिस्ताना वांगडा
‘दृढ एकतेच्या’ भावनेन उबी आसतली असो संदेश दिलो. अमेरिकन सेक्रेटरी ऑफ स्टेट मार्को रूबिओन उपरांत दिल्ली हल्लो आतंकवादी अशे विधान केल्ले आसलें तरी गेल्ले देशांत पदभार सांबाळिल्लो राजदूत सर्जिओ गोर हो ट्रंपाचो खास मर्जीतलो आशिल्ल्यान ताच्या विधानाक चड वजन आसा.

दीपक लाड